ଆଧାର ନ ଥିଲେ ମୋବାଇଲ୍ ସଂଯୋଗ ବନ୍ଦ ହେବ ନାହିଁ : ଟେଲିକମ୍ କମ୍ପାନି
ନୂଆଦିଲ୍ଲୀ : ଗତ କିଛି ଦିନ ହେବ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି ଯେ ଆଧାର ନମ୍ବର ପାଇଁ ମୋବାଇଲ ଫୋନ ବନ୍ଦ ହୋଇଯାଇପାରେ । ତେବେ ସମସ୍ତ ଘଟଣାକୁ ଦୃଷ୍ଟିରେ ରଖି ଟେଲିକମ କମ୍ପାନୀ ସ୍ପଷ୍ଟ କରିଛନ୍ତି ଯେ, ଆଧାର ପାଇଁ ମୋବାଇଲ ଫୋନ ବନ୍ଦ ହେବ ନାହିଁ । ଏପରି କଥା ଶୁଣିବାପରେ ସାଧାରଣ ଲୋକଙ୍କ ମନରେ ଥିବା ଭୟ ସାମାନ୍ୟ ହ୍ରାସ ପାଇଥିବା ଜଣାପଡିଛି । କିଛି ଗଣମାଧ୍ୟମ ଖବର ଦେଇଥିଲେ ଯେ, ଦେଶର ୫୦ କୋଟି ଲୋକଙ୍କ ଆଧାର କାର୍ଡ ପାଇଁ ମୋବାଇଲ ଫୋନ ବନ୍ଦ ହୋଇଯିବ । ତେଣୁ ଲୋକମାନଙ୍କ ମନରେ ଏକ ଭୟ ସଂଚାର ହୋଇଥିଲା । କିଛିଦିନ ତଳେ ସର୍ବୋଚ୍ଚ ନ୍ୟାୟାଳୟ କହିଥିଲେ ଯେ ଆଧାର ନମ୍ବର ମୋବାଇଲ ପାଇଁ ଜରୁରୀ ନୁହେଁ । ତେଣୁ ପରେ ପୁଣି ଥରେ ଏପରି ଚର୍ଚ୍ଚା ହୋଇଥିଲା ଯେଉଁଥିରେ କି ଅନେକ ଲୋକ ନିଜର ମୋବାଇଲ ବନ୍ଦ ହୋଇଯିବା ନେଇ ଚିନ୍ତାରେ ଥିଲେ । କାରଣ ବର୍ତମାନ ସମୟରେ ୫୦ କୋଟିରୁ ଅଧିକ ମୋବାଇଲ ନମ୍ବର ଆଧାର କାର୍ଡରେ ହିଁ ଚାଲିଛି ।
Sambad is now on WhatsApp
Join and get latest news updates delivered to you via WhatsApp
ତେଣୁ ସାରା ଦେଶରେ ଖବର ପ୍ରଚାରିତ ହୋଇଥିଲା ଯେ, ଆଧାର କାର୍ଡ ଛଡା ଯଦି ଅନ୍ୟ କିଛି ଡକ୍ୟୁମେଣ୍ଟ ନଥାଏ ତେବେ ତାଙ୍କର ଟେଲିକମ କମ୍ପାନୀ ନମ୍ବର କାଟିଦେବ । ଏହାପରେ ଏପରି କଥା ସରକାରଙ୍କ ପାଖରେ ପହଞ୍ଚିଥିଲା ଓ ଏହାକୁ ସରକାର ଗମ୍ଭୀରତାର ସହ ନେବା ସହ ସତାସତ୍ୟ ଜାଣିବା ପାଇଁ ଟେଲିକମ କମ୍ପାନୀମାନଙ୍କୁ କହିଥିଲେ । ଏହାସହ ଲୋକମାନଙ୍କୁ ଡରିବାର ଆବଶ୍ୟକତା ନାହିଁ ବୋଲି ବିଭିନ୍ନ ଟେଲିକମ କମ୍ପାନୀ ପକ୍ଷରୁ ସୂଚନା ଦିଆଯାଇଛି । ମିଳିଥିବା ସୂଚନା ଅନୁସାରେ ରିଲାଏନ୍ସ ଜିଓର ସବୁଠାରୁ ଅଧିକ ଗ୍ରାହକ ରହିଛନ୍ତି ଓ ସମସ୍ତଙ୍କ ମୋବାଇଲ ନମ୍ବର ଆଧାର କାର୍ଡ ଦ୍ୱାରା ହିଁ ସଂଯୋଗ ରହିଛି ।