ରେଳଯାତ୍ରୀଙ୍କ ଲାଗି ବଡ଼ ଖବର: ରାତିରେ ବନ୍ଦ ରହିବ ପାୱାର ପଏଣ୍ଟ, ମୋବାଇଲ ଓ ଲାପଟପ ଚାର୍ଜ କରିବା ଉପରେ କଟକଣା
ନୂଆଦିଲ୍ଲୀ: ଏଣିକି ରାତିରେ ଟ୍ରେନରେ ରାତିରେ କରିହେବନି ମୋବାଇଲ ଚାର୍ଜିଂ । ଯାତ୍ରୀଙ୍କ ସିଟ ପାଖରେ ଥିବା ଚାର୍ଜ ପଏଣ୍ଟରେ ଆପଣ ମୋବାଇଲ କି ଲାପଟପ ଚାର୍ଜ କରିପାରିବେନି । ରେଳଯାତ୍ରା ବେଳେ ରାତିରେ ଏହି ସେବା ବନ୍ଦ ରହିବ ଅର୍ଥାତ ଚାର୍ଜିଂ ପଏଣ୍ଟ କାମ କରିବନି । ରାତି ୧୧ଟାରୁ ସକାଳ ୫ଟା ଯାଏଁ ସମସ୍ତ ଚାର୍ଜିଂ ପଏଣ୍ଟ ଅଚଳ ହୋଇଯିବ ଆଉ ପୁଣିଥରେ ସକାଳ ହେବା ପରେ ପୂର୍ବପରି କାମ କରିବ । ଏଭଳି ନିଷ୍ପତ୍ତି ନେଇଛି ଭାରତୀୟ ରେଳ । ଯାତ୍ରୀଙ୍କ ସୁରକ୍ଷା ପାଇଁ ରେଳ ପକ୍ଷରୁ ଏହି ନିଷ୍ପତ୍ତି ନିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ତେବେ ସର୍ଟସର୍କିଟ, ମୋବାଇଲ ବ୍ଲାଷ୍ଟ କିମ୍ବା ଅନ୍ୟାନ୍ୟ କାରଣରୁ ବିଭିନ୍ନ ସମୟରେ ଟ୍ରେନରେ ନିଆଁ ଲାଗୁଛି । ରାତିରେ ଅଘଟଣ ଯାତ୍ରୀଙ୍କ ଜୀବନ ପାଇଁ ବଡ ବିପଦ ଆଣୁଥିବାରୁ ନିଆଁକୁ ଆୟତ୍ତ କରିବା ଏବଂ ନିଆଁ ବ୍ୟାପିବା ରୋକିବାକୁ ରାତିରେ ଚାର୍ଜିଂ ସେବା ବନ୍ଦ କରିବାକୁ ନିଷ୍ପତ୍ତି ନେଇଛି ରେଳ ବିଭାଗ ।
ଗତ ମାର୍ଚ୍ଚ ୧୩ ତାରିଖରେ ଦିଲ୍ଲୀ- ଡେରାଡୁନ ଶତାବ୍ଦୀ ଏକ୍ସପ୍ରେସରେ ଭୟଙ୍କର ନିଆଁ ଲାଗିଥିଲା । ସର୍ଟସର୍କିଟରୁ ନିଆଁ ଲାଗି ଗୋଟିଏ କୋଚରୁ ଚାହୁଁଚାହୁଁ ୭ଟି କୋଚକୁ ବ୍ୟାପିଥିଲା । ଯଦିଓ ଯାତ୍ରୀଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା ହେଲେ ସେହି ଘଟଣା ରେଳ ବିଭାଗକୁ ବଡ ଶିକ୍ଷା ଦେଇଥିଲା ଆଉ ଏବେ ଏହାର ପ୍ରଭାବରେ ଏହି ବଡ ନିଷ୍ପତ୍ତି ନିଆଯାଇଛି ।
ସେପଟେ ରେଳଯାତ୍ରା ସମୟରେ ରାତି ୧୧ରୁ ସକାଳ ୫ଟା ଯାଏଁ ଟ୍ରେନରେ ଚାର୍ଜିଂ ସେବା ବନ୍ଦ ରହିବାକୁ ଥିବାରୁ ଦୂରଦୂରାନ୍ତର ଯାତ୍ରା କରୁଥିବା ଯାତ୍ରୀଙ୍କୁ ସାଥିରେ ପାୱାର ବ୍ୟାଙ୍କ ନେବାକୁ କିମ୍ବା ଆଗୁଆ ମୋବାଇଲ, ଲାପଟପରେ ଚାର୍ଜ ରଖିବାକୁ ପରାମର୍ଶ ଦିଆଯାଇଛି ।