ନୂଆଦିଲ୍ଲୀ : ଆମେରିକା ଓ ୟୁରୋପରେ ଏବେ ବ୍ୟାଙ୍କ ସଂକଟ ଦେଖାଦେଇଥିବାରୁ ତାହାକୁ ନେଇ ଭାରତରେ ବି ଚିନ୍ତା ପ୍ରକାଶ ପାଇଛି । ଉଭୟ କେନ୍ଦ୍ର ଅର୍ଥମନ୍ତ୍ରାଳୟ ଓ ରିଜର୍ଭ ବ୍ୟାଙ୍କ ସତର୍କ ହୋଇଉଠିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଶନିବାରଦିନ ବସିଥିବା ଏକ ଜରୁରୀ ବୈଠକରେ ନିଜର ବିଭିନ୍ନ ଆର୍ଥିକ ମାପଦଣ୍ଡର ସ୍ଥିତିକୁ ଆକଳନ କରିବାକୁ ରାଷ୍ଟ୍ରାୟତ୍ତ ବ୍ୟାଙ୍କଗୁଡ଼ିକୁ କହିଛନ୍ତି । ବୈଠକ ପରେ କେନ୍ଦ୍ର ଅର୍ଥ ମନ୍ତ୍ରଣାଳୟ ଏକ ବିବୃତିରେ କହିଛି ଯେ ବ୍ୟାଙ୍କମାନଙ୍କୁ ବିପଦ ସମ୍ପର୍କିତ ବିଭିନ୍ନ ବିନ୍ଦୁ ଚିହ୍ନଟ କରିବାକୁ କୁହାଯାଇଛି ।
ଏହି ଜରୁରୀ ବୈଠକ ପୂର୍ବରୁ ସରକାର ବ୍ୟାଙ୍କଗୁଡ଼ିକୁ ସେମାନଙ୍କର ବଣ୍ଡ ପୋର୍ଟଫୋଲିଓର ବିବରଣୀ ମାଗିଥିଲେ। ଯେକୌଣସି ସମ୍ଭାବ୍ୟ ଆର୍ଥିକ ଝଟକାରୁ ବ୍ୟାଙ୍କଗୁଡ଼ିକ ନିଜକୁ ରକ୍ଷା କରିବା ଉଚିତ ବୋଲି ଅର୍ଥମନ୍ତ୍ରୀ ବ୍ୟାଙ୍କରମାନଙ୍କୁ କହିଛନ୍ତି ।
ଏସଆଣ୍ଡପି ଗ୍ଲୋବାଲ ରେଟିଂସ ଚଳିତ ସପ୍ତାହରେ କହିଛି ଯେ ଭାରତୀୟ ଋଣଦାତାମାନେ ଆମେରିକାର ବ୍ୟାଙ୍କିଙ୍ଗ ଅସ୍ଥିରତା ରୁ ଉପୁଜିଥିବା କୌଣସି ସମ୍ଭାବ୍ୟ ସଂକ୍ରାମକ ପ୍ରଭାବକୁ ସହିବାକୁ ସକ୍ଷମ । ରେଟିଂ ଏଜେନ୍ସି କହିଛି, ସୁଦୃଢ଼ ପାଣ୍ଠି ପ୍ରୋଫାଇଲ, ଉଚ୍ଚ ସଞ୍ଚୟ ହାର ଏବଂ ସରକାରୀ ସହାୟତା ଆର୍ଥିକ ଅନୁଷ୍ଠାନଗୁଡ଼ିକୁ ସୁଦୃଢ଼ କରିଥାଏ ।
ଆମେରିକାରେ ସିଲିକନ ଭ୍ୟାଲି ବ୍ୟାଙ୍କ ଦେବାଳିଆ ହେବା ପରେ ସମଗ୍ର ବିଶ୍ବର ଆର୍ଥିକ ଜଗତରେ ଆତଙ୍କ ଖେଳିଯାଇଥିଲା । ଏହା ପରେ ଆମେରିକାର ଆଉ ୩ଟି ବ୍ୟାଙ୍କ ବିପଦରେ ପଡ଼ିଯାଇଥିଲେ । ପରେ ସ୍ବିଜରଲାଣ୍ଡର କ୍ରେଡିଟ ସୁଇସ ବି ସଂକଟରେ ପଡ଼ିଯାଇଥିଲା ।