ନୂଆଦିଲ୍ଲୀ: କରୋନା ପ୍ରଭାବିତ ଭାରତୀୟ ଅର୍ଥନୀତିକୁ ସୁଧାରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନିଜର ବରିଷ୍ଠ ସହଯୋଗୀ ମନ୍ତ୍ରୀମାନଙ୍କ ସହିତ ଆଲୋଚନା କରିଛନ୍ତି। ବିଶେଷକରି ବିଦେଶୀ ନିବେଶକମାନଙ୍କୁ କିଭଳି ଦେଶକୁ ଆକୃଷ୍ଟ କରାଯାଇ ପାରିବ ଏବଂ ଘରୋଇ ନିବେଶକମାନଙ୍କୁ କିଭଳି ସବୁ ପ୍ରକାର ସୁବିଧା ସୁଯୋଗ ଯୋଗାଇ ଦିଆଯାଇ ପାରିବ ତାହା ଉପରେ ବୈଠକରେ ପ୍ରଧାନମନ୍ତ୍ରୀ ଗୁରୁତ୍ବାରୋପ କରିଛନ୍ତି। ସଂସ୍କାର ଆଗକୁ ବଢ଼ାଇବା ଏବଂ ମଞ୍ଜୁରି ପ୍ରକ୍ରିୟା ତ୍ବରାନ୍ବିତ କରିବା ଉପରେ ସେ ଗୁରୁତ୍ବ ଦେଇଛନ୍ତି। ଆଜିର ବୈଠକରେ ଗୃହମନ୍ତ୍ରୀ ଅମିତ୍ ଶାହ, ଅର୍ଥମନ୍ତ୍ରୀ ନିର୍ମଳା ସୀତାରମଣ ଏବଂ ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପୀୟୂଷ ଗୋୟଲ ପ୍ରମୁଖ ଉପସ୍ଥିତ ଥିଲେ।