ମୁମ୍ବାଇ: ନଭ୍ୟା ନଭେଲି ନନ୍ଦା ହେଉଛନ୍ତି ଟ୍ରାକ୍ଟର କମ୍ପାନି ଏସକର୍ଟସ କୁବୋଟା ଲିମିଟେଡର ସିଏମ୍‌ଡି ନିଖିଲ ନନ୍ଦାଙ୍କ ଝିଅ। ତେବେ ତାଙ୍କର ଆଉ ଏକ ପରିଚୟ ହେଲା ସେ ଅଭିନେତା ଅମିତାଭ ବଚ୍ଚନ ଏବଂ ଜୟା ବଚ୍ଚନଙ୍କ ନାତୁଣୀ। ତାଙ୍କ ବୋଉଙ୍କ ନାମ ହେଉଛି ଶ୍ବେତା ବଚ୍ଚନ ନନ୍ଦା। ପଡକାଷ୍ଟରେ ସେ ‌ଜୟା ବଚ୍ଚନ ଏବଂ ଶ୍ବେତା ବଚ୍ଚନ ଆଦିଙ୍କ ସହିତ ସବୁବେଳେ ଲୋକଲୋଚନରେ ଥିଲେ ମଧ୍ୟ ଏବେ ବାପା ନିଖିଲଙ୍କ ସହିତ ଏକ ଫଟୋ ସାମାଜିକ ଗଣମାଧ୍ୟମରେ ପୋଷ୍ଟ୍‌ କରିଛନ୍ତି ଯାହା ଚର୍ଚ୍ଚାର ବିଷୟ ପାଲଟିଛି। ଉକ୍ତ ଫଟୋରେ ସେ ମଧ୍ୟପ୍ରଦେଶରେ ଥିବା ତାଙ୍କ ଟ୍ରାକ୍ଟର କମ୍ପାନିର କାରଖାନା ପରିସରରେ ବୁଲୁଥିବା ଦେଖାଯାଇଛି।