୮୦ ବର୍ଷ ବୟସରେ ବି ଅବସର ଚାହାନ୍ତିନି ଆଇଆଇଟି ଛାତ୍ର ଥିବା ଏହି ସଫଳ ବ୍ୟକ୍ତି, ଜାଣନ୍ତୁ ସଫଳତାର ପୂରା କାହାଣୀ

ନୂଆଦିଲ୍ଳୀ: ଅଶୋକ ସୁଟା ଆଇଟି କ୍ଷେତ୍ରରେ ଏକ ଜଣାଶୁଣା ନାମ। ସେ ଆଜିମ ପ୍ରେମଜୀଙ୍କ ୱିପ୍ରୋରେ ଅଧ୍ୟକ୍ଷ ବି ଥିଲେ। ଅଶୋକ ଆଇଟି କମ୍ପାନି‌ରେ ୧୫ ବର୍ଷ ବିତାଇବା ପରେ ୧୯୯୯ ମସିହାରେ ମାଇଣ୍ଡଟ୍ରି ପ୍ରତିଷ୍ଠା କରିଥିଲେ। ତାହାକୁ ୨୦୧୯ ମସିହାରେ ଲାର୍ସନ୍ ଆଣ୍ଡ ଟୁବ୍ରୋ କିଣିନେଇଥିଲା।

ମାଇଣ୍ଡଟ୍ରି ବ୍ୟତୀତ ଅଶୋକ ସୋଟା ୨୦୧୧ରେ ‘ହାପିଏଷ୍ଟ ମାଇଣ୍ଡ ଟେକ୍ନୋଲୋଜି’ ମଧ୍ୟ ଆରମ୍ଭ କରିଥିଲେ। ୮୦ ବର୍ଷ ବୟସରେ ମଧ୍ୟ ସେ ଅବସର ନେବାକୁ ପ୍ରସ୍ତୁତ ନୁହନ୍ତି। ଗତ ବର୍ଷ ଅଶୋକ ସ୍ୱାସ୍ଥ୍ୟସେବା କ୍ଷେତ୍ରରେ ମଧ୍ୟ ଉଦ୍ୟମ କରିଥିଲେ। ଆସନ୍ତୁ, ଏଠାରେ ଆମେ ତାଙ୍କର ସମ୍ପୂର୍ଣ୍ଣ ଯାତ୍ରା ବିଷୟରେ ଆଲୋଚନା କରିବା।

ଅଶୋକ ସୋଟା ୧୨ ନଭେମ୍ବର ୧୯୪୨ ମସିହାରେ ପାକିସ୍ତାନର ଉତ୍ତର-ପଶ୍ଚିମ ସୀମାନ୍ତ ପ୍ରଦେଶରେ ଜନ୍ମଗ୍ରହଣ କରିଥିଲେ। ତାଙ୍କ ପିତା ବ୍ରିଟିଶ-ଭାରତୀୟ ସେନାରେ ଜଣେ ଡାକ୍ତର ଥିଲେ। ସୋଟା ତାଙ୍କ ପିଲାଦିନର କିଛି ବର୍ଷ ପାକିସ୍ତାନର ଉତ୍ତର-ପଶ୍ଚିମ ସୀମାନ୍ତ ପ୍ରଦେଶରେ ଅତିବାହିତ କରିଥିଲେ। ସେ ସମୁଦାୟ ୧୨ଟି ବିଦ୍ୟାଳୟରେ ଅଧ୍ୟୟନ କରିଛନ୍ତି।

ଲକ୍ଷ୍ନୌର ଲା ମାର୍ଟିନିଅରରୁ ସେ ତାଙ୍କର ଇଣ୍ଟର ସାଇନ୍ସ ଏବଂ ସିନିୟର କେମ୍ବ୍ରିଜ୍ ପାଠ ପୂରା କରିଥିଲେ। ଅଶୋକ ସୋଟା ୧୯୬୪ ମସିହାରେ ଆଇଆଇଟି ରୁରକିରୁ ଇଲେକ୍ଟ୍ରୋନିକ୍ସରେ ସ୍ନାତକ ଡିଗ୍ରୀ ହାସଲ କରିଥିଲେ। ୧୯୭୩ ମସିହାରେ ସୋଟା ଫିଲିପାଇନ୍ସର ରାଜଧାନୀ ମନିଲାସ୍ଥିତ ଏସୀୟ ଇନଷ୍ଟିଚ୍ୟୁଟ୍ ଅଫ୍ ମ୍ୟାନେଜମେଣ୍ଟରୁ ମାଷ୍ଟର ଅଫ୍ ବିଜିନେସ୍ ଆଡମିନିଷ୍ଟ୍ରେସନ୍ (ଏମ୍‌ବିଏ) ଅର୍ଜନ କରିଥିଲେ।

୧୯୬୫ ମସିହାରେ ଅଶୋକ ଶ୍ରୀରାମ ଗ୍ରୁପ୍ ଅଫ୍ ଇଣ୍ଡଷ୍ଟ୍ରିଜ୍ ସହିତ ନିଜର କ୍ୟାରିଅର୍ ଆରମ୍ଭ କରିଥିଲେ। ୧୯୮୪ ରୁ ୧୯୯୯ ମସିହା ପର୍ଯ୍ୟନ୍ତ ସେ ୱିପ୍ରୋ ଇନଫୋଟେକର ଅଧ୍ୟକ୍ଷ ଭାବେ କାର୍ଯ୍ୟ ତୁଲାଇଥିଲେ। ଅଜିମ ପ୍ରେମଜୀଙ୍କ ଏହି ଆଇଟି କମ୍ପାନିକୁ ଶିଖରକୁ ନେବାରେ ଅଶୋକ ଏକ ପ୍ରମୁଖ ଭୂମିକା ଗ୍ରହଣ କରିଥିଲେ।

୧୯୯୯ ମସିହାରେ ନଅ ଜଣ ପୂର୍ବତନ ୱିପ୍ରୋ କର୍ମଚାରୀଙ୍କ ସହ ମିଶି ମାଇଣ୍ଡଟ୍ରି ପ୍ରତିଷ୍ଠା କରିଥିଲେ ଅଶୋକ ସୋଟା। ଆଜି ଏହି କମ୍ପାନିରେ ହଜାର ହଜାର କର୍ମଚାରୀ କାମ କରନ୍ତି। ଭାରତ ବ୍ୟତୀତ ଏହାର ୟୁରୋପ, ଆମେରିକା ଏବଂ ଏସିଆରେ ଅନେକ କାର୍ଯ୍ୟାଳୟ ରହିଛି। ୧୯୯୨ ମସିହାରେ ଅଶୋକ ସୋଟାଙ୍କୁ ‘ଇଲେକ୍ଟ୍ରୋନିକ୍ସ ମ୍ୟାନ୍ ଅଫ୍ ଦି ଇୟର’ ପୁରସ୍କାର ପ୍ରଦାନ କରାଯାଇଥିଲା।