ହଲ୍‌ମାର୍କ ହୋଇନଥିବା ଗହଣା ପରୀକ୍ଷା କରିହେବ

ନୂଆଦିଲ୍ଲୀ: ହଲମାର୍କ ହୋଇନଥିବା ଗହଣା ପାଖରେ ରଖିଥିବା ଗ୍ରାହକମାନେ ତାହାକୁ ନିକଟସ୍ଥ ଆସେଇଙ୍ଗ୍‌ ଓ ହଲମାର୍କିଂ ସେଣ୍ଟର୍‌ରେ ପରୀକ୍ଷା କରିପାରିବେ। ସାଧାରଣ ଲୋକମାନେ ଆଣୁଥିବା ଗହଣା ପରୀକ୍ଷା କରିବାକୁ ହଲମାର୍କିଂ ସେଣ୍ଟର୍‌ଗୁଡ଼ିକ ଅଗ୍ରାଧିକାର ଦେବେ ଏବଂ ସେମାନଙ୍କୁ ପରୀକ୍ଷା ରିପୋର୍ଟ ପ୍ରଦାନ କରିବେ। ଚାରିଟି ଗହଣା ପରୀକ୍ଷା କରିବା ପାଇଁ ଗ୍ରାହକଙ୍କୁ ୨୦୦ ଟଙ୍କା ଦେବାକୁ ପଡ଼ିବ। ପାଞ୍ଚରୁ ଅଧିକ ଗହଣା ପରୀକ୍ଷା କରାଇବାର ଥିଲେ ପ୍ରତି ଗହଣା ପାଇଁ ଗ୍ରାହକଙ୍କୁ ୪୫ ଟଙ୍କା ଲେଖାଐଁ ଦେବାକୁ ପଡ଼ିବ।

ହଲମାର୍କିଂ ସେଣ୍ଟର୍‌ରେ ମିଳିବ ସୁବିଧା
୪ଟି ଗହଣା ପାଇଁ ୨୦୦ ଟଙ୍କା ପଡ଼ିବ
୫ରୁ ଅଧିକ ହେଲେ ଗହଣା ପିଛା ୪୫ ଟଙ୍କା

ବ୍ୟୁରୋ ଅଫ୍ ଇଣ୍ଡିଆନ ଷ୍ଟାଣ୍ଡାର୍ଡ (ବିଆଇଏସ୍‌)ର ୱେବସାଇଟ୍‌ www.bis.gov.inରେ ସ୍ବୀକୃତିପ୍ରାପ୍ତ ହଲମାର୍କିଂ ସେଣ୍ଟର୍‌ଗୁଡ଼ିକର ତାଲିକା ରହିଛି। ଗ୍ରାହକମାନେ ସେହି ୱେବସାଇଟ୍ ପରିଦର୍ଶନ କରି ନିଜ ସହରରେ ଥିବା ହଲମାର୍କିଂ ସେଣ୍ଟର୍‌ଗୁଡ଼ିକ ବିଷୟରେ ଜାଣିପାରିବେ। ଯେଉଁ ଗ୍ରାହକମାନେ ସୁନା ଦୋକାନରୁ ହଲମାର୍କ ଗହଣା କିଣୁଛନ୍ତି ତାହା ପ୍ରକୃତରେ ହଲମାର୍କିଂ ହୋଇଛି ନା ନାହିଁ ତାହା ଜାଣିବା ଲାଗି ସେମାନେ ବିଆଇଏସ୍‌ କେୟାର (BIS CARE) ଆପ୍‌କୁ ବ୍ୟବହାର କରିପାରିବେ। ସେହି ଆପ୍‌ରେ ଥିବା ‘ଭେରିଫାଏ ଏଚ୍‌ୟୁଆଇଡି’କୁ ବ୍ୟବହାର କରି କିଣାଯାଇଥିବା ଗହଣାର ହଲମାର୍କିଂ ହୋଇଛି ନା ନାହିଁ ଜାଣିହେବ।

ଗହଣାରେ ଥିବା ଏଚ୍‌ୟୁଆଇଡି ନମ୍ବର ‌ଦାଖଲ କଲେ ତାହା ହଲମାର୍କିଂ ହୋଇଛି ନା ନାହିଁ ଜଣାପଡ଼ିବ। ଗ୍ରାହକମାନେ ‌ଗୁଗୁଲ୍ ପ୍ଲେ ଷ୍ଟୋର୍‌ରୁ ଏହି ଆପ୍‌କୁ ଡାଉନ୍‌ଲୋଡ୍ କରିପାରିବେ। କେନ୍ଦ୍ର ସରକାର ସୁନା ଗହଣାର ହଲମାର୍କିଂକୁ ବାଧ୍ୟତାମୂଳକ କରିଛନ୍ତି। ଏବେ ଦୈନିକ ୩ ଲକ୍ଷ ସୁନା ଗହଣାର ହଲମାର୍କିଂ ହେଉଛି।

ସମ୍ବନ୍ଧିତ ଖବର