କୋଟାକ୍ ମହିନ୍ଦ୍ରା ବ୍ୟାଙ୍କ ବିରୋଧରେ ଆକ୍ସନ ନେଲା ଆରବିଆଇ

ନୂଆଦିଲ୍ଲୀ: ବ୍ୟାଙ୍କ ସେକ୍ଟର ନିୟାମକ ରିଜର୍ଭ ବ୍ୟାଙ୍କ ଅଫ ଇଣ୍ଡିଆ, କୋଟାକ୍ ମହିନ୍ଦ୍ରା ବ୍ୟାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଅନ୍ଲାଇନ୍ କିମ୍ବା ମୋବାଇଲ୍ ବ୍ୟାଙ୍କିଙ୍ଗ୍ ଚ୍ୟାନେଲ ମାଧ୍ୟମରେ କୋଟାକ୍ ମହିନ୍ଦ୍ରା ବ୍ୟାଙ୍କ ନୂତନ ଗ୍ରାହକ ଯୋଡିବାକୁ ଆରବିଆଇ ବାରଣ କରିଛି। ଏହା ବ୍ୟତୀତ ଆରବିଆଇ କୋଟାକ୍ ବ୍ୟାଙ୍କର ନୂତନ କ୍ରେଡିଟ୍ କାର୍ଡ ପ୍ରଦାନ ଉପରେ ପ୍ରତିବନ୍ଧକ ଲଗାଇବାକୁ ନିଷ୍ପତ୍ତି ନେଇଛି। ତେବେ ଆରବିଆଇ କହିଛି ଯେ କୋଟାକ୍ ମହିନ୍ଦ୍ରା ବ୍ୟାଙ୍କ ବର୍ତ୍ତମାନର ଗ୍ରାହକଙ୍କୁ କ୍ରେଡିଟ କାର୍ଡ ଗ୍ରାହକଙ୍କ ସମେତ ସମସ୍ତ ସେବା ଯୋଗାଇବ। ଆରବିଆଇ ଏକ ପ୍ରେସ ବିଜ୍ଞପ୍ତି ଜାରି କରି କହିଛି ଯେ ୨୦୨୨ ଏବଂ ୨୦୨୩ ପାଇଁ ଭାରତୀୟ ରିଜର୍ଭ ବ୍ୟାଙ୍କର ଆଇଟି ପରୀକ୍ଷାରେ ଧାର୍ଯ୍ୟ ସମୟ ମଧ୍ୟରେ ବ୍ୟାଙ୍କ ଏହି ସମସ୍ୟାର ସମାଧାନ କରିବାରେ ବିଫଳ ହୋଇଛି।

ଆରବିଆଇ କହିଛି ଯେ ଦୃଢ଼ ଆଇଟି ଭିତ୍ତିଭୂମି ଏବଂ ଆଇଟି ରିସ୍କ ପରିଚାଳନା ଢାଞ୍ଚାର ଅଭାବ ହେତୁ ଗତ ଦୁଇ ବର୍ଷ ମଧ୍ୟରେ ବ୍ୟାଙ୍କର ମୂଳ ବ୍ୟାଙ୍କିଂ ସିଷ୍ଟମ ଏବଂ ଏହାର ଅନଲାଇନ୍ ଓ ଡିଜିଟାଲ୍ ବ୍ୟାଙ୍କିଙ୍ଗ୍ ଚ୍ୟାନେଲଗୁଡିକ ବାରମ୍ବାର ଅଘଟଣର ସମ୍ମୁଖୀନ ହୋଇଛନ୍ତି। ଏପରିକି ଏପ୍ରିଲ୍ ୧୫, ୨୦୨୪ ରେ ସେବା ବନ୍ଦ ହୋଇଯାଇଥିଲା ଯେଉଁଥିପାଇଁ ବ୍ୟାଙ୍କ ଗ୍ରାହକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଥିଲା। ଆରବିଆଇ ଅନୁଯାୟୀ, କୋଟାକ୍ ମହିନ୍ଦ୍ରା ବ୍ୟାଙ୍କ ଏହାର ଅଭିବୃଦ୍ଧି ସହିତ ଏହାର ଆଇଟି ସିଷ୍ଟମ ଏବଂ ନିୟନ୍ତ୍ରଣକୁ କାର୍ଯ୍ୟକ୍ଷମ କରାଇବାରେ ବିଫଳ ହୋଇଛି।