ବ୍ୟାଙ୍କରେ କେଓ୍ବାଇସି ଅପଡେଟ୍ କରିବାର ଶେଷ ତାରିଖ ମାର୍ଚ୍ଚ ୩୧କୁ ବୃଦ୍ଧି
ନୂଆଦିଲ୍ଲୀ : ଦେଶରେ ପୁଣି ସଂକ୍ରମଣ ବୃଦ୍ଧି ପାଇବା ପରିପ୍ରେକ୍ଷୀରେ ଭାରତୀୟ ରିଜର୍ଭ ବ୍ୟାଙ୍କ କେଓ୍ବାଇସି (ନୋ ୟୋର କଷ୍ଟମର ବା ଗ୍ରାହକଙ୍କ ପରିଚୟ ଓ ଠିକଣା ପ୍ରମାଣକରୁଥିବା କାଗଜପତ୍ର) ଅପଡେଟ କରିବାର ଶେଷ ତାରିଖକୁ ପୁଣି ବଢାଇଦେଇଛନ୍ତି । ଏହା କରିବାର ଶେଷ ତାରିଖ ଡିସେମ୍ବର ୩୧ ଥିବାବେଳେ, ଏବେ ତାହାକୁ ମାର୍ଚ୍ଚ ୩୧, ୨୦୨୨ ପର୍ଯ୍ୟନ୍ତ ବୃଦ୍ଧି କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଏହାର ଅର୍ଥ ହେଉଛି ଯ଼େଉଁ ଗ୍ରାହକମାନେ କେଓ୍ବାଇସି ଅପଡେଟ୍ କରିନାହାନ୍ତି, ସେମାନେ ୩୧ ମାର୍ଚ୍ଚ ସୁଦ୍ଧା କେଓ୍ବାଇସି ଅପଡେଟ୍ ନକଲେ ବ୍ୟାଙ୍କମାନେ ସେମାନଙ୍କ ଖାତା ଉପରେ କୌଣସି କଟକଣା ଲଗାଇପାରିବେ ନାହିଁ । ଏହି ସମୟ ସୁଦ୍ଧା ଗ୍ରାହକମାନଙ୍କ ଉପରେ କୌଣସି କଟକଣାମୂଳକ କାର୍ଯ୍ୟାନୁଷ୍ଠାନ ଗ୍ରହଣ ନ କରିବାକୁ ରିଜର୍ଭ ବ୍ୟାଙ୍କ ପକ୍ଷରୁ ବ୍ୟାଙ୍କମାନଙ୍କୁ ନିର୍ଦ୍ଦେଶ ଦିଆଯାଇଛି ।
ଗତ ମେ ମାସରେ ରିଜର୍ଭ ବ୍ୟାଙ୍କ କେଓ୍ବାଇସି ଅପଡେଟ କରିବାର ଶେଷ ତାରିଖକୁ ଡିସେମ୍ବର ୩୧ ପର୍ଯ୍ୟନ୍ତ ବଢାଇଦେଇଥିଲେ । ସେତେବେଳେ କରୋନାର ୨ୟ ଲହର ଓ ବିଭିନ୍ନ ରାଜ୍ୟରେ ଲାଗୁ ଲକଡାଉନକୁ ଦୃଷ୍ଟିରେ ରଖି ଏପରି ପଦକ୍ଷେପ ନିଆଯାଇଥିଲା ।
ସୂଚନାଯୋଗ୍ୟ ଯେ, ଦେଶରେ ଓମିକ୍ରନ ସଂକ୍ରମଣ ମାମଲା ଦ୍ରୁତ ଗତିରେ ବଢିଚାଲିଛି । ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ଦିଆଯାଇଥିବା ତଥ୍ୟ ଅନୁସାରେ ଦେଶରେ ଓମିକ୍ରନ ଆକ୍ରାନ୍ତ ସଂଖ୍ୟା ୯୬୦ରେ ପହଞ୍ଚିଛି ।