୨୬ ବର୍ଷ ହେଲା ସଂଶୋଧନ ହୋଇନି ବ୍ୟାଙ୍କ କର୍ମଚାରୀଙ୍କ ପେନ୍ସନ୍
ନୂଆଦିଲ୍ଲୀ : ଦୀର୍ଘ ୨୬ ବର୍ଷ ହେଲା ବ୍ୟାଙ୍କ କର୍ମଚାରୀମାନଙ୍କ ପେନସନ୍ ସଂଶୋଧନ ହୋଇନାହିଁ। ଶେଷଥର ପାଇଁ ୧୯୯୩ ମସିହାରେ ବ୍ୟାଙ୍କ କର୍ମଚାରୀଙ୍କ ପେନସନ୍ ସଂଶୋଧନ ହୋଇଥିଲା। ବ୍ୟାଙ୍କ କମର୍ଚାରୀଙ୍କ ପାଇଁ ୧୯୯୩ ମସିହାରେ ସ୍ଥାପନ ହୋଇଥିବା ପେନସନ ପାଣ୍ଠିରେ କିନ୍ତୁ ଗଚ୍ଛିତ ରାଶି ବଢ଼ି ବଢ଼ି ଚାଲିଛି। ଏହି ରାଶି ଏବେ ୨.୪୦ ଲକ୍ଷ କୋଟିରେ ପହଞ୍ଚିଛି। କିନ୍ତୁ ଅନ୍ୟପକ୍ଷରେ ପେନସନ୍ ପାଣ୍ଠିରେ ଆବଶ୍ୟକ ଅର୍ଥ ନଥିବାରୁ ଅବସରପ୍ରାପ୍ତ କର୍ମଚାରୀଙ୍କ ପେନସନ୍ରେ ସଂଶୋଧନ ହେଉନାହିଁ ବୋଲି କୁହାଯାଉଛି। ତେବେ କର୍ମଚାରୀଙ୍କ ପେନସନକୁ ସଂଶୋଧନ କରାଯାଇ ଦୁଇଗୁଣ କରିବା ପାଇଁ ମଧ୍ୟ ପେନସନ୍ ପାଣ୍ଠିରେ ପର୍ଯ୍ୟାପ୍ତ ଅର୍ଥ ରହିଛି ବୋଲି ସୂଚନା ଅଧିକାର ଆଇନ ବଳରେ ନିଖିଳ କେରଳ ବ୍ୟାଙ୍କ ଅବସରପ୍ରାପ୍ତ କର୍ମଚାରୀ ସଂଘ ସୂଚନା ପାଇପାରିଛି।
Sambad is now on WhatsApp
Join and get latest news updates delivered to you via WhatsApp
୨୦୧୭-୧୮ରେ ପେନସନ ବାବଦରେ ମୋଟ ୧୪୮୦୦ କୋଟି ଟଙ୍କା ପ୍ରଦାନ କରାଯାଇଛି। କିନ୍ତୁ ଏହି ସମୟରେ ଉକ୍ତ ପାଣ୍ଠି ଉପରେ ୧୮୪୦୦ କୋଟି ଟଙ୍କାର ସୁଧ ଉପାର୍ଜନ ହୋଇଛି। ସୁଧ ବାବଦରେ ମିଳିଥିବା ୭୫ ପ୍ରତିଶତ ଅର୍ଥ ସବୁ କର୍ମଚାରୀଙ୍କ ପେନସନ ରାଶି ଦେବାକୁ ପର୍ଯ୍ୟାପ୍ତ ବୋଲି ଜଣାଯାଇଛି। ଦେଶରେ ଏବେ ୬.୯୧ ଲକ୍ଷ ପେନସନଭୋଗୀ ଥିବାବେଳେ ଏମାନଙ୍କ ମଧ୍ୟରୁ ୧.୨୦ ଲକ୍ଷ ପରିବାର ପେନସନ୍ଭୋଗୀ ରହିଛନ୍ତି। ସରକାରୀ ବ୍ୟାଙ୍କ କର୍ମଚାରୀଙ୍କ ବେତନ ୧୯୯୩ ମସିହାରୁ ଇତିମଧ୍ୟରେ ୫ ଥର ସଂଶୋଧନ ହୋଇଥିଲେ ମଧ୍ୟ ପେନସନଭୋଗୀଙ୍କ ପେନସନ ଥରେ ବି ସଂଶୋଧନ ହୋଇନାହିଁ। ତେବେ ଚଳିତବର୍ଷ ମାର୍ଚ୍ଚରେ ରିଜର୍ଭ ବ୍ୟାଙ୍କ କର୍ମଚାରୀଙ୍କ ପେନସନ ସଂଶୋଧନ ହୋଇଛି ବୋଲି ନିଖିଳ କେରଳ ବ୍ୟାଙ୍କ ଅବସରପ୍ରାପ୍ତ କର୍ମଚାରୀ ସଂଘର ଉପସଭାପତି କେ ଟି ବାବୁ କହିଛନ୍ତି। ବ୍ୟାଙ୍କ କର୍ତ୍ତୃପକ୍ଷଙ୍କୁ ପ୍ରତିବର୍ଷ କର୍ମଚାରୀଙ୍କ ପେନସନ ବାବଦରେ ଦରମାର ୧୦ ପ୍ରତିଶତ ଅର୍ଥ ଜମା ରଖିବାକୁ ପଡ଼ିଥାଏ। କିନ୍ତୁ ଗତ ଦୁଇ ବର୍ଷ ମଧ୍ୟରେ ୬ଟି ବ୍ୟାଙ୍କ ଏ ବାବଦରେ ଟଙ୍କାଟିଏ ଅର୍ଥ ମଧ୍ୟ ରଖିନାହାନ୍ତି। କେବଳ ସେତିକି ନୁହେଁ, ଏ ବାବଦ ଅର୍ଥକୁ ସେମାନେ ମଧ୍ୟ ସେମାନଙ୍କ ଆୟବ୍ୟୟ ଫର୍ଦ୍ଦରେ ଦର୍ଶାଇ ନାହାନ୍ତି। ଏପରିକି ଓରିଏଣ୍ଟାଲ ବ୍ୟାଙ୍କ ଅଫ କମର୍ସ ୨୦୧୭ରେ ୮୨୫ କୋଟି ଏବଂ ୨୦୧୮ରେ ୨୬୨୦ କୋଟି ଟଙ୍କା ଅନ୍ୟ ବାବଦରେ ଖର୍ଚ୍ଚ କରିଛନ୍ତି।
ପେନସନ ସଂଶୋଧନ ନହେବା କାରଣରୁ ବ୍ୟାଙ୍କର ଅବସରପ୍ରାପ୍ତ କର୍ମଚାରୀମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ୨୦୦୨ ମସିହାରେ ଅବସର ନେଇଥିବା ବ୍ୟାଙ୍କର ଜଣେ ସିଜିଏମ୍ ୨୦୧୮ ମସିହାରେ ଅବସର ନେଇଥିବା ଜଣେ କିରାଣିଙ୍କ ଠାରୁ କମ୍ ପେନସନ ପାଉଛନ୍ତି। ପରିବାର ପେନସନ ପାଉଥିବା ବ୍ୟକ୍ତିମାନେ ଅଧିକ ଅସୁବିଧାରେ ପଡ଼ୁଛନ୍ତି। ୧୯୯୩ ମସିହାରେ ଯେତେବେଳେ ପେନସନ ଆରମ୍ଭ ହେଲା ସେହି ସମୟରେ କର୍ମଚାରୀଙ୍କ ଅବସର ସମୟ ଦରମାର ୧୫ ପ୍ରତିଶତ ପେନସନ ମିଳିବ ବୋଲି ଧାର୍ଯ୍ୟ ହୋଇଛି। କିନ୍ତୁ କେନ୍ଦ୍ର ସରକାର କର୍ମଚାରୀଙ୍କୁ ଦରମାର ୫୦ ପ୍ରତିଶତ ପେନସନ ପ୍ରଦାନ କରୁଛନ୍ତି। ଚଳିତମାସ ୧୧ ତାରିଖରେ ଚେନ୍ନାଇ ହାଇକୋର୍ଟରେ ପେନସନ୍ ସଂଶୋଧନ ସଂପର୍କିତ ଏକ ମାମଲାର ଶୁଣାଣି ହୋଇଥିଲା। ଭାରତ ସରକାରଙ୍କ ପକ୍ଷରୁ ଆଟର୍ଣ୍ଣି ଜେନେରାଲ ମତ ରଖିଥିଲେ। ଆଟର୍ଣ୍ଣି ଜେନେରାଲ କହିଥିଲେ ବ୍ୟାଙ୍କର ଅବସରପ୍ରାପ୍ତ କର୍ମଚାରୀଙ୍କ ପେନସନ ସଂଶୋଧନ ପାଇଁ ସରକାର ଗୁରୁତ୍ବର ସହ ଚିନ୍ତା କରୁଛନ୍ତି। ଆଟର୍ଣ୍ଣି ଜେନେରାଲଙ୍କ ଏହି ମନ୍ତବ୍ୟ ପରେ ବ୍ୟାଙ୍କର ଅବସରପ୍ରାପ୍ତ କର୍ମଚାରୀମାନଙ୍କ ପେନସନ ସଂଶୋଧନ ଆଶା ଉଜ୍ଜୀବିତ ହୋଇଛି ବୋଲି ଏଆଇୟୁସିଓବିଆର୍ଏଫ୍, କୋଲକାତାର ଡେପୁଟି ଜେନେରାଲ ସେକ୍ରେଟାରି ଏଚ କେ ଅଗ୍ରୱାଲ କହିଛନ୍ତି।