ନୂଆଦିଲ୍ଲୀ: ଗୋଟିଏ ପଟେ ପେଟ୍ରୋଲ-ଡିଜେଲ, ଗ୍ୟାସ ଏବଂ ରନ୍ଧନ ତେଲର ମୂଲ୍ୟ ବଢୁଥିବାବେଳେ ବର୍ତ୍ତମାନ ଦୈନନ୍ଦିନ ବ୍ୟବହୃତ ହେଉଥିବା ଦିଆସିଲିର ମୂଲ୍ୟ ମଧ୍ୟ ୧୪ ବର୍ଷ ପରେ ବୃଦ୍ଧି ପାଇବାକୁ ଯାଉଛି। ମାତ୍ର ୧ ଟଙ୍କାରେ ଉପଲବ୍ଧ ହେଉଥିବା ଦିଆସିଲି ଏଣିକି ଦୁଇଗୁଣ ଅର୍ଥାତ ୨ ଟଙ୍କାରେ ଉପଲବ୍ଧ ହେବ ଏବଂ ନୂତନ ମୂଲ୍ୟ ଡିସେମ୍ବର ୧ ରୁ ଲାଗୁ ହେବ | ପାଞ୍ଚଟି ପ୍ରମୁଖ ମ୍ୟାଚ୍ ବକ୍ସ ଇଣ୍ଡଷ୍ଟ୍ରି ସଂସ୍ଥା ପକ୍ଷରୁ ସର୍ବସମ୍ମତି କ୍ରମେ ଡିସେମ୍ବର ୧ରୁ ଦିଆସିଲିର ମୂଲ୍ୟକୁ ୧ଟଙ୍କାରୁ ୨ ଟଙ୍କାକୁ ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ଶେଷଥର ପାଇଁ ୨୦୦୭ ମସିହାରେ ଦିଆସିଲି ବକ୍ସର ମୂଲ୍ୟ ସଂଶୋଧିତ ହେବା ପରେ ଏହାକୁ ୫୦ ପଇସାରୁ ବଢାଯାଇ ୧ ଟଙ୍କା କରାଯାଇଥିଲା। ଗୁରୁବାର ଦିନ ତାମିଲନାଡୁର ଶିବକାଶୀରେ ଅଲ୍ ଇଣ୍ଡିଆ ଚାମ୍ବର ଅଫ୍ ମ୍ୟାଚିସର ବୈଠକରେ ଏହି ନିଷ୍ପତ୍ତି ନିଆଯାଇଛି। ଦିଆସିଲି ନିର୍ମାତାମାନେ କହିଛନ୍ତି ଯେ ଦିଆସିଲି ପାଇଁ ୧୦ରୁ ଅଧିକ ପ୍ରକାରର କଞ୍ଚାମାଲ ଆବଶ୍ୟକ। କିନ୍ତୁ କଞ୍ଚାମାଲର ମୂଲ୍ୟ ଯଥେଷ୍ଟ ବୃଦ୍ଧି ପାଇଛି ଯେଉଁଥିପାଇଁ ବର୍ତ୍ତମାନର ମୂଲ୍ୟରେ ବିକ୍ରୟ କରିବା ସମ୍ଭବ ନୁହେଁ | ଉତ୍ପାଦକମାନେ କହିଛନ୍ତି ଯେ ଏକ କିଲୋଗ୍ରାମ ଲାଲ୍ ଫସଫରସ୍ ୪୨୫ରୁ ୮୧୦ ଟଙ୍କା, ମହମ ୫୮ରୁ ୮୦ ଟଙ୍କା, ବାହ୍ୟ ବକ୍ସ ମୂଲ୍ୟ ୩୬ ରୁ ୫୫ ଟଙ୍କା ଏବଂ ଭିତର ବକ୍ସ ୩୨ ରୁ ୫୮ ଟଙ୍କାକୁ ବୃଦ୍ଧି ପାଇଛି।
କାଗଜ, ପୋଟାସିୟମ୍ କ୍ଲୋରେଟ୍ ଏବଂ ସଲଫରର ମୂଲ୍ୟ ମଧ୍ୟ ୧୦ ପ୍ରତିଶତରୁ ଅଧିକ ବୃଦ୍ଧି ପାଇଛି। ସୂଚନା ମୁତାବକ ତାମିଲନାଡୁରେ ପ୍ରାୟ ଚାରି ଲକ୍ଷ ଲୋକ ଏହି ଶିଳ୍ପରେ କାମ କରନ୍ତି ଏବଂ ଏହି ଶ୍ରମିକମାନଙ୍କ ମଧ୍ୟରୁ ୯୦ ପ୍ରତିଶତରୁ ଅଧିକ ମହିଳା ଅଛନ୍ତି । ଦିଆସିଲି ମୂଲ୍ୟ ବଢିବା ପରେ କର୍ମଚାରୀମାନେ ଭଲ ବେତନ ପାଇବେ ବୋଲି ଆଶା କରାଯାଉଛି |