ନୂଆ ରୂପରେ ରାସ୍ତାକୁ ଓହ୍ଲାଇବ ବଜାଜ୍ ଚେତକ : ପେଟ୍ରୋଲ ନୁହେଁ ବ୍ୟାଟେରିରେ ଚାଲିବ, ୭୦ହଜାର କିଲୋମିଟର ପରେ ବଦଳିବ ବ୍ୟାଟେରି
ମୁମ୍ବାଇ : ୧୪ ବର୍ଷର ବ୍ୟବଧାନ ପରେ ପୁଣି ରାସ୍ତାକୁ ଫେରୁଛି ଲୋକପ୍ରିୟ ସ୍କୁଟର ଚେତକ । ନୂଆ ଟେକ୍ନଲଜିରେ ତିଆରି ଚେତକ ବଜାରକୁ ପ୍ରବେଶ କରୁଛି । ପେଟ୍ରୋଲ ନୁହେଁ ବ୍ୟାଟେରି ଚାର୍ଜ କଲେ ଚାଲିବ ଚେତକ । ବଜାଜ କମ୍ପାନି ୧୪ ବର୍ଷ ପରେ ଚେତକର ଏହି ନୂଆ ସ୍କୁଟର ଇଲେକଟ୍ରିକ ଭର୍ସନର ବଜାରକୁ ଛାଡ଼ିଛନ୍ତି।
Sambad is now on WhatsApp
Join and get latest news updates delivered to you via WhatsApp
ମଙ୍ଗଳବାର ବଜାଜ କମ୍ପାନି ଚେତକ ଲଞ୍ଚ କରିଛି । ଏହାର ମୂଲ୍ୟ ୧ ଲକ୍ଷ ଟଙ୍କାରୁ ଅଧିକ ରହିଥିବା ବେଳେ ୧୫ ଜାନୁଆରିରୁ ଏହାର ବୁକିଂ ଆରମ୍ଭ ହେବ । ମାତ୍ର ୨ ହଜାର ଟଙ୍କା ଦେଇ କମ୍ପାନିର ୱେବସାଇଟରେ ଏହି ନୂଆ ମଡେଲର ବୁକିଂ କରିପାରିବେ ଗ୍ରାହକ । ପ୍ରଥମେ ପୁଣେରେ ଏହାର ବିକ୍ରି ଆରମ୍ଭ କରିବ କମ୍ପାନି । ଏହାପରେ ବାଙ୍ଗାଲୋର ସମେତ ଦେଶର ଅନ୍ୟ ସହରରେ ମଧ୍ୟ ଚେତକ ସ୍କୁଟର ଉପଲବ୍ଧ ହେବ ବୋଲି କମ୍ପାନି ପକ୍ଷରୁ କୁହାଯାଇଛି । ଉଭୟ ଅନଲାଇନ ଓ ଅଫଲାଇନ ମାଧ୍ୟମରେ ଗ୍ରାହକ ଚେତକ ସ୍କୁଟର ବୁକିଂ କରିପାରିବେ ।
ବଜାଜ ଚେତକ ଇଲେକଟ୍ରିକ ସ୍କୁଟର ଇକୋ ଓ ସ୍ପୋର୍ଟ ମଡେଲର ରହିଥିବା ବେଳେ ଇକୋ ମୋଡରେ ଏହା ୯୫ କିଲୋମିଟର ଓ ସ୍ପୋର୍ଟ ମୋଡରେ ଏହା ୮୫ କିଲୋମିଟର ଯାଇପାରିବ।ପେଟ୍ରୋଲ ପମ୍ପ ଆଉଟଷ୍ଟେସନ ଛଡା ଘରେ ମଧ୍ୟ ଏହାକୁ ଚାର୍ଜ କରାଯାଇପାରିବ । ୭୦ ହଜାର କିଲୋମିଟର ପର୍ଯ୍ୟନ୍ତ ଏହାର ପ୍ରଥମ ବ୍ୟାଟେରି କାର୍ଯ୍ୟ କରିବ । ବର୍ଷକୁ ଥରେ ମାତ୍ର କରିବାକୁ ପଡିବ ସର୍ଭିସିଂ । ତେବେ ୧୨ ହଜାରରୁ ଅଧିକ କିଲୋମିଟର ଯାତ୍ରା କଲେ ବର୍ଷକ ପୂର୍ବରୁ ସର୍ଭିସିଂ କରିବାକୁ ପଡିବ ।
୧୯୭୨ରେ ବଜାଜ ଚେତକ ଲଞ୍ଚ କରିଥିଲା । ପ୍ରାୟ ୩ ଦଶକ ଧରି ଭାରତୀୟ ବଜାରରେ ଦବଦବା ଦେଖାଇଥିଲା ଚେତକ । ତେବେ ବଜାରକୁ ବିଭିନ୍ନ କମ୍ପାନିର ନୂଆ ମଡେଲର ବାଇକ ଆସିବାରୁ ଚେତକର ଚାହିଦା କମିଥିଲା । ତେଣୁ ୨୦୦୬ରେ ଚେତକ ସ୍କୁଟର ବିକ୍ରି ବନ୍ଦ କରିଥିଲା ବଜାଜ କମ୍ପାନି । କାରଣ ଗତ କିଛି ବର୍ଷ ହେବ ବଜାଜ କମ୍ପାନି ବାଇକ ନିର୍ମାଣ ଉପରେ ଫୋକସ କରିଥିଲା । ଖାସକରି ବଜାଜର ପଲସର ମଡେଲ ବାଇକକୁ ଯୁବଗୋଷ୍ଠୀ ବେଶ ପସନ୍ଦ ମଧ୍ୟ କରିଥିଲେ । କିନ୍ତୁ ଏବେ ଇଲେକଟ୍ରିକ ସ୍କୁଟର ସହ ପୁଣିଥରେ ବଜାରରେ ପ୍ରବେଶ କରିଛି ବଜାଜ।