କେନ୍ଦ୍ରରେ ଖାଲି ପଡ଼ିଛି ୮.୭ ଲକ୍ଷ ପଦବି, ୭ ବର୍ଷରେ ପୂରଣ ହୋଇଛି ୬.୧୯ ଲକ୍ଷ
ନୂଆଦିଲ୍ଲୀ : ମୋଦୀ ସରକାରଙ୍କ ୭ ବର୍ଷର ଅବଧିରେ ବିଭିନ୍ନ ବିଭାଗରେ ୬.୯୮ ଲକ୍ଷ ନିଯୁକ୍ତି ମିଳିଛି। କିନ୍ତୁ ଉପା ସରକାରଙ୍କ ୭ ବର୍ଷ ଅମଳରେ ଉକ୍ତ ନିଯୁକ୍ତି ସଂଖ୍ୟା ୬.୧୯ ଲକ୍ଷ ଥିଲା। ଗୁରୁବାର ସଂସଦରେ କେନ୍ଦ୍ରମନ୍ତ୍ରୀ ଜିତେନ୍ଦ୍ର ସିଂହ ଏହି ସୂଚନା ଦେଇଛନ୍ତି। ତେବେ ଚିନ୍ତାର ବିଷୟ ହେଲା କେନ୍ଦ୍ର ସରକାରଙ୍କ ଅଧୀନରେ ୨୦୨୦ ମାର୍ଚ୍ଚ ସୁଦ୍ଧା ୪୦ ଲକ୍ଷ ୪ ହଜାର ୯୪୧ଟି ମଞ୍ଜୁରିପ୍ରାପ୍ତ ପଦବି ମଧ୍ୟରୁ ୮ ଲକ୍ଷ ୭୨ ହଜାର ୨୪୩ଟି ପଦବି ଫାଙ୍କା ପଡ଼ିଛି। କର୍ମଚାରୀଙ୍କ ଅବସର, ଇସ୍ତଫା, ମୃତ୍ୟୁ ଏବଂ ପଦୋନ୍ନତି ଆଦି କାରଣରୁ ବିଭିନ୍ନ ପଦବି ଖାଲି ପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଉପା ସରକାରଙ୍କ ଅମଳରେ ୨୦୦୭-୦୮ରୁ ୨୦୧୩-୧୪ ମଧ୍ୟରେ ୩ଟି ପ୍ରମୁଖ ନିଯୁକ୍ତି ପ୍ରଦାନକାରୀ ଏଜେନ୍ସି ଯଥା କେନ୍ଦ୍ରୀୟ ଲୋକସେବା ଆୟୋଗ (ୟୁପିଏସ୍ସି), ରେଳବାଇ ନିଯୁକ୍ତି ବୋର୍ଡ (ଆରଆରବି) ଏବଂ କମର୍ଚାରୀ ଚୟନ ଆୟୋଗ (ଏସ୍ଏସ୍ସି) ଦ୍ବାରା ମୋଟ ୬ ଲକ୍ଷ ୧୯ ହଜାର ୨୭ଟି ପଦବି ପୂରଣ କରାଯାଇଥିଲା। କିନ୍ତୁ ମୋଦୀ ସରକାରଙ୍କ ୭ ବର୍ଷର ଅବଧିରେ ନିଯୁକ୍ତି ସଂଖ୍ୟା ୬ ଲକ୍ଷ ୯୮ ହଜାର ୧୧କୁ ବୃଦ୍ଧି ପାଇଛି। ଗତ ୫ଟି ଆର୍ଥିକ ବର୍ଷରେ ଉପରୋକ୍ତ ତିନିଟି ଯାକ ନିଯୁକ୍ତି ଏଜେନ୍ସି ମାଧ୍ୟମରେ ମୋଟ ୪ ଲକ୍ଷ ୪୪ ହଜାର ୮୧୩ଟି ପଦବି ପୂରଣ ହୋଇଛି। ମୋଦୀଙ୍କ ନେତୃତ୍ବରେ ଏନଡିଏ ସରକାର ୨୦୧୪ ମେ ମାସରେ କ୍ଷମତାକୁ ଆସିଥିଲା।