ପରବର୍ତ୍ତୀ ଆଦେଶ ପର୍ଯ୍ୟନ୍ତ ନୂଆ କ୍ରେଡିଟ କାର୍ଡ ପ୍ରଦାନ ସ୍ଥଗିତ ରଖିବାକୁ ଏଚଡିଏଫସି ବ୍ୟାଙ୍କକୁ ରିଜର୍ଭ ବ୍ୟାଙ୍କର ନିର୍ଦ୍ଦେଶ
ମୁମ୍ବାଇ : ପରବର୍ତ୍ତୀ ଆଦେଶ ପର୍ଯ୍ୟନ୍ତ ନୂଆ କ୍ରେଡିଟ କାର୍ଡ ପ୍ରଦାନ ନ କରିବାକୁ ଭାରତୀୟ ରିଜର୍ଭ ବ୍ୟାଙ୍କ ଦେଶର ପ୍ରମୁଖ ଘରୋଇ ବ୍ୟାଙ୍କ ଏଚଡିଏଫସିକୁ ନିର୍ଦ୍ଦେଶ ଦେଇଛି । ଏହା ସହିତ ଡିଜିଟାଲ ୨.୦ କାର୍ଯ୍ୟକ୍ରମ ଅଧିନରେ ପ୍ରସ୍ତାବିତ ବିଭିନ୍ନ ସେବାଗୁଡ଼ିକୁ କିଛି ଦିନ ପାଇଁ ବନ୍ଦ ରଖିବାକୁ ରିଜର୍ଭ ବ୍ୟାଙ୍କ ପକ୍ଷରୁ ଗତ କାଲି ଜାରି ନିର୍ଦ୍ଦେଶରେ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗତ ନଭେମ୍ବର ୨୧ ସଂଧ୍ୟାରୁ ନଭେମ୍ବର ୨୨ ତାରିଖ ସକାଳ ପର୍ଯ୍ୟନ୍ତ ପ୍ରାୟ ୧୨ ଘଣ୍ଟା ଧରି ଏଚଡିଏଫସିର ଡିଜିଟାଲ ସେବା ଏକରକମ ଅଚଳ ହୋଇପଡ଼ିଥିଲା । ମୁଖ୍ୟ ଡାଟା ସେଣ୍ଡରରେ ବିଦ୍ୟୁତ ସରବରାହ ବନ୍ଦ ହେବାରୁ ଏହା ହୋଇଥିଲା ବୋଲି ବ୍ୟାଙ୍କ ପକ୍ଷରୁ କୁହାଯାଇଥିଲା । ତେବେ ଏହା ପରଦିନ ଅର୍ଥାତ ୨୩ ତାରିଖ ଦିନ ରିଜର୍ଭ ବ୍ୟାଙ୍କ ପକ୍ଷରୁ ଏଚଡିଏଫସି ବ୍ୟାଙ୍କକୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା ।
ନିଜର ଆଦେଶରେ ରିଜର୍ଭ ବ୍ୟାଙ୍କ ପକ୍ଷରୁ କୁହାଯାଇଛି ଯେ ଏହି ତ୍ରୁଟି ସଂପର୍କରେ ଏଚଡିଏଫସି ବ୍ୟାଙ୍କ ଯାଞ୍ଚ କରୁ ଓ ଏଥିପାଇଁ ଯିଏ ଦାୟୀ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଉ । ଏପରି ତ୍ରୁଟିଗୁଡ଼ିକୁ ସୁଧାରିବା ଦିଗରେ ସନ୍ତୋଷଜନକ ଭାବେ ପଦକ୍ଷେପ ନିଆଯିବା ପରେ ଏହି କଟକଣା ହଟାଯିବ ।