ଦିନେ ବୁଲିବୁଲି ପେପର ବାଣ୍ଟୁଥିଲେ, ଆଜି ଅଷ୍ଟ୍ରେଲିଆରେ ପ୍ରତିଷ୍ଠା କରିଛନ୍ତି କମ୍ପାନୀ
ନୂଆଦିଲ୍ଲୀ: କୁହାଯାଏ ପରିଶ୍ରମର ଫଳ ମିଠା ହୋଇଥାଏ, ଆଜି ଆମେ ଆପଣଙ୍କୁ ଏମିତି ଜଣେ ଯୁବକଙ୍କ ପରିଶ୍ରମର କାହାଣୀ କହିବୁ ଯାହାକି ଜଣଙ୍କୁ ପ୍ରେରଣା ଦେବ | ଉତ୍ତରପ୍ରଦେଶର ସାହାରଣପୁରର ଅମୀର କୁତୁବ ନିଜ ପରିଶ୍ରମ ଯୋଗୁଁ ଏବେ ଅଷ୍ଟ୍ରେଲିଆରେ ନିଜର କମ୍ପାନୀ ପ୍ରତିଷ୍ଠା କରିଛନ୍ତି ଆଉ ବର୍ଷକୁ ପ୍ରାୟ ୧୦ କୋଟି ଟଙ୍କା ରୋଜଗାର କରୁଛନ୍ତି | ଜଣେ ମେକାନିକାଲ ଇଂଜିନିୟରିଂ ଭାବେ ପାଠ ପଢିଥିବା ଅମୀର ଏବେ ଆର୍ଟିଫିସିଆଲ ଇଣ୍ଟେଲିଜେନ୍ସ ସମ୍ବଦ୍ଧିତ ଏକ କମାନୀ ଖୋଲିଛନ୍ତି | ଏହି କମ୍ପାନୀର ନାମ ସେ ଏଣ୍ଟରପ୍ରାଇଜ ମଙ୍କି ରଖିଛନ୍ତି |
Sambad is now on WhatsApp
Join and get latest news updates delivered to you via WhatsApp
କିଭଳି ଥିଲା ଆଲିଗଡରୁ ଅଷ୍ଟ୍ରେଲିଆର ଯାତ୍ରା
୨୦୦୮ ମସିହାରେ ମେକାନିକାଲ ଇଞ୍ଜିନିୟରିଂରେ ଶିକ୍ଷା ସମାପ୍ତ କରିବା ପରେ ସେ ହୋଣ୍ଡା କମ୍ପାନୀରେ କାମ କରିବା ଆରମ୍ଭ କରିଥିଲେ | ତେବେ ମେକାନିକାଲ ଇଂଜିନିୟରିଂ ପଢିଥିଲେ ବି କମ୍ପ୍ୟୁଟର ପ୍ରୋଗ୍ରାମିଙ୍ଗ ଓ ସୋସିଆଲ ନେଟୱର୍କିଙ୍ଗ ସାଇଟ ନିର୍ମାଣ ପାଇଁ ତାଙ୍କର ଅଦମ୍ୟ ଇଚ୍ଛା ଥିଲା | ଆଉ ହୋଣ୍ଡା କମ୍ପାନୀରେ ପ୍ରଡକ୍ସନ ଇଂଜିନିୟର ଭାବେ ଚାକିରୀ କରୁଥିଲେ ବି ଏହା ତାଙ୍କୁ ସନ୍ତୁଷ୍ଟି ଦେଇପାରିନଥିଲା | ୨୩ ବର୍ଷ ବୟସରେ ସେ ଚାକିରୀ ଛାଡିଦେଇଥିଲେ | ଆଉ ୱେବ ଡ଼ିଜାଇନିଂ କରିବାକୁ ନିଷ୍ପତ୍ତି ନେଇଥିଲେ | ତାଙ୍କର ଅଧିକାଂଶ କ୍ଲାଏଣ୍ଟ ଅଷ୍ଟ୍ରେଲିଆ ଓ ଲଣ୍ଡନର ଥିଲେ | ତେବେ ଅଷ୍ଟ୍ରେଲିଆର ଜଣେ କ୍ଲାଏଣ୍ଟ ତାଙ୍କୁ ସେଠାକୁ ଯିବାକୁ କହିଥିଲେ | ତେବେ ଅଷ୍ଟ୍ରେଲିଆ ଯିବା ପାଇଁ ପାଖରେ ଟଙ୍କା ନଥିଲା | ଅମୀର କହିଛନ୍ତି ଯେ ଆକାଶରେ ଉଡ଼ୁଥିବାବେଳେ ସେ ହିଁ ବିମାନ ଦେଖିଥିଲେ କିନ୍ତୁ କେବେ ବସିବେ ବୋଲି ଭାବିନଥିଲେ | ଆଉ ନିଜ ଭଉଣୀଙ୍କଠାରୁ ସାହାଯ୍ୟ ପାଇ ସେ ଅଷ୍ଟ୍ରେଲିଆ ଯାଇଥିଲେ |
ତେବେ ଅଷ୍ଟ୍ରେଲିଆରେ ଯେତେବେଳେ ପହଂଚିଥିଲେ ସେତେବେଳେ ପାଖରେ ଟଙ୍କା ନଥିଲା | ସେ ବିଭିନ୍ନ କମ୍ପାନୀରେ ଆବେଦନ କରିଥିଲେ ବି କେହି ତାଙ୍କୁ ମନୋନୀତ କରିନଥିଲେ | ଆଉ ବାଧ୍ୟ ହୋଇ ଅମୀର ବିମାନବନ୍ଦରରେ ସଫେଇ କର୍ମୀ ଭାବେ ଯୋଗ ଦେଇଥିଲେ | ଦିନରେ ସଫେଇ ସାଙ୍ଗକୁ ରାତି୨ଟାରୁ ସକାଳ ୭ଟା ଯାଏଁ ଅଷ୍ଟ୍ରେଲିଆରେ ଖବରକାଗଜ ବାଣ୍ଟିଥିଲେ |
ଶେଷରେ ଅମୀରଙ୍କୁ ଆଇସିଟି ଜିଲଙ୍ଗ ନାମକ କମ୍ପାନୀ ପକ୍ଷରୁ ତାଙ୍କୁ ଡାକରା ଆସିଥିଲା | ଆଉ ଦୁଇ ବର୍ଷ ମଧ୍ୟରେ ତାଙ୍କ କାମ ଦେଖି ଜେନେରାଲ ମ୍ୟାନେଜର ଭାବେ ପଦୋନ୍ନତି ମିଳିଥିଲା | ୨୦୧୪ ମସିହାରେ ସେ ନିଜ ଉଦ୍ୟମରେ ଏଣ୍ଟରପ୍ରାଇଜ ମଙ୍କି ଲିମିଟେଡ଼ ନାମକ କମ୍ପାନୀ ଆରମ୍ଭ କରିଥିଲେ | ଏହି କମ୍ପାନୀ ୱେବ ଓ ଆପ ଡେଭଲପମେଣ୍ଟ ପାଇଁ କାମ କରୁଥିବାବେଳେ ଆଜି ତାଙ୍କ କମ୍ପାନୀ ୪ଟି ଦେଶରେ କାମ କରୁଛି | ଆଉ ବର୍ଷକୁ ପ୍ରାୟ ୧୦ କୋଟି ଟଙ୍କାର ସେ ରୋଜଗାର ମଧ୍ୟ କରୁଛନ୍ତି |