ସଂକଟରେ ଲକ୍ଷ୍ମୀ ବିଳାସ ବ୍ୟାଙ୍କ : ଏକ ମାସ ପାଇଁ ମୋରାଟୋରିୟମ୍ ଲାଗୁ କଲେ ସରକାର, ଜମାକାରୀ ସର୍ବାଧିକ ୨୫ ହଜାର ଟଙ୍କା ଉଠାଇପାରିବେ
ମୁମ୍ବାଇ : ଦେଶର ଏକ ପ୍ରମୁଖ ଘରୋଇ ବ୍ୟାଙ୍କ ଲକ୍ଷ୍ମୀ ବିଳାସ ବ୍ୟାଙ୍କ ଆର୍ଥିକ ସଂକଟ ମଧ୍ୟକୁ ଠେଲି ହୋଇଯାଇଛି । ଏହାକୁ ଦୃଷ୍ଟିରେ ରଖି କେନ୍ଦ୍ର ଅର୍ଥ ମନ୍ତ୍ରାଳୟ ମଙ୍ଗଳବାରଦିନ ଏହି ବ୍ୟାଙ୍କକୁ ଏକ ମାସ ପାଇଁ ମୋରାଟୋରିୟମ ମଧ୍ୟରେ ରଖିଛନ୍ତି । ଏହି ମୋରାଟୋରିୟମ ସମୟ ଆଜି ସଂଧ୍ୟା ୬ଟାରୁ ଡିସେମ୍ବର ୧୬ ପର୍ଯ୍ୟନ୍ତ ଲାଗୁ ରହିବ । ଏହା ସହିତ ଏହି ବ୍ୟାଙ୍କରୁ ନଗଦ ଉଠାଣ ସୀମାକୁ ୨୫ ହଜାର ମଧ୍ୟରେ ସୀମିତ ରଖାଯାଇଛି । ରିଜର୍ଭ ବ୍ୟାଙ୍କର ସୁପାରିସକ୍ରମେ କେନ୍ଦ୍ର ସରକାର ଏହି ନିଷ୍ପତ୍ତି ନେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୋଟିଏ ବ୍ୟାଙ୍କ ମୋରାଟୋରିୟମ ଅଧିନରେ ରହିବା ଅର୍ଥ ହେଉଛି ବ୍ୟାଙ୍କ ନିଜର ଜମାକାରୀଙ୍କୁ ରିଜର୍ଭ ବ୍ୟାଙ୍କର ଅନୁମତି ବିନା ନିର୍ଦ୍ଦିଷ୍ଟ ସୀମାଠାରୁ ଅଧିକ ପରିମାଣର ଉଠାଣ ରାଶି ପ୍ରଦାନ କରିପାରିବ ନାହିଁ । ଏହା ସହିତ ବ୍ୟାଙ୍କ ନୂଆ ଋଣ ମଂଜୁର କରିବା, କୌଣସି ଋଣକୁ ସଂପ୍ରସାରଣ କରିବା, ନୂଆ ନିବେଶ ଅଥବା କୌଣସି ପେମେଣ୍ଟ ପ୍ରଦାନ କରିପାରିବ ନାହିଁ ।
ଏହି ଘୋଷଣା କରିବାର କିଛି ସମୟ ପରେ ରିଜର୍ଭ ବ୍ୟାଙ୍କ ଲକ୍ଷ୍ମୀ ବିଳାସ ଓ ଡିବିଏସ ବ୍ୟାଙ୍କ ମଧ୍ୟରେ ମିଶ୍ରଣ ଲାଗି ଏକ ଯୋଜନା ଘୋଷଣା କରିଛନ୍ତି । ଏହି ଯୋଜନା ଅନୁସାର ଡିବିଏସ ଏହି ମିଶ୍ରିତ ବ୍ୟାଙ୍କରେ ୨୫୦୦ କୋଟି ନିବେଶ କରିବ ।
ଅନ୍ୟପକ୍ଷରେ ରିଜର୍ଭ ବ୍ୟାଙ୍କ ଲକ୍ଷ୍ମୀ ବିଳାସ ବ୍ୟାଙ୍କର ବୋର୍ଡ ଅଫ ଡାଇରେକ୍ଟର୍ସକୁ ଭାଙ୍ଗିଦେବା ସହ କାନାରା ବ୍ୟାଙ୍କର ପୂର୍ବତନ ଅଧ୍ୟକ୍ଷ ଟି.ଏନ. ମନୋହରନଙ୍କୁ ପ୍ରଶାସକ ନିଯୁକ୍ତ କରିଛନ୍ତି ।
ତେବେ ରିଜର୍ଭ ବ୍ୟାଙ୍କ ପକ୍ଷରୁ କୁହାଯାଇଛି ଯେ ଏହି ପଦକ୍ଷେପକୁ ନେଇ ବ୍ୟାଙ୍କର ଜମାକାରୀମାନେ ବିଚଳିତ ହେବା ଉଚିତ ନୁହେଁ, କାରଣ ସେମାନଙ୍କ ଜମା ସୁରକ୍ଷିତ ରହିବ ।