ଏବେ ଫିଚର ଫୋନ ମାଧ୍ୟମରେ ବି ପଠାଇହେବ ଟଙ୍କା, ରିଜର୍ଭ ବ୍ୟାଙ୍କ ଆରମ୍ଭ କଲା ‘ୟୁପିଆଇ୧୨୩ପେ’
ନୂଆଦିଲ୍ଲୀ : ଏଣିକି କେବଳ ସ୍ମାର୍ଟଫୋନ ନୁହେଁ, ଫିଚର ଫୋନ ମାଧ୍ୟମରେ ବି ଟଙ୍କା ପଠାଇ ହେବ । ଭାରତୀୟ ରିଜର୍ଭ ବ୍ୟାଙ୍କ ପକ୍ଷରୁ ଆଜି ଫିଚର ଫୋନ ଭିତ୍ତିକ ୟୁପିଆଇ ସେବା ‘ୟୁପିଆଇ୧୨୩ପେ’ ଆରମ୍ଭ କରାଯାଇଛି । ଏହି ନୂଆ ସେବାକୁ ରିଜର୍ଭ ବ୍ୟାଙ୍କ ଗଭର୍ଣ୍ଣର ଶକ୍ତିକାନ୍ତ ଦାସ ଲଞ୍ଚ୍ କରିଛନ୍ତି । ସେ ମଧ୍ୟ ଡିଜିଟାଲ ପେମେଣ୍ଟ୍ ପାଇଁ ନୂଆ ୨୪ ଘଣ୍ଟିଆ ସହାୟତା ସେବା ‘ଡିଜିସାଥି’ ଲଞ୍ଚ୍ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଫିଚର ଫୋନ ମାଧ୍ୟମରେ ୟୁପିଆଇ ସେବା ଆରମ୍ଭ କରିବା ସଂପର୍କରେ ରିଜର୍ଭ ବ୍ୟାଙ୍କ ପକ୍ଷରୁ ଗତ ଡିସେମ୍ବର ମାସରେ ଘୋଷିତ ଦ୍ବିମାସିକ ଋଣନୀତି ସମୀକ୍ଷା ବେଳେ ଘୋଷଣା କରାଯାଇଥିଲା । ଏହି ସେବା ଦ୍ବାରା ଦେଶର ପ୍ରାୟ ୪୦ କୋଟି ଫିଚର ଫୋନ ଉପଭୋକ୍ତା ଉପକୃତ ହେବେ ।
ଦେଶରେ ଗତ ୨୦୧୬ରୁ ୟୁପିଆଇ ସେବା ଆରମ୍ଭ ହୋଇଥିବାବେଳେ କେବଳ ସ୍ମାର୍ଟଫୋନରେ ଏହା ଉପଲବ୍ଧ ହୋଇପାରୁଥିଲା । କିନ୍ତୁ ଏବେ ଫିଚର ଫୋନରେ ବି ୟୁପିଆଇ ସେବା ବ୍ୟବହାର କରି ଟଙ୍କା ନେଣଦେଣ କରିହେବ । ଏପରିକି ଇଣ୍ଟରନେଟ୍ ବ୍ୟବସ୍ଥା ନଥିବା ଫିଚର ଫୋନରେ ବି ଏହି ସେବା ଉପଲବ୍ଧ ହେବ । ଏହି ସେବା ପାଇବାକୁ ହେଲେ ଫିଚର ଫୋନ ସହ ବ୍ୟାଙ୍କ ଖାତାକୁ ଲିଙ୍କ୍ କରିବାକୁ ହେବ । ତେବେ ଫିଚର ଫୋନରେ ସ୍କାନ ଏଣ୍ଡ ପେ ବ୍ୟବସ୍ଥା ଉପଲବ୍ଧ ହେବ ନାହିଁ ବୋଲି ଜଣାପଡ଼ିଛି ।