ଆଜିଠାରୁ ୧୦୫ ଟଙ୍କା ବଢ଼ିଲା ଏଲପିଜି ସିଲିଣ୍ଡର ମୂଲ୍ୟ

ନୂଆଦିଲ୍ଲୀ: ଋଷ-ୟୁକ୍ରେନ ମଧ୍ୟରେ ଯୁଦ୍ଧ ଚାଲିଥିବାବେଳେ ଆଜିଠାରୁ ଏଲପିଜି ମୂଲ୍ୟ ୧୦୫ ଟଙ୍କା ବଢିଛି | ତେବେ ଏହି ବର୍ଦ୍ଧିତ ମୂଲ୍ୟ ବାଣିଜ୍ୟିକ ସିଲିଣ୍ଡର ପାଇଁ ଲାଗୁ ହୋଇଛି ଏବଂ ମାର୍ଚ୍ଚ ୭ ପରେ ଘରୋଇ ଏଲପିଜି ସିଲିଣ୍ଡର ମଧ୍ୟ ବଢିପାରେ ବୋଲି କୁହାଯାଉଛି | କାରଣ ବର୍ତ୍ତମାନ ଉତ୍ତରପ୍ରଦେଶ ବିଧାନସଭା ନିର୍ବାଚନର ଷଷ୍ଠ ପର୍ଯ୍ୟାୟ ପାଇଁ ମତଦାନ ମାର୍ଚ୍ଚ ୩ରେ ହେବାକୁ ଥିବାବେଳେ ସପ୍ତମ ପର୍ଯ୍ୟାୟ ଭୋଟ୍ ମାର୍ଚ୍ଚ ୭ ରେ ହେବ। ଏଭଳି ପରିସ୍ଥିତିରେ ମାର୍ଚ୍ଚ ୭ ପରେ ଘରେ ବ୍ୟବହୃତ ହେଉଥିବା ଏଲପିଜି ସିଲିଣ୍ଡର ମୂଲ୍ୟ ବଢିପାରେ |

ସୂଚନା ଥାଉ କି ଘରେ ବ୍ୟବହୃତ ହେଉଥିବା ଏଲପିଜି ସିଲିଣ୍ଡର ମୂଲ୍ୟ ୬ ଅକ୍ଟୋବର ୨୦୨୧ ପରଠାରୁ ଅପରିବର୍ତ୍ତିତ ରହିଛି | ଅକ୍ଟୋବରଠାରୁ ସିଲିଣ୍ଡର ମୂଲ୍ୟ ଶସ୍ତା କିମ୍ବା ମହଙ୍ଗା ହୋଇନାହିଁ | ଅବଶ୍ୟ, ଏହି ସମୟରେ ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ୧୦୨ ଡଲାର ଅତିକ୍ରମ କରିଛି। ଅକ୍ଟୋବର ୨୦୨୧ ରୁ ଫେବୃଆରୀ ୧, ୨୦୨୨ ମଧ୍ୟରେ ବ୍ୟବସାୟିକ ସିଲିଣ୍ଡରର ମୂଲ୍ୟ ୧୭୦ ଟଙ୍କା ବୃଦ୍ଧି ପାଇଛି।

ଅକ୍ଟୋବର ୧ ରେ, ବ୍ୟବସାୟିକ ସିଲିଣ୍ଡରର ମୂଲ୍ୟ ୧୭୩୬ ଟଙ୍କା ଥିବାବେଳେ ନଭେମ୍ବରରେ ଏହା ବର୍ଦ୍ଧିତ ହୋଇ ୨୦୦୦ ଟଙ୍କାରେ ପହଞ୍ଚିଥିଲା | ଜାନୁଆରୀରେ ଏବଂ ଫେବୃଆରୀ ୨୦୨୨ ରେ ଏଲପିଜି ମୂଲ୍ୟ କମି ୧୯୦୭ ଟଙ୍କାରେ ପହଞ୍ଚିଥିଲା | ଆଉ ଆଜିଠାରୁ ପୁଣି ୧୯ କିଲୋଗ୍ରାମର ଏଲପିଜି ସିଲିଣ୍ଡର ମୂଲ୍ୟ ୧୯୦୭ ଟଙ୍କା ବଦଳରେ ୨୦୧୨ ଟଙ୍କାକୁ ବୃଦ୍ଧି ପାଇଛି |