ମୁମ୍ବାଇ : ଭାରତର ବୃହତ୍ତମ ବାଣିଜ୍ୟିକ ବ୍ୟାଙ୍କ ଷ୍ଟେଟ ବ୍ୟାଙ୍କ ସହ ଏହାର ୫ଟି ସହଯୋଗୀ ବ୍ୟାଙ୍କ ସହ ମିଶ୍ରଣ ହେବା ପରେ ଏହି ବ୍ୟାଙ୍କ ପକ୍ଷରୁ ପ୍ରାୟ ୧୩୦୦ଟି ବ୍ୟାଙ୍କ ଶାଖାର ନାଁ ଓ ସେଗୁଡିକର ଆଇଏଫ୍ଏସି (ଇଣ୍ଡିଆନ ଫାଇନାନ୍ସ ସିଷ୍ଟମ) କୋଡ୍ରେ ପରିବର୍ତ୍ତନ କରାଯାଇଛି । ଏସବୁ ଶାଖା ଦେଶର ପ୍ରମୁଖ ସହର ମୁମ୍ବଇ, ନୂଆଦିଲ୍ଲୀ, ବାଙ୍ଗାଲୋର, ଚେନ୍ନାଇ, ହାଇଦ୍ରାବାଦ, କୋଲକତା, ଲକ୍ଷ୍ନୌ ଆଦିରେ ଥିବା ଜଣାଯାଇଛି । ଖୁବଶୀଘ୍ର ଗ୍ରାହକମାନଙ୍କୁ ଏହି ପରିବର୍ତ୍ତନ ସମ୍ପର୍କରେ ସୂଚୀତ କରାଯିବ ବୋଲି ଷ୍ଟେଟ ବ୍ୟାଙ୍କର ରିଟେଲ ଓ ଡିଜିଟାଲ ବ୍ୟାଙ୍କିଙ୍ଗ୍ ଡିଭିଜନର ପରିଚାଳନା ନିର୍ଦ୍ଦେଶକ ପ୍ରବୀଣ ଗୁପ୍ତା କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ବ୍ୟାଙ୍କର କେତେକ ପୁରୁଣା ସହଯୋଗୀ ବ୍ୟାଙ୍କର ମିଶ୍ରଣ ହୋଇଛି, ଏଥିଲାଗି କେତେକ ଶାଖାର ଆଇଏଫ୍ଏସସି କୋଡ୍ରେ ପରିବର୍ତ୍ତନ ଆବଶ୍ୟକ ହେଉଛି । ଏ ସମ୍ପର୍କରେ ଗ୍ରାହକମାନଙ୍କୁ ସୂଚୀତ କରାଯାଉଛି, ଏବଂ ତାହା ସହିତ ବ୍ୟାଙ୍କ ମଧ୍ୟ ପୁୁରୁଣା କୋଡ୍ରୁ ନୂଆ କୋଡକୁ ମ୍ୟାପିଂ କରୁଛି । ଏହା ଫଳରେ ଜଣେ ଯଦି ପୁରୁଣା କୋଡ୍ ମାଧ୍ୟମରେ ଅର୍ଥ ପ୍ରେରଣ କରୁଛି ତାହା ଆପେ ଆପେ ନୂଆ କୋଡ୍ ରେ ପହଞ୍ଚିବ । ଅର୍ଥାତ୍ କିଛି ଅସୁବିଧା ହେବ ନାହିଁ ।
ଆଇଏଫ୍ଏସସି ହେଉଛି ନମ୍ବର ଓ ଅକ୍ଷର ଥିବା ଏକ ୧୧ ଟିକିଆ ନମ୍ବର ଯାହାକି ଗୋଟିଏ ବ୍ୟାଙ୍କ ଶାଖାର ଏକ ସ୍ୱତନ୍ତ୍ର ପରିଚୟ । ରିଜର୍ଭ ବ୍ୟାଙ୍କ ନିୟନ୍ତ୍ରଣାଧୀନ ଫଣ୍ଡ ଟ୍ରାନ୍ସଫର ବ୍ୟବସ୍ଥା ଯଥା ଆରଟିଜିଏସ, ଏନଇଏଫଟି ବା ଆଇଏମପିଏସ ମାଧ୍ୟମରେ ଅର୍ଥ ପ୍ରେରଣ କଲେ ଏହା ଆବଶ୍ୟକ ପଡେ ।
ଗତ ଏପ୍ରିଲ ମାସରେ ଷ୍ଟେଟ ବ୍ୟାଙ୍କ ସହ ତାହାର ୫ଟି ସହଯୋଗୀ ବ୍ୟାଙ୍କ ଷ୍ଟେଟ ବ୍ୟାଙ୍କ ଅଫ ବିକାନୀର ଓ ଜୟପୁର, ପାତିଆଲା, ଟ୍ରାଭାଙ୍କୋର, ହାଇଦ୍ରାବାଦ ଓ ମୌସୁରର ମିଶ୍ରଣ ହୋଇଥିଲା ।