ବିଏସ୍ଏନ୍ଏଲ୍ ୪ଜି ଟେଣ୍ଡରରେ ଭାଗନେବ ମହିନ୍ଦ୍ରା
ନୂଆଦିଲ୍ଲୀ: ଭାରତ ସଂଚାର ନିଗମ ଲିମିଟେଡ୍ (ବିଏସ୍ଏନ୍ଏଲ୍) ପକ୍ଷରୁ ୪ଜି ଉପକରଣ ପାଇଁ ସଂଶୋଧିତ ଟେଣ୍ଡର ଆହ୍ବାନ କରାଯିବାକୁ ଥିବା ବେଳେ ସେହି ପ୍ରକ୍ରିୟାରେ ଟେକ୍ ମହିନ୍ଦ୍ରା ଅଂଶଗ୍ରହଣ କରିବାକୁ ଆଗ୍ରହ ପ୍ରକାଶ କରିଛି। କଂପାନିର ସିଇଓ ସିପି ଗୁରନାନି କହିଛନ୍ତି, ୪ଜି ଓ ୫ଜିର ଡିଜିଟାଲ୍ ହାଇୱେ ନିର୍ମାଣ କରିବା ଲାଗି ଆମେ ପ୍ରସ୍ତୁତ ଅଛୁ। ଆମ ପାଖରେ ପରିପକ୍ବ ପ୍ରଯୁକ୍ତି ରହିଛି ଯାହାକୁ ଆମେ ନେଟ୍ୱର୍କରେ ବ୍ୟବହାର କରି ଯଥେଷ୍ଟ ପରିମାଣର ବ୍ୟାଣ୍ଡ୍ୱିଡ୍ଥ ସୃଷ୍ଟି କରିପାରିବୁ। ଚୀନ୍ର କଂପାନି ହୁୱେଇ ଓ ଜେଡ୍ଟିଇର ଉପକରଣ ଆଣିବା ଉପରେ କେନ୍ଦ୍ର ସରକାର ପ୍ରତିବନ୍ଧକ ଲଗାଇବା ପରେ ବିଏସଏନ୍ଏଲ୍ ପକ୍ଷରୁ ୪୭,୦୦୦ ସାଇଟ୍କୁ ୪ଜି ସେବା ଲାଗି ପ୍ରସ୍ତୁତ କରିବା ନିମନ୍ତେ ଯେଉଁ ଟେଣ୍ଡର ଆହ୍ବାନ କରାଯାଇଥିଲା ତାହାକୁ ବାତିଲ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ଜେଡ୍ଟିଇ ଓ ନୋକିଆ ମିଳିତ ଭାବେ ୯୦୦୦ କୋଟି ଟଙ୍କାର ବିଡ୍ ଦାଖଲ କରିଥିଲେ ବୋଲି ଚର୍ଚା ହେଉଛି। ଦେଶ ଭିତରେ ବ୍ୟବହାର ହୋଇପାରୁଥିବା ୪ଜି ଓ ୫ଜି ଉପକରଣ ବିକଶିତ କରିବା ଲାଗି ଗତ ଜୁନ୍ରେ ଟେକ୍ ମହିନ୍ଦ୍ରା ତରଫରୁ ସରକାରୀ ଆଇଟିଆଇଗୁଡ଼ିକ ସହ ବୁଝାମଣା କରାଯାଇଛି। ଟେକ୍ ମହିନ୍ଦ୍ରା ହେଉଛି ଦେଶର ପଞ୍ଚମ ବଡ଼ ସୂଚନା ପ୍ରଯୁକ୍ତି କଂପାନି। ଏହା ଏଟି ଆଣ୍ଡ୍ଟି ଓ ବିଟି ଭଳି ଟେଲିକମ୍ ସଂସ୍ଥାକୁ ସେବା ଯୋଗାଉଛି। ଉଲ୍ଲେଖଯୋଗ୍ୟ, ଗଲ୍ୱାନ ଘାଟିରେ ଭାରତ-ଚୀନ୍ ସେନା ମଧ୍ୟରେ ସଂଘର୍ଷରେ ୨୦ ଭାରତୀୟ ଯବାନ ସହିତ ହେବା ପରେ ଭାରତରେ ଚୀନ୍ ବିରୋଧୀ ସ୍ଥିତି ରହିଛି।