ସେମିତି ଗୁରୁତ୍ୱପୂର୍ଣ୍ଣ ମାମଲା ନୁହେଁ, ୨୦୦୦ ଟଙ୍କିଆ ମାମଲାକୁ ନେଇ ଶୁଣାଣି କରିବାକୁ ମନା କଲେ ସୁପ୍ରିମକୋର୍ଟ
ନୂଆଦିଲ୍ଲୀ: ବିନା ପରିଚୟପତ୍ରରେ ଲୋକମାନେ ନିଜ ପାଖରେ ଥିବା ୨୦୦୦ ଟଙ୍କିଆକୁ ବ୍ୟାଙ୍କରେ ବଦଳାଇ ଅନ୍ୟ ନୋଟ୍ ନେଇପାରିବେ। ଭାରତୀୟ ରିଜର୍ଭ ବ୍ୟାଙ୍କ ଏସଂକ୍ରାନ୍ତରେ ନେଇଥିବା ନିଷ୍ପତ୍ତିକୁ ଚ୍ୟାଲେଞ୍ଜ୍ କରି ଆବେଦନ ହୋଇଥିବା ଏକ ମାମଲାକୁ ତୁରନ୍ତ ଶୁଣାଣି କରିବାକୁ ସୁପ୍ରିମକୋର୍ଟ ମନା କରି ଦେଇଛନ୍ତି। କୋର୍ଟ କହିଛନ୍ତି ଯେ ଏହା ସେମିତି ଏକ ମାମଲା ନୁହେଁ ଯାହା ତୁରନ୍ତ ଶୁଣାଣି ହେବା ଆବଶ୍ୟକ। ଗ୍ରୀଷ୍ମ ଛୁଟି ପରେ ଆବେଦନକାରୀ ପ୍ରଧାନ ବିଚାରପତିଙ୍କଠାରୁ ଶୁଣାଣି ପାଇଁ ଅନୁରୋଧ କରିବା ଉଚିତ୍। ଏହାପୂର୍ବରୁ ଦିଲ୍ଲୀ ହାଇକୋର୍ଟ ଏହି ଆବେଦନକୁ ପ୍ରତ୍ୟାଖ୍ୟାନ କରିଥିଲେ। ଏହାକୁ ଚ୍ୟାଲେଞ୍ଜ କରି ଆବେଦନକାରୀମାନେ ସୁପ୍ରିମକୋର୍ଟରେ ପହଞ୍ଚିଥିଲେ । ଆବେଦନକାରୀ ଓକିଲ ଅଶ୍ୱିନୀ ଉପାଧ୍ୟାୟ କହିଛନ୍ତି ଯେ ଟଙ୍କା ବଦଳାଉଥିବା ବ୍ୟକ୍ତିଙ୍କ ପରିଚୟ ଯାଞ୍ଚ ନକରି ନୋଟ୍ ବଦଳାଇବା ଦ୍ୱାରା ଦୁର୍ନୀତିଗ୍ରସ୍ତ ଲୋକମାନେ ଉପକୃତ ହେଉଛନ୍ତି। ମେ ୨୯ରେ, ଦିଲ୍ଲୀ ହାଇକୋର୍ଟ ଏହି ଆବେଦନକୁ ଖାରଜ କରିଦେଇଥିଲେ |
Sambad is now on WhatsApp
Join and get latest news updates delivered to you via WhatsApp
ବାସ୍ତବରେ ସୁପ୍ରିମକୋର୍ଟର ଜଷ୍ଟିସ୍ ସୁଧାଂଶୁ ଧୁଲିଆ ଏବଂ କେ.ଭି ବିଶ୍ୱନାଥନଙ୍କ ଖଣ୍ଡପୀଠରେ ଆବେଦନକାରୀ କହିଥିଲେ ଯେ ବିନା ପରିଚୟପତ୍ରରେ ଲୋକମାନେ ନିଜ ପାଖରେ ଥିବା ୨୦୦୦ ଟଙ୍କିଆକୁ ବ୍ୟାଙ୍କରେ ବଦଳାଇ ଅନ୍ୟ ନୋଟ୍ ନେଇପାରିବେ ଭଳି ନିଷ୍ପତ୍ତି ନେବା ରିଜର୍ଭ ବ୍ୟାଙ୍କର ନିଷ୍ପତ୍ତି ମନମୁଖୀ ବିଚାରଧାରାକୁ ସୂଚାଉଛି । ଏହାକୁ ଅନୁମୋଦନ କରି ହାଇକୋର୍ଟ ଭୁଲ କରିଛନ୍ତି। କିନ୍ତୁ ଉପାଧ୍ୟାୟଙ୍କ ଆବେଦନକୁ ତୁରନ୍ତ ବିଚାରପତିମାନେ ଶୁଣିବାକୁ ମନା କରି ଦେଇଛନ୍ତି।
ଏହି ଆବେଦନରେ କୁହାଯାଇଛି ଯେ ୩ ଲକ୍ଷ କୋଟି ଟଙ୍କାରୁ ଅଧିକ ମୂଲ୍ୟର ୨,୦୦୦ ନୋଟ ଦୁର୍ନୀତିଗ୍ରସ୍ତ, ମାଫିଆଙ୍କ ପାଖରେ ଥିବାର ସନ୍ଦେହ କରାଯାଉଛି | ଏପରି ପରିସ୍ଥିତିରେ, ପରିଚୟ ପତ୍ର ନ ଦେଖାଇ ନୋଟ୍ ବଦଳାଇବା ନିଷ୍ପତ୍ତି ଯୋଗୁଁ ଏମାନେ ଉପକୃତ ହେଉଛନ୍ତି | ଆବେଦନକାରୀ କହିଛନ୍ତି ଯେ ଆଜି ଭାରତରେ ଏପରି ପରିବାର ନାହିଁ, ଯାହାର ବ୍ୟାଙ୍କ ଆକାଉଣ୍ଟ ନାହିଁ। ତେଣୁ ୨୦୦୦ ଟଙ୍କା ନୋଟ୍ ସିଧାସଳଖ ବ୍ୟାଙ୍କ ଆକାଉଣ୍ଟରେ ଜମା ହେବା ଉଚିତ୍ | ଏହା ମଧ୍ୟ ନିଶ୍ଚିତ ହେବା ଉଚିତ ଯେ ଜଣେ ବ୍ୟକ୍ତି କେବଳ ନିଜ ଆକାଉଣ୍ଟରେ ନୋଟ୍ ଜମା କରିପାରିବେ ଏବଂ ଅନ୍ୟର ଆକାଉଣ୍ଟରେ ନୁହେଁ |