ଜଷ୍ଟ୍ ଡାଏଲ୍ ଅଧିଗ୍ରହଣକୁ ନେଇ ଚିନ୍ତାରେ ଟାଟା
ମୁମ୍ବାଇ: ମୁକେଶ ଅମ୍ବାନିଙ୍କ କଂପାନି ରିଲାଏନ୍ସ ରିଟେଲ୍ ପକ୍ଷରୁ ଜଷ୍ଟ୍ ଡାଏଲ୍ର ସିଂହ ଭାଗ ଅଂଶଧନକୁ ୩୪୯୭ କୋଟି ଟଙ୍କାରେ କିଣାଯାଇଛି। ଜଷ୍ଟ୍ ଡାଏଲ୍ର ୪୦.୯୫% ଅଂଶଧନକୁ ଏହା ହାସଲ କରିଛି। ପରବର୍ତ୍ତୀ ସମୟରେ ଏହା ଆଉ ୨୬% ଅଂଶଧନ କିଣିବା ଲାଗି କଂପାନି ଓପନ୍ ଅଫର ଦେବ। ତେବେ ରିଲାଏନ୍ସ ରିଟେଲ ଜଷ୍ଟ୍ ଡାଏଲକୁ ଅଧିଗ୍ରହଣ ଏଭଳି ସମୟରେ କରିଛି ଯେତେବେଳେ ଟାଟା ଗ୍ରୁପ୍ ଚଳିତ ବର୍ଷ ଶେଷ ସୁଦ୍ଧା ଏହାର ଡିଜିଟାଲ୍ ବ୍ୟବସାୟକୁ ବଢାଇବା ପାଇଁ ସୁପର ଆପ୍ ଲଞ୍ଚ କରିବାକୁ ଯାଉଛି | ସମାନ ସମ୍ପ୍ରସାରଣ ଯୋଜନା ରଖି ଟାଟା ଡିଜିଟାଲ୍ ମଧ୍ୟ ଜଷ୍ଟ୍ ଡାଏଲକୁ ହାସଲ କରିବାକୁ ଚେଷ୍ଟା କରିଥିଲା କିନ୍ତୁ ଏହା ସମ୍ଭବ ହୋଇପାରି ନଥିଲା |
Sambad is now on WhatsApp
Join and get latest news updates delivered to you via WhatsApp
ଅବଶ୍ୟ, ଏହା ପରେ ଟାଟା ଗୋଟିଏ ପରେ ଗୋଟିଏ ଅନେକ ଷ୍ଟାର୍ଟଅପରେ ବିନିଯୋଗ କରି ଖୁଚୁରା ବ୍ୟବସାୟକୁ ମଜବୁତ କରିବା ଦିଗରେ ପଦକ୍ଷେପ ନେଇଛି | ତେବେ ଜଷ୍ଟ ଡାଏଲରେ ବିନିଯୋଗ କରିପାରିନଥିବାରୁ ଟାଟା ଗ୍ରୁପ ଅପେକ୍ଷା ରିଲାଏନ୍ସ ଏହାର ଫାଇଦା ନେଇପାରେ ବୋଲି କୁହାଯାଉଛି | ଜଷ୍ଟ୍ ଡାଏଲ୍କୁ ଅଧିଗ୍ରହଣ କରି ରିଲାଏନ୍ସ ଏହାର ଡାଟାବେସକୁ ମଜବୁତ କରିଛି |
ଜଷ୍ଟ ଡାଏଲ୍ ଏହାର ପ୍ଲାଟଫର୍ମରେ ଲକ୍ଷ ଲକ୍ଷ ଉତ୍ପାଦକୁ ବିସ୍ତାର କରିବାରେ କାର୍ଯ୍ୟ କରିବ, ଯାହାଦ୍ୱାରା କାରବାରକୁ ପ୍ରୋତ୍ସାହନ ମିଳିବ | ୩୧ ମାର୍ଚ୍ଚ ୨୦୨୧ ସୁଦ୍ଧା, ଜଷ୍ଟ୍ ଡାଏଲ୍ ଏହାର ଡାଟାବେସରେ ୩୦.୪ ମିଲିୟନଙ୍କୁ ଯୋଡିଥିଲା | ଏବଂ ତ୍ରୈମାସିକରେ ୧୨୯.୧ ମିଲିୟନ୍ ଉପଭୋକ୍ତା ଜଷ୍ଟ୍ ଡାଏଲ୍ ପ୍ଲାଟଫର୍ମ ବ୍ୟବହାର କରୁଥିଲେ |