ନୂଆଦିଲ୍ଲୀ : ବିଶ୍ବରେ ମାନ୍ଦାବସ୍ଥାର ପ୍ରଭାବ ଟେକନଲୋଜୀ କମ୍ପାନିମାନଙ୍କ ଉପରେ ପଡ଼ିବାରେ ଲାଗିଛି । ଏହାକୁ ଦୃଷ୍ଟିରେ ରଖି ବିଶ୍ବ ପ୍ରମୁଖ ଟେକନଲୋଜୀ କମ୍ପାନିମାନେ ଛଟେଇ କରିବା ଆରମ୍ଭ କରିଛନ୍ତି । ସୋସିଆଲ ମିଡିଆ କମ୍ପାନି ଟ୍ବିଟର ପକ୍ଷରୁ ହଜାର ହଜାର କର୍ମଚାରୀଙ୍କୁ ଛଟେଇ କରାଯିବା ପରେ ଏବେ ମେଟା (ପୂର୍ବର ଫେସବୁକ) ପକ୍ଷରୁ ବଡ଼ ଧରଣର ଛଟେଇ ଯୋଜନା ସଂପର୍କରେ ଘୋଷଣା କରାଯାଇଛି । ଏ ନେଇ କମ୍ପାନିର ପ୍ରତିଷ୍ଠାତା ମାର୍କ ଜୁକରବର୍ଗ ସ୍ପଷ୍ଟଭାବେ ଘୋଷଣା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏପରିକି ମେଟା ପକ୍ଷରୁ ଯେଉଁ ସଂଖ୍ୟାରେ କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନିଆଯାଇଛି, ତାହାକୁ ଟେକନଲୋଜୀ ଶିଳ୍ପରେ ଏକ ବୃହତ୍ତମ ଛଟେଇ ଭାବେ ଦେଖାଯାଉଛି । ଏହି ଯୋଜନା ଅନୁସାରେ ସାରା ବିଶ୍ବରେ ଥିବା ମେଟାର ୧୩ ପ୍ରତିଶତ ବା ୧୧ ହଜାର କର୍ମଚାରୀଙ୍କୁ ଛଟେଇ କରାଯିବ ।
ଗତ ମଙ୍ଗଳବାର ହୋଇଥିବା ଏକ ବୈଠକରେ ଜୁକରବର୍ଗ କହିଥିଲେ ଯେ କମ୍ପାନିରେ କର୍ମଚାରୀ ସଂଖ୍ୟା ଆବଶ୍ୟକତାଠାରୁ ଅଧିକ ରହିଛି । ଏହାଛଡ଼ା କମ୍ପାନି କେତେକ ଭୁଲ ନିଷ୍ପତ୍ତି ନେଇଛି ।
ମେଟାର ମାନବ ସମ୍ବଳ ମୁଖ୍ୟ ଲୋରି ଗୋଲର କହିଛନ୍ତି ଯେ ଯେଉଁ କର୍ମଚାରୀମାନଙ୍କୁ ଛଟେଇ କରାଯିବ ସେମାନଙ୍କୁ ୪ ମାସର ଦରମା ଦିଆଯିବ । ମେଟାରେ ଏବେ ମୋଟ ପ୍ରାୟ ୮୭ ହଜାର କର୍ମଚାରୀ କାମ କରୁଛନ୍ତି ।
ଗତ ସପ୍ତାହରେ ସାରା ବିଶ୍ବରେ ଥିବା ନିଜର କର୍ମଚାରୀମାନଙ୍କୁ ଛଟେଇ କରିଥିଲା ଟ୍ବିଟର । ଭାରତରେ ଟ୍ବିଟରର ୯୦ ପ୍ରତିଶତ କର୍ମଚାରୀଙ୍କୁ ଛଟେଇ କରାଯାଇଥିଲା ।