କରୋନା ମହାମାରୀ ଯୋଗୁଁ ରାଜ୍ୟମାନେ ୩ ଲକ୍ଷ କୋଟିର ରାଜସ୍ୱ ହାନୀ ସହିବେ
ନୂଆଦିଲ୍ଲୀ : ସାରାଦେଶକୁ କବଳିତ କରି ରଖିଥିବା କରୋନା ମହାମାରୀ ଯୋଗୁଁ ଦେଶର ଅର୍ଥନୀତି ଗୁରୁତରଭାବେ କ୍ଷତିଗ୍ରସ୍ତ ହୋଇଛି । ଲକଡାଉନ ଯୋଗୁଁ ବିଭିନ୍ନ ଶିଳ୍ପ ଓ ବ୍ୟବସାୟିକ ପ୍ରତିଷ୍ଠାନ ମାସ ମାସ ଧରି ବନ୍ଦ ରହିବା ଯୋଗୁଁ ଉଭୟ କେନ୍ଦ୍ର ଓ ରାଜ୍ୟ ସରକାରମାନଙ୍କ ବିପୁଳ ରାଜସ୍ୱ ହାନୀ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ଷ୍ଟେଟ ବ୍ୟାଙ୍କ ଦ୍ୱାରା ଜାରି ଏକ ରିପୋର୍ଟରେ କୁହାଯାଇଛି ଯେ ଚଳିତ ଆର୍ଥିକ ବର୍ଷରେ ରାଜ୍ୟ ସରକାରମାନେ ପ୍ରାୟ ୩.୧ ଲକ୍ଷ କୋଟି ଟଙ୍କାର ରାଜସ୍ୱ ହରାଇବେ । କେବଳ ପ୍ରଥମ ତିନିମାସରେ ରାଜ୍ୟମାନେ ମୋଟ ୫୩ ହଜାର କୋଟିର ରାଜସ୍ୱ ହରାଇଛନ୍ତି । ସେହିପରି କେନ୍ଦ୍ର ସରକାରଙ୍କ ଅତିରିକ୍ତ ରାଜସ୍ୱ ହାନୀ ଫଳରେ ରାଜ୍ୟମାନଙ୍କ ଭାଗ ମଧ୍ୟ ହ୍ରାସ ପାଇବ । ଏହା ଫଳରେ ରାଜ୍ୟମାନେ ଆଉ ୧.୫ ଲକ୍ଷ କୋଟିର କ୍ଷତି ସହିବେ । ଆହୁରି ମଧ୍ୟ କରୋନା ମୁକାବିଲା ପାଇଁ ରାଜ୍ୟ ସରକାରମାନେ ବିପୁଳ ପରିମାଣରେ ବ୍ୟୟ କରୁଛନ୍ତି । ଏକ ଅଟକଳ ଅନୁସାରେ ଏ ବାବଦରେ ରାଜ୍ୟମାନେ ମୋଟ ୧.୭ ଲକ୍ଷ କୋଟି ବ୍ୟୟ କରିବେ । ଫଳରେ ଚଳିତ ଆର୍ଥିକ ବର୍ଷରେ ଦେଶର ପ୍ରମୁଖ ରାଜ୍ୟମାନେ ମୋଟ ପ୍ରାୟ ୬.୨ ଲକ୍ଷ କୋଟିର ଆର୍ଥିକ କ୍ଷତି ସହିବେ । ଏହା ଫଳରେ ରାଜ୍ୟମାନେ ଉତ୍କଟ ଆର୍ଥିକ ସଂକଟର ସମ୍ମୁଖୀନ ହେବେ । ଏହି ଆର୍ଥିକ କ୍ଷତିର ଭରଣା ପାଇଁ ରାଜ୍ୟମାନେ ଅଧିକ ଋଣ କରିବେ ବୋଲି ରିପୋର୍ଟରେ କୁହାଯାଇଛି ।