ମୁମ୍ବାଇ: ଦେଶର ସବୁଠାରୁ ବଡ଼ ବ୍ୟବସାୟିକ ବ୍ୟାଙ୍କ ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ ପକ୍ଷରୁ ନିଜର ଗ୍ରାହକଙ୍କ ପାଇଁ ନୂଆ ବର୍ଷ ଭେଟି ଘୋଷଣା କରାଯାଇଛି । ବ୍ୟାଙ୍କ ପକ୍ଷରୁ ଆଜି ନିଜର ବେସ୍ ରେଟ୍ ପ୍ରାୟ ୩୦ ବେସିସ୍ ପଏଣ୍ଟ ବା ୦.୩ ପ୍ରତିଶତ ହ୍ରାସ କରିବା ବିଷୟ ଘୋଷଣା କରାଯାଇଛି । ଏହି ହ୍ରାସ ସହ ବ୍ୟାଙ୍କର ବେସ୍ରେଟ୍ ୮.୬୫ ପ୍ରତିଶତରେ ପହଞ୍ଚିଛି । ବେସ୍ ରେଟ୍ ହେଉଛି ବ୍ୟାଙ୍କମାନଙ୍କର ସର୍ବନିମ୍ନ ଋଣ ସୁଧହାର ଅର୍ଥାତ ଏହାଠାରୁ କମ ସୁଧହାରରେ ବ୍ୟାଙ୍କ ଋଣ ଦେଇପାରିବ ନାହିଁ । ବେସ ରେଟ୍ କମିଥିବାରୁ ଏସବିଆଇର ପ୍ରାୟ ୮୦ ଲକ୍ଷ ଋଣ ଗ୍ରହୀତା ଉପକୃତ ହେବେ । କାରଣ ଏହା ଦ୍ୱାରା ଋଣ ସୁଧହାର ହ୍ରାସ ପାଇବ ଓ ଇଏମଆଇ ହ୍ରାସ ପାଇବ । ଗତ ସେପ୍ଟେମ୍ବର ମାସରେ ଏସବିଆଇ ନିଜର ବେସ ରେଟ୍ ୫ ବେସିସ ପଏଣ୍ଟ କମାଇ ୯ ପ୍ରତିଶତରୁ ୮.୯୫ ପ୍ରତିଶତ କରିଥିଲା ।
Sambad is now on WhatsApp
Join and get latest news updates delivered to you via WhatsApp
ଏହା ସହିତ ବ୍ୟାଙ୍କ ନିଜର ବେଞ୍ଚମାର୍କ ପ୍ରାଇମ ଲେଣ୍ଡିଂ ରେଟ୍ (ବିପିଏଲଆର) ୧୩.୭୦ ପ୍ରତିଶତରୁ ୧୩.୪୦ ପ୍ରତିଶତକୁ ହ୍ରାସ କରିଛି । ଅନ୍ୟପକ୍ଷରେ ଷ୍ଟେଟବ୍ୟାଙ୍କ ପକ୍ଷରୁ ଗୃହଋଣ ଉପରେ ଛାଡ କରାଯାଇଥିବା ପ୍ରୋସେସିଂ ଫି ମିଆଦ କୁ ମାର୍ଚ୍ଚ ୩୧ ପର୍ଯ୍ୟନ୍ତ ବୃଦ୍ଧି କରାଯାଇଛି ।