ଭୁବନେଶ୍ୱର: ଷ୍ଟାର୍ଟଅପ୍ ଓଡ଼ିଶାର ପ୍ରମୁଖ ଅଭିଯାନ ଫଣ୍ଡ ଷ୍ଟାକ ୨.୦କୁ ରାଜ୍ୟ ଶିଳ୍ପ ମନ୍ତ୍ରୀ ପ୍ରତାପ କେଶରୀ ଦେବ ଉଦଘାଟନ କରିଛନ୍ତି । ଏହି କାର୍ଯ୍ୟକ୍ରମରେ ୧୦୦ ଷ୍ଟାର୍ଟଅପ ମଧ୍ୟରୁ ବଛାଯାଇଥିବା ୨୦ ଷ୍ଟାର୍ଟଅପ୍ ନିଜ ଚିନ୍ତାଧାରାକୁ ଆମନ୍ତ୍ରିତ ନିବେଶକମାନଙ୍କ ସମ୍ମୁଖରେ ଉପସ୍ଥାପନ କରିବାର ସୁଯୋଗ ପାଇଥିଲେ । ଏହି ଦୁଇଦିନିଆ କାର୍ଯ୍ୟକ୍ରମ ଭୁବନେଶ୍ୱର ଓ ପୁରୀରେ ଆୟୋଜିତ ହୋଇଥିଲା ।
Sambad is now on WhatsApp
Join and get latest news updates delivered to you via WhatsApp
ଏହି ଅସରରେ ଶିଳ୍ପ ମନ୍ତ୍ରୀ ଶ୍ରୀ ଦେବ ଯୁବପିଢ଼ିଙ୍କ ମଧ୍ୟରେ ଉଦ୍ୟମିତାର ସଂସ୍କୃତି ବିକାଶ କରିବା ଉପରେ ଜୋର ଦେଇଛନ୍ତି । ସେ କହିଛନ୍ତି ଷ୍ଟାର୍ଟଅପ୍ ଓ ନିବେଶକମାନଙ୍କ ମଧ୍ୟରେ ସମ୍ପର୍କ ସ୍ଥାପନ କରିବା ଲାଗି ଫଣ୍ଡଷ୍ଟାକ୍ ମଂଚ ପ୍ରଦାନ କରିବ । ରାଜ୍ୟରେ ଷ୍ଟାର୍ଟଅପ୍ ପରିବ୍ୟବସ୍ଥାକୁ ଆହୁରି ଆଗକୁ ବଢ଼ାଇବା ଲାଗି ସେ ଆମନ୍ତ୍ରିତ ନିବେଶକମାନଙ୍କଠାରୁ ପ୍ରସ୍ତାବ ଆହ୍ୱାନ କରିଥିଲେ ।
ଷ୍ଟାର୍ଟଅପ୍ ଓଡ଼ିଶାର କାର୍ଯ୍ୟନିର୍ବାହୀ ଅଧ୍ୟକ୍ଷ ଡକ୍ଟର ଓମକାର ରାଏ କହିଛନ୍ତି ଯେ ଫଣ୍ଡଷ୍ଟାକ୍ କେବଳ ଏକ ପ୍ଲାଟଫର୍ମ ନୁହେଁ ଯାହା ଷ୍ଟାର୍ଟଅପ୍ମାନଙ୍କ ପାଇଁ ନିବେଶ ସୁବିଧା ପ୍ରଦାନ କରିବ ବରଂ ଏହା ଦକ୍ଷତା ଗଠନ ଓ ନିବେଶ ପ୍ରସ୍ତୁତି ଲାଗି ମଂଚ ସାବ୍ୟସ୍ତ ହୋଇପାରିବ ଯାହା ଅଂଶଗ୍ରହଣକାରୀ ଷ୍ଟାର୍ଟଅପ୍ମାନଙ୍କୁ ଘରୋଇ ନିବେଶକମାନଙ୍କଠାରୁ ପାଣ୍ଠି ଯୋଗାଡ଼ କରିବାରେ ସହାୟକ ହେବ ଓ ସେମାନେ ନିଜ ସଂସ୍ଥାକୁ ଆଗକୁ ବଢ଼ାଇପାରିବେ ଓ ବ୍ୟବସାୟକୁ ବ୍ୟାପକ କରିପାରିବେ ।
ଏମ୍ଏସ୍ଏମ୍ଇ ବିଭାଗର ପ୍ରମୁଖ ସଚିବ ଶ୍ରୀମତୀ ରଂଜନା ଚୋପ୍ରା ରାଜ୍ୟର ପ୍ରଗତିଶୀଳ ଓ ନିବେଶକ ମିତବ୍ୟୟୀ ଷ୍ଟାର୍ଟଅପ୍ ବ୍ୟବସ୍ଥା ଉପରେ ଗୁରୁତ୍ୱାରୋପ କରିଥିଲେ । ଫଣ୍ଡ୍ଷ୍ଟାକ୍ ୨.୦ ହେଉଛି ଆଗାମୀ ଦିନରେ ହେବାକୁ ଥିବା ବୃହତ ନିବେଶକ ସମ୍ମିଳନୀ ମେକ୍ ଇନ୍ ଓଡ଼ିଶା ପାଇଁ ଷ୍ଟାର୍ଟଅପ୍ମାନଙ୍କୁ ଆଗକୁ ପ୍ରସ୍ତୁତ କରିବାର ଏକ କାର୍ଯ୍ୟକ୍ରମ ।
ଫଣ୍ଡଷ୍ଟାକ ପ୍ରଥମ ସଂସ୍କରଣକୁ ୨୦୨୧ରେ ଭର୍ଚୁଆଲ ମାଧ୍ୟମରେ ଆୟୋଜନ କରାଯାଇଥିଲା ଯେଉଁଠାରେ ୨୦ ପ୍ରମୁଖ ଆଞ୍ଜେଲ ନିବେଶକମାନଙ୍କଠାରୁ ୨୦୦ ଷ୍ଟାର୍ଟଅପ୍ ବ୍ୟବସାୟର ଗୁରୁତ୍ୱପୂର୍ଣ୍ଣ ଦିଗ ବିଷୟରେ ଜାଣିବାର ସୁଯୋଗ ପାଇଥିଲେ । ଚଳିତ ବର୍ଷ ଅଗଷ୍ଟ ୨୬ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଦ୍ୱିତୀୟ ସଂସ୍କରଣ ବିଷୟରେ ଘୋଷଣା କରିଥିଲେ । ଚଳିତ ବର୍ଷ ଏହି ଦୁଇ ଦିନିଆ ପିଚିଂ ଓ ନେଟୱର୍କିଂ କାର୍ଯ୍ୟକ୍ରମକୁ ନିବେଶକମାନଙ୍କ ଲାଗି ପୁଞ୍ଜିନିବେଶ ହାସଲ କରିବା ନିମନ୍ତେ ଆୟୋଜନ କରାଯାଇଛି । ଚଳିତ ବର୍ଷ ନଭେମ୍ବର ୩୦ରୁ ଡିସେମ୍ବର ୪ ପର୍ଯ୍ୟନ୍ତ ଆୟୋଜିତ ହେବାକୁ ଥିବା ମେକ୍ ଇନ୍ ଓଡ଼ିଶା କାର୍ଯ୍ୟକ୍ରମ ପାଇଁ ଏହାକୁ ଆଗୁଆ ଆୟୋଜନ କରାଯାଇଛି ।
ଷ୍ଟାର୍ଟଅପ ଓଡ଼ିଶାର ସିଇଓ ମହମ୍ମଦ ସାଦ୍ଦିକ ଆଲମ ସ୍ୱାଗତ ଭାଷଣ ଦେଇଥିବା ବେଳେ ଷ୍ଟାର୍ଟଅପ ଓଡ଼ିଶାର ଏଭାଞ୍ଜେଲିଷ୍ଟ ଡ. ସଂଯୁକ୍ତା ବଢ଼ାଇ ଓଡ଼ିଶା ଷ୍ଟାର୍ଟଅପ୍ ଗ୍ରୋଥ୍ ଫଣ୍ଡ୍ ଉପରେ ବିବରଣୀ ପ୍ରଦାନ କରିଥିଲେ ।