ଅର୍ଥନୀତି ଉପରେ କରୋନା ପ୍ରଭାବ : ସ୍ଥିତି ଉପରେ ତୀକ୍ଷଣ ନଜର ରଖିଛି ରିଜର୍ଭ ବ୍ୟାଙ୍କ
ମୁମ୍ବାଇ : କରୋନା ଭାଇରସ ଯୋଗୁଁ ସମଗ୍ର ବିଶ୍ୱ ଅର୍ଥନୀତି ପ୍ରତି ବଡ଼ ବିପଦ ମାଡ଼ିଆସୁଛି । ବିଶ୍ୱ ସବୁ ଶିଳ୍ପ ଗୁରୁତରଭାବେ ପ୍ରଭାବିତ ହେବା ଆରମ୍ଭ କରିଛନ୍ତି । ଭାରତୀୟ ଅର୍ଥନୀତି ମଧ୍ୟ ପ୍ରଭାବିତ ହେଉଛି । ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ଓ ରିଜର୍ଭ ବ୍ୟାଙ୍କ ବିଭିନ୍ନ ପଦକ୍ଷେପ ନେବା ଆରମ୍ଭ କରିଦେଇଛନ୍ତି । ସ୍ଥିତି ଉପରେ ତୀକ୍ଷଣ ନଜର ରଖିଛି ରିଜର୍ଭ ବ୍ୟାଙ୍କ ।
Sambad is now on WhatsApp
Join and get latest news updates delivered to you via WhatsApp
ଆଜି ଆୟୋଜିତ ଏକ ସ୍ୱତନ୍ତ୍ର ସାମ୍ବାଦିକ ସମ୍ମିଳନୀରେ ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି ଯେ କରୋନା ଭାଇରସର ପ୍ରଭାବରୁ ଭାରତୀୟ ଅର୍ଥନୀତି ଅଛୁଆଁ ରହିବା ସମ୍ଭବ ନୁହେଁ । ଏଣୁ ସ୍ଥିତିର ମୁକାବିଲା ପାଇଁ ଆବଶ୍ୟକ ଜରୁରୀ ପଦକ୍ଷେପ ନିଆଯିବ । ତେବେ ସୁଧହାର ସଂପର୍କିତ ନିଷ୍ପତ୍ତି ରିଜର୍ଭ ବ୍ୟାଙ୍କର ମୁଦ୍ରାନୈତିକ କମିଟି (ଏମପିସି) ନେବ ବୋଲି ସେ ସ୍ପଷ୍ଟ କରିଦେଇଛନ୍ତି । ଏମପିସି ବୈଠକ ଆସନ୍ତା ୩୧ରୁ ଏପ୍ରିଲ ୩ ପର୍ଯ୍ୟନ୍ତ ଚାଲିବ । କରୋନା ଭାଇରସ ପରିସ୍ଥିତିର ପ୍ରଭାବରୁ ଭାରତୀୟ ଅର୍ଥନୀତିକୁ ମୁକ୍ତ କରିବାକୁ ରିଜର୍ଭ ବ୍ୟାଙ୍କ ପକ୍ଷରୁ ଆଜି ସୁଧହାର ହ୍ରାସ କରିବ ବୋଲି ଆଶା କରାଯାଉଥିଲା ।
କରୋନା ଭାଇରସ ଏବେ ବିଶ୍ୱର ୧୩୫ଟି ଦେଶରେ ପହଞ୍ଚିଥିବାବେଳେ ପ୍ରାୟ ୧ ଲକ୍ଷ ୫୩ ହଜାର ଲୋକ ସଂକ୍ରମିତ ହୋଇଛନ୍ତି ଓ ୫୭୦୦ ଜଣ ମୃତ୍ୟୁବରଣ କରିଛନ୍ତି । ଭାରତରେ ଏପର୍ଯ୍ୟନ୍ତ ୧୧୪ ଜଣ ସଂକ୍ରମିତ ବ୍ୟକ୍ତି ଚିହ୍ନଟ ହୋଇଛନ୍ତି ।