୮୮୧ କୋଟି ଏଲ୍‌ଆଇସି ବୀମା ରାଶିର ଦାବିଦାର ନାହାନ୍ତି: ପଲିସି ପରିପକ୍ବ ହୋଇ ପଡ଼ିରହିଛି

ନୂଆଦିଲ୍ଲୀ: ଭାରତୀୟ ଜୀବନ ବୀମା ନିଗମ (ଏଲ୍‌ଆଇସି)ରେ ୮୮୦.୯୩ କୋଟି ଟଙ୍କାର ପଲିସି ପରିପକ୍ବ ରାଶିର କେହି ଦାବିଦାର ନାହାନ୍ତି। ୨୦୨୩-୨୪ରେ କମ୍ପାନିର ୩,୭୨,୨୮୨ ଗ୍ରାହକଙ୍କ ପଲିସି ପରିପକ୍ବ ‌ହୋଇଥିଲେ ସୁଦ୍ଧା, ସେହି ରାଶି ପାଇବାକୁ ଗ୍ରାହକମାନେ ଦାବି ଉପସ୍ଥାପନ କରିନାହାନ୍ତି ବୋଲି ସଂସଦରେ ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ସୂଚନା ଦେଇଛନ୍ତି। ୨୦୨୨-୨୩ ଆର୍ଥିକ ବର୍ଷରେ ୩,୭୩,୩୨୯ ପରିପକ୍ବ ପଲିସିରେ ଥିବା ୮୧୫.୦୪ କୋଟି ଟଙ୍କା ପାଇବାକୁ କେହି ଦାବି କରିନଥିଲେ।

ସେହିପରି ଗତ ଆର୍ଥିକ ବର୍ଷରେ ୧୪ ଲକ୍ଷ ଟଙ୍କାର୧୦ଟି ମୃତ୍ୟୁକାଳୀନ ଦାବିର ଫଇସଲା ହୋଇପାରିନଥିଲା। ଦାବିଦାର ନଥିବା ପଲିସିଗୁଡ଼ିକରେ ପଞ୍ଜୀକୃତ ଥିବା ଠିକଣା ଓ ଯୋଗାଯୋଗ ନମ୍ବରରେ କମ୍ପାନି ପକ୍ଷରୁ ବୀମା ରାଶି ପାଇବା ଲାଗି ଦାବି କରିବାକୁ ବାରମ୍ବାର ସୂଚିତ କରାଯାଉଛି। ଦାବି ସମାଧାନ ପ୍ରକ୍ରିୟାର ସରଳୀକରଣ କରାଯାଇଛି। ସେଥିପାଇଁ କେବଳ ବୈଧ ଏନ୍‌ଇଏଫ୍‌ଟି ଦରକାର ହେଉଛି। କେବଳ ଏଲ୍‌ଆଇସି ନୁହେଁ ଦେଶରେ ବିଭିନ୍ନ ବ୍ୟାଙ୍କ ଓ ଡାକଘରେ ମଧ୍ୟ କୋଟି କୋଟି ଟଙ୍କା ପଡ଼ିରହିଛି ଯାହାର କେହି ଦାବିଦାର ନାହାନ୍ତି। ବ୍ୟାଙ୍କରେ ଥିବା ‌େସଭଳି ଟଙ୍କାକୁ ପ୍ରକୃତ ହିତାଧିକାରୀଙ୍କ ନିକଟରେ ପହଞ୍ଚାଇବା ଲାଗି ଉଦ୍ୟମ କରିବାକୁ ରିଜର୍ଭ ବ୍ୟାଙ୍କ ପକ୍ଷରୁ ବ୍ୟାଙ୍କଗୁଡ଼ିକୁ କୁହାଯାଇଛି।