୫ଜି ସ୍ପେକ୍ଟ୍ରମ ନିଲାମ : ୨ୟ ଦିନରେ ଆଉ ୪ ରାଉଣ୍ଡ ବିଡିଂ, ଏପର୍ଯ୍ୟନ୍ତ ସରକାର ପାଇଲେଣି ଦେଢ ଲକ୍ଷ କୋଟି
ନୂଆଦିଲ୍ଲୀ : ମଙ୍ଗଳବାରଠାରୁ ଆରମ୍ଭ ହୋଇଥିବା ୫-ଜି ସ୍ପେକ୍ଟ୍ରମ ନିଲାମ ବୁଧବାର ମଧ୍ୟ ଜାରି ରହିଥିଲା । ବୁଧବାର ଦିନ ମୋଟ ୪ ରାଉଣ୍ଡ ବିଡିଂ ହୋଇଥିଲା । ଏପର୍ଯ୍ୟନ୍ତ ଏସବୁ ନିଲାମରୁ ସରକାର ୧ ଲକ୍ଷ ୪୯ ହଜାର ୪୫୪ କୋଟି ପାଇସାରିଛନ୍ତି । ମଙ୍ଗଳବାର ପରି ବୁଧବାର ଦିନ ମଧ୍ୟ ସକାଳ ୧୦ଟାରୁ ଆରମ୍ଭ ହୋଇଥିବା ନିଲାମ ସଂଧ୍ୟା ୬ଟାରେ ଶେଷ ହୋଇଥିଲା । ଏହି ନିଲାମ ଗୁରୁବାର ବି ଜାରି ରହିବ ।
Sambad is now on WhatsApp
Join and get latest news updates delivered to you via WhatsApp
ଟେଲିକମ୍ ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି ଯେ, ୭୦୦ ମେଗାହଜ୍ ସ୍ପେକ୍ଟ୍ରମ ନିମନ୍ତେ ବିଡରଙ୍କ ଆଗ୍ରହକୁ ଦେଖି ସେ ଖୁସି । ଏହି ସ୍ପେକ୍ଟ୍ରମ ମାଧ୍ୟମରେ ଦୂରନ୍ତ ଇଲାକାରେ ଟେଲିକମ ସେବା ପହଂଚିପାରିବ ।
୫-ଜି ନିଲାମରେ ଦେଶର ପ୍ରମୁଖ ଟେଲିକମ କମ୍ପାନି ଜିଓ, ଏୟାରଟେଲ, ଭୋଡାଫୋନ ଆଇଡିଆ ଆଦି ଅଂଶଗ୍ରହଣ କରୁଛନ୍ତି । ସେହିପରି ପ୍ରଥମ ଥର ପାଇଁ ଅଦାନୀ ଗ୍ରୁପ ବି ଏହି ନିଲାମରେ ଅଂଶଗ୍ରହଣ କରୁଛି । ଅଦାନୀ ଗ୍ରୁପ ଅଧିନସ୍ଥ ନବଗଠିତ ଅଦାନୀ ଡାଟା ନେଟଓ୍ବାର୍କ୍ସ ଏଥିରେ ଅଂଶଗ୍ରହଣ କରୁଛି ।
ଏହି ନିଲାମ ମାଧ୍ୟମରେ ଦେଶର ପ୍ରମୁଖ ଶିଳ୍ପପତି ମୁକେଶ ଅମ୍ବାନି, ଗୌତମ ଅଦାନୀ, ସୁନୀଲ ମିତ୍ତଲ ପରସ୍ପର ସହ ପ୍ରତିଯୋଗିତାରେ ଅବତୀର୍ଣ୍ଣ ହୋଇଛନ୍ତି ।
ମଙ୍ଗଳବାର ଆରମ୍ଭ ହୋଇଥିବା ୫-ଜି ସ୍ପେକ୍ଟ୍ରମ ନିଲାମରେ ମୋଟ ୭୨ ଗିଗାହଜ୍ ସ୍ପେକ୍ଟ୍ରମ ନିଲାମ ହେବ । ଏସବୁ ନିଲାମର ମୋଟ ମୂଲ୍ୟ ପ୍ରାୟ ୪.୩ ଲକ୍ଷ କୋଟି ହେବା ଅଟକଳ କରାଯାଉଛି ।
ଗତ ଜୁନ ମାସରେ କେନ୍ଦ୍ର କ୍ୟାବିନେଟ ୫-ଜି ନିଲାମକୁ ମଂଜୁରୀ ଦେଇଥିଲା । ଏହା ପରେ ଜୁନ ୧୬ରେ ଏ ନେଇ ବିଜ୍ଞପ୍ତି ପ୍ରକାଶ ପାଇଥିଲା ।