ଆଇଆଇଟି କି ଆଇଆଇଏମ୍ ଡିଗ୍ରି ନାହିଁ, ହେଲେ ଦେଶର ସର୍ବାଧିକ ଦରମା ପାଉଥିବା ସିଇଓ

ନୂଆଦିଲ୍ଲୀ: ସାଧାରଣତଃ ଆମର ଚିନ୍ତାଧାର ରହିଛି କି ଯେଉଁମାନେ ଆଇଆଇଟି କି ଆଇଆଇଏମରୁ ପାସ୍ କରିଛନ୍ତି କିମ୍ବା ସେମାନଙ୍କ ପାଖରେ ଏଠାକାର ଡିଗ୍ରୀ ରହିଛି, ସେମାନେ କେବଳ ଭଲ ବେତନର ପ୍ୟାକେଜ୍ ପାଇପାରିବେ। ଆମର ଏହି ଚିନ୍ତାଧାର କିନ୍ତୁ ଭୁଲ।

କାରଣ ଏମିତି ଅନେକ ବ୍ୟକ୍ତି ଅଛନ୍ତି, ଯେଉଁମାନେ ଆଇଆଇଟି-ଆଇଆଇଏମ୍ ଡିଗ୍ରି ବିନା ମଧ୍ କୋଟିକୋଟି ଟଙ୍କାର ବେତନ ଥିବା ପ୍ୟାକେଜ୍ ପାଉଛନ୍ତି। ଆଜି ଆମେ ଆପଣଙ୍କୁ ଏମିତି ଜଣେ ବ୍ୟକ୍ତିଙ୍କ ସଫଳତାର କାହାଣୀ କହିବାକୁ ଯାଉଛୁ, ଯାହାଙ୍କ ପାଖରେ ବଡ଼ କଲେଜର ଡିଗ୍ରି ନାହିଁ, କିନ୍ତୁ ତାଙ୍କର ଦୈନିକ ଦରମା ଲକ୍ଷାଧିକ ଟଙ୍କା ରହିଛି।

ଦେଶର ବୃହତ୍ତମ ଆଇଟି ସେବା ପ୍ରଦାନକାରୀ କମ୍ପାନି ମଧ୍ୟରୁ ଏଚସିଏଲ ଟେକ୍ନୋଲୋଜି ହେଉଛି ଗୋଟିଏ। ଏହି କମ୍ପାନିର ସିଇଓ ସି ବିଜୟକୁମାର ସର୍ବାଧିକ ପାରିଶ୍ରମିକ ପ୍ରାପ୍ତ ସିଇଓମାନଙ୍କ ମଧ୍ୟରୁ ଅନ୍ୟତମ।

ସି ବିଜୟକୁମାର ଏଚସିଏଲ କମ୍ପାନିର ପରିଚାଳନା କରୁଛନ୍ତି । ତାଙ୍କ ନେତୃତ୍ୱରେ କମ୍ପାନି ଗତ କିଛି ବର୍ଷ ଧରି ଭଲ କାମ କରୁଛି। ବିଶେଷକରି ଆର୍ଟିଫିସିଆଲ ଇଣ୍ଟେଲିଜେନ୍ସ ଡେଭଲପମେଣ୍ଟରେ କମ୍ପାନିର ଭଲ ପ୍ରଦର୍ଶନ ରହିଛି, ଯାହାର ଶ୍ରେୟ ସି ବିଜୟକୁମାରଙ୍କୁ ଯାଇଥାଏ ।

୨୦୨୩ ଆର୍ଥିକ ବର୍ଷରେ, ଏଚସିଏଲ ୧ ଲକ୍ଷ କୋଟିରୁ ଅଧିକ ଆୟ କରିଛି ​​। ଏହି କାରଣରୁ ସି ବିଜୟକୁମାରଙ୍କ କାର୍ଯ୍ୟକୁ ସମସ୍ତେ ପ୍ରଶଂସା କରିଥିଲେ। ତାଙ୍କର କାର୍ଯ୍ୟ ଏବଂ ପ୍ରଦର୍ଶନ ଆଧାରରେ ସେ ଦେଶର ସର୍ବାଧିକ ପାରିଶ୍ରମିକ ପ୍ରାପ୍ତ ସିଇଓ ହୋଇ ପାରିଛନ୍ତି। ଏଚସିଏଲ ପ୍ରତିଷ୍ଠାତା ଶିବ ନାଦର ପଦ ଛାଡିବା ପରେ ସି ବିଜୟକୁମାର କମ୍ପାନିର ଏମଡି ଭାବରେ କାର୍ଯ୍ୟ କରୁଛନ୍ତି।

ଏଚସିଏଲର ବାର୍ଷିକ ରିପୋର୍ଟ ଅନୁଯାୟୀ, ୨୦୨୨ ମସିହାରେ ସି ବିଜୟକୁମାରଙ୍କୁ ବେସିକ ବେତନ ଭାବରେ ୨ ମିଲିୟନ୍ ଡଲାର୍ ଓ ଭେରିଏବଲ୍ ପେ ୨ ମିଲିୟନ୍ ଡଲାର୍ ମିଳିଥିଲା। ୨୦୨୨ ମସିହାରେ ସେ ୧୬.୫୨ ମିଲିୟନ ଡ଼ଲାର୍ ଅର୍ଥାତ୍ ଦୀର୍ଘକାଳୀନ ପ୍ରୋତ୍ସାହନ ସହିତ ୧୩୧.୦୮ କୋଟି ଟଙ୍କା ପାଇଥିଲେ । ଅର୍ଥାତ୍ ତାଙ୍କର ଦୈନିକ ଦରମା ପ୍ରାୟ ୩୬ ଲକ୍ଷ ଟଙ୍କା ଥିବା କୁହାଯାଉଛି ।