ଡିସେମ୍ବର ସୁଦ୍ଧା ସେମିକଣ୍ଡକ୍ଟର ଉତ୍ପାଦନ: କୋରାପୁଟ, କେନ୍ଦୁଝରରେ ହେବ ଡାଟା ସେଣ୍ଟର

ଭୁବନେଶ୍ବର: ଚଳିତ ବର୍ଷ ଡିସେମ୍ବର ସୁଦ୍ଧା ରାଜ୍ୟ‌ରେ ସ୍ଥାପନ କରାଯାଉଥିବା ସେମିକଣ୍ଡକ୍ଟର କାରଖାନାରୁ ଉତ୍ପାଦନ ଆରମ୍ଭ ହେବ। ବିଧାନସଭାରେ ସୂଚନା ପ୍ରଯୁକ୍ତି ମନ୍ତ୍ରୀ ଡ. ମୁକେଶ ମହାଲିଙ୍ଗ ଏହି ସୂଚନା ଦେଇଛନ୍ତି। ଇନ୍‌ଫୋଭ୍ୟାଲିରେ ୨୦୦୦ ବର୍ଗଫୁଟରେ ଏହି କାରଖାନା ସ୍ଥାପନ କରାଯାଉଛି। ‌ସେ ଜଣାଇଛନ୍ତି ଯେ ଓଡ଼ିଶାକୁ ଏକ ପ୍ରମୁଖ ଆଇଟି ଓ ସେମିକଣ୍ଡକ୍ଟର ହବ୍‌ରେ ପରିଣତ କରିବାକୁ ରାଜ୍ୟ ସରକାର ଉଦ୍ୟମ କରୁଛନ୍ତି। ରାଜ୍ୟରେ ୩୦ଟି ଆଇଟି ପ୍ରକଳ୍ପ କାର୍ଯ୍ୟକାରୀ ହେବାକୁ ଯାଉଛି। ସେଥିରେ ୩୪,୩୨୧ ଜଣଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ। ପୁରୀରେ ଏକ କେବୁଲ ଲ୍ୟାଣ୍ଡିଂ ଷ୍ଟେସନ୍ ସ୍ଥାପନ କରାଯିବ। କୋରାପୁଟ ଓ କେନ୍ଦୁଝରରେ ଡାଟା ସେଣ୍ଟର ସ୍ଥାପନ କରିବା ଲାଗି ସରକାରଙ୍କ ଯୋଜନା ରହିଛି ବୋଲି ମନ୍ତ୍ରୀ ଡ. ମହାଲିଙ୍ଗ କହିଛନ୍ତି। 

କୋରାପୁଟ, କେନ୍ଦୁଝରରେ ହେବ ଡାଟା ସେଣ୍ଟର
୭୬୪ ପଞ୍ଚାୟତରେ ନାହିଁ ମୋବାଇଲ୍‌, ଇଣ୍ଟରନେଟ୍ ସେବା

ସେହିପରି, ମୋବାଇଲ୍‌ ଓ ଇଣ୍ଟରନେଟ୍ ସେବା ସମ୍ପର୍କିତ ଅନ୍ୟ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ଡ. ମହାଲିଙ୍ଗ କହିଛନ୍ତି ଯେ ରାଜ୍ୟର ୧୭୬ଟି ବ୍ଲକ୍‌ର ୭୬୪ଟି ଗ୍ରାମ ପଞ୍ଚାୟତରେ ଇଣ୍ଟରନେଟ୍‌ ଓ ମୋବାଇଲ୍‌ ସେବା ନାହିଁ। ‌ଏଭଳି ଅପହଞ୍ଚ ଅଞ୍ଚଳରେ ମୋବାଇଲ୍ ସେବା ପହଞ୍ଚାଇବା ଲାଗି ଡିଜିଟାଲ୍ ଭାରତ ନିଧି ଯୋଜନା ଅଧୀନରେ ରାଜ୍ୟ ସରକାର ୪୨୭୭ଟି ନୂଆ ମୋବାଇଲ୍‌ ଟାୱାର ବସାଇବା କାର୍ଯ୍ୟ ହାତକୁ ନେଇଛନ୍ତି। ମନ୍ତ୍ରୀ ଜଣାଇଛନ୍ତି ଯେ ଆକାଂକ୍ଷୀ ଜିଲ୍ଲା ଓ ନକ୍ସଲ ପ୍ରଭାବିତ ଅଞ୍ଚଳ-୨ ଓ ୪ଜି ସାଚୁରେସନ୍ ସ୍କିମ୍ ଅଧୀନରେ ବର୍ତ୍ତମାନ ସୁଦ୍ଧା ରାଜ୍ୟରେ ୨୦୮୫ ମୋବାଇଲ୍‌ ଟାୱାର ସ୍ଥାପନ କରାଯାଇଛି। ଚଳିତ ବର୍ଷ ଜୁନ୍ ସୁଦ୍ଧା ଆଉ ୨୧୯୨ଟି ମୋବାଇଲ୍‌ ଟାୱାର କାର୍ଯ୍ୟକ୍ଷମ ହେବ ବୋଲି ସେ କହିଛନ୍ତି।