ନୂଆଦିଲ୍ଲୀ : ଟେସଲାକୁ ଭାରତକୁ ସ୍ବାଗତ । କିନ୍ତୁ ଏହି କମ୍ପାନି ଯଦି ଚୀନରେ କାର ନିର୍ମାଣ କରି ଭାରତରେ ବିକିବାକୁ ଚାହୁଁଛି ତେବେ ତାହା ଠିକ ନୁହେଁ ବୋଲି କେନ୍ଦ୍ର ପରିବହନ ମନ୍ତ୍ରୀ ନିତିନ ଗଡ଼କରି କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏକ ଜାତୀୟ ସ୍ତରର ଗଣମାଧ୍ୟମକୁ ସାକ୍ଷାତକାର ଦେଇ ସେ କହିଛନ୍ତି ଯେ, ଟେସଲାକୁ ଭାରତକୁ ସ୍ବାଗତ, କିନ୍ତୁ ଚୀନରେ ନିର୍ମାଣ କରି ଭାରତରେ ବିକିବା କଥା ଠିକ ଭାବେ ହଜମ ହେଉନାହିଁ ।
ଟେସଲା ଭାରତକୁ ଆସିଲେ ଆମର କିଛି ସମସ୍ୟା ନାହିଁ । ଭାରତ ବିଶ୍ବର ଏକ ବୃହତ୍ ଅଟୋମୋବାଇଲ ବଜାର । ଏଠାରେ ବିଏମଡବ୍ଲୁ, ମର୍ସିଡିଜ, ହ୍ୟୁଣ୍ଡାଇ, ଭୋଲଭୋ, ସୁଜୁକୀ,ହୋଣ୍ଡା ପରି ବିଶ୍ବର ନାମୀ ଅଟୋମୋବାଇଲ ବ୍ରାଣ୍ଡ ଅଛନ୍ତି । ଏହାର ବାର୍ଷିକ ଟର୍ଣ୍ଣଓଭର ପ୍ରାୟ ସାଢେ ୭ ଲକ୍ଷ କୋଟି ଟଙ୍କା । ଏଣୁ ଏହା ଏକ ବଡ଼ ବଜାର ।
ଏଲନ ମସ୍କଙ୍କ ଯୋଜନା ହେଉଛି ଚୀନରେ ଉତ୍ପାଦନ କରି ଭାରତରେ ବିକିବା । ଆମେ ତାଙ୍କୁ ଅନୁରୋଧ କରୁଛୁ କି ଭାରତରେ ସବୁ ସୁବିଧା ରହିଛି, ଏଠାରେ ସେ ଉତ୍ପାଦନ କରନ୍ତୁ ।
ସୂଚନାଯୋଗ୍ୟ ଯେ, ଟେସଲା ସଂପୂର୍ଣ୍ଣ ବିଦେଶରେ ନିର୍ମିତ କାର ଭାରତକୁ ଆମଦାନୀ କରିବାକୁ ଚାହୁଁଛି । ଏଥିପାଇଁ ୧୦୦ ପ୍ରତିଶତ ଟିକସ ରିହାତି ଚାହୁଁଛି । କିନ୍ତୁ ସରକାରଙ୍କ ନୀତି ଅନୁସାରେ ବିଦେଶରେ ଆଂଶିକ ନିର୍ମିତ ଇଲେକ୍ଟ୍ରିକ କାର ଆମଦାନୀ କରି ଭାରତରେ ଆସେମ୍ବଲ କରିବା ଉପରେ ଟିକସ ରିହାତି ଦିଆଯାଉଛି ।