ନାଲକୋର ୩ଟି ପ୍ରକଳ୍ପ ଲୋକାର୍ପିତ
ପଞ୍ଚପଟ୍ଟମାଳି ସାଉଥ୍ ବ୍ଲକ୍ରୁ ବକ୍ସାଇଟ୍ ଉତ୍ପାଦନ ଆରମ୍ଭ
ଭୁବନେଶ୍ୱର : ନାଲକୋ ପକ୍ଷରୁ ତିନୋଟି ନୂଆ ପ୍ରକଳ୍ପର ଲୋକାର୍ପଣ କରିଛନ୍ତି କେନ୍ଦ୍ର ଖଣିମନ୍ତ୍ରୀ ନରେନ୍ଦ୍ର ସିଂ ତୋମାର । ଏହି ତିନୋଟି ପ୍ରକଳ୍ପ ହେଲା ସାଉଥ ବ୍ଲକ ବକ୍ସାଇଟ ଖଣି, ପଞ୍ଚପଟ୍ଟମାଳି ଓଡ଼ିଶା, ଦାମନଯୋଡ଼ି ସ୍ଥିତ ନାଲକୋ ରିଫାଇନାରୀରେ ୧୮.୫ ମେଗାଓ୍ଵାଟ୍ ଟର୍ବୋ ଜେନେରେଟର, ଅନୁଗୁଳ ସ୍ମେଲଟରରେ ନାନୋ-ଟେକନଲୋଜୀ ଭିତ୍ତିକ ଡିଫ୍ଲୋରିନେସନ ପ୍ଲାଣ୍ଟ । ଏହି ପ୍ରକଳ୍ପଗୁଡିକ ନାଲକୋର ଚାଲିଥିବା ସଂପ୍ରସାରଣ ଯୋଜନାରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେବ ବୋଲି ସେ ଏକ ଭିଡ଼ିଓ ବାର୍ତ୍ତାରେ ଘୋଷଣା କରିଛନ୍ତି । ଶ୍ରୀ ତୋମାର କହିଛନ୍ତି ଯେ ଦେଶର ଖଣି ଉଦ୍ୟୋଗରେ ସ୍ୱଚ୍ଛତା ଓ ପାରଦର୍ଶିତା ଆଣିବା ପାଇଁ ସରକାର ଦୁଇବର୍ଷ ତଳେ ଏମଏମଡିଆର ଆଇନରେ ସଂଶୋଧନ କରିଥିଲେ ଓ ଇ-ଅକ୍ସନ ମାଧ୍ୟମରେ ଖଣି ଆବଣ୍ଟନ ପାଇଁ ବ୍ୟବସ୍ଥା କରିଥିଲେ । ଏହା ଫଳରେ ଏପର୍ଯ୍ୟନ୍ତ ୩୮ଟି ବ୍ଲକ ନିଲାମ ହୋଇଛି ଓ ଏଥିରୁ ରାଜ୍ୟମାନେ ମୋଟ ୧.୨୨ ଲକ୍ଷ କୋଟି ଟଙ୍କାର ରାଜସ୍ୱ ପାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ନାଲକୋର ୩୮ ତମ ପ୍ରତିଷ୍ଠା ଦିବସରେ ମୁଖ୍ୟ ଅତିଥିଭାବେ ଯୋଗଦେଇ କେନ୍ଦ୍ର ଖଣି ମନ୍ତ୍ରଣାଳୟର ଯୁଗ୍ମ ସଚିବ ସୁଭାଷ ଚନ୍ଦ୍ରା କହିଛନ୍ତି ଯେ ବିଶ୍ୱ ବଜାରରେ ମାନ୍ଦାବସ୍ଥା ସତ୍ତ୍ୱେ ନାଲକୋ ନିଜର ଅଭିବୃଦ୍ଧିକୁ ବଜାୟ ରଖିପାରିଛି । ଆଗାମୀ ୪-୫ ବର୍ଷରେ ନାଲକୋ ପକ୍ଷରୁ କେତେଗୁଡ଼ିଏ ସଂପ୍ରସାରଣ ଯୋଜନା ହାତକୁ ନିଆଯାଇଛି । ଏଥିରେ ପ୍ରାୟ ୧୦ ହଜାର କୋଟି ଟଙ୍କା ନିବେଶ କରାଯିବ ।
ଏହି ଅବସରରେ ନାଲକୋ ସିଏମଡି ତପନ କୁମାର ଚାନ୍ଦ କହିଛନ୍ତି ଯେ ଆଜିର ପ୍ରତିକୂଳ ବଜାରରେ ନିଜର ଅଭିବୃଦ୍ଧିକୁ ବଜାୟ ରଖିବା ପାଇଁ ନାଲକୋ ଏକ ଦୀର୍ଘ ମିଆଦି ବ୍ୟବସାୟିକ ଯୋଜନା ପ୍ରସ୍ତୁତ କରିଛି । ବ୍ୟୟ ହ୍ରାସ,ସଂପ୍ରସାରଣ ଓ ମୂଲ୍ୟ ସଂଯୁକ୍ତିକୁ ଭିତ୍ତିକରି ଏହି ଯୋଜନା ଆଗେଇବ । ସେହିପରି ଜିଏସଟି ଲାଗୁ ହେବାପରେ କେତେକ ଟିକସ କମିବା ଫଳରେ ନାଲକୋର ପ୍ରାୟ ୧୦୦ କୋଟି ଟଙ୍କା ଲାଭ ହୋଇଛି ବୋଲି ସେ କହିଛନ୍ତି । ୨ୟ ତିନି ମାସରେ ନାଲକୋ ନେଟ ଲାଭ ପ୍ରାୟ ୯୪ ପ୍ରତିଶତ ବୃଦ୍ଧି ପାଇଛି । ମୋଟ ବିକ୍ରି ମଧ୍ୟ ୩୦ ପ୍ରତିଶତ ବୃଦ୍ଧି ପାଇ ୪୧୭୯ କୋଟିରେ ପହଞ୍ଚିଛି ବୋଲି ସେ କହିଛନ୍ତି ।
ଏହି ଅବସରରେ ନାଲକୋ ପକ୍ଷରୁ ବର୍ଷିଆନ ସଂଗୀତଜ୍ଞ ପଦ୍ମଶ୍ରୀ ପ୍ରଫୁଲ୍ଲ କରଙ୍କୁ ଜୀବନବ୍ୟାପୀ ସାଧନା ପୁରସ୍କାର ଓ ଦେଶର କିମ୍ବଦନ୍ତି ବଂଶୀବାଦକ ହରିପ୍ରସାଦ ଚୌରାସିଆଙ୍କୁ ସମ୍ମାନିତ କରାଯାଇଥିଲା । ଏହାସହିତ ସମାଜର ବିଭିନ୍ନ କ୍ଷେତ୍ରରେ ସଫଳତା ହାସଲ କରିଥିବା ବ୍ୟକ୍ତିବିଶେଷଙ୍କୁ ପୁରସ୍କୃତ କରାଯାଇଥିଲା ।