ନୂଆଦିଲ୍ଲୀ: ୨୦୨୫-୨୬ ବଜେଟ୍‌ରେ ଦର୍ଶାଯାଇଛି ଯେ, ମଧ୍ୟବିତ୍ତଙ୍କ ବ୍ୟୟଶକ୍ତି ବୃଦ୍ଧି ପାଇଁ ଭାରତ ବ୍ୟକ୍ତିଗତ ଆୟକର ହାର ହ୍ରାସ କରିବା ସହ  ଅଭିବୃଦ୍ଧିକୁ ସୁଦୃଢ଼ କରିବା ପାଇଁ ଘରୋଇ ପୁଞ୍ଜିନିବେଶ ବୃଦ୍ଧି କରିବାକୁ ଚାହୁଛି। ସହରାଞ୍ଚଳ ଚାହିଦା ଓ  ଘରୋଇ ପୁଞ୍ଜିନିବେଶରେ ବଡ଼ ପରିବର୍ତ୍ତନର ଲକ୍ଷ୍ୟ ଏହି ବଜେଟ୍‌ରେ ରହିଛି।  ଆସନ୍ତା ବର୍ଷ ୪ ବର୍ଷ ମଧ୍ୟରେ ଅଭିବୃଦ୍ଧି ବଢ଼ାଇବାକୁ ବ୍ୟାପକ ପ୍ରୟାସ କରାଯାଇଛି।  ୨୦୨୫-୨୬ରୁ କେନ୍ଦ୍ର ‌ବଜେଟ୍ ଉପରେ ବିଭିନ୍ନ ଶିଳ୍ପପତି, ବିଶେଷଜ୍ଞ, ପାଣ୍ଠି ପରିଚାଳକ ଓ ଅର୍ଥନୀତିଜ୍ଞଙ୍କ ପ୍ରତିକ୍ରିୟା ନିମ୍ନରେ ଦିଆଗଲା।
ଖ୍ରୀଷ୍ଟିଆନ ଡି ଗୁଜମାନ୍, ମୁଡିଜ୍ ରେଟିଂର ବରିଷ୍ଠ ଉପାଧ୍ୟକ୍ଷ
ଟିକସ ହ୍ରାସ ପଦକ୍ଷେପ ଯୋଗୁ ରାଜସ୍ୱ ସଂଗ୍ରହ ହ୍ରାସ ପାଇବ, ଯାହା ୨୦୨୨-୨୩ ପରଠାରୁ ସର୍ବନିମ୍ନ ଗତିରେ ବୃଦ୍ଧି ପାଇବ। ତେଣୁ ପୁଞ୍ଜି ବ୍ୟୟ ଜିଡିପିର ଅଂଶ ଭାବରେ ହ୍ରାସ ପାଇବା ଫଳରେ ବିତ୍ତୀୟ ନିଅଣ୍ଟ ହ୍ରାସ ପାଇବ। ତଥାପି ଆମେ ଋଣ ବୋଝ କିମ୍ବା ଋଣ ପରିଶୋଧ ପାଇଁ ଧାର୍ଯ୍ୟ ବଜେଟ୍‌ର ଅନୁପାତରେ ଯଥେଷ୍ଟ ଉନ୍ନତି ଆଶା କରୁନାହୁଁ ଏବଂ ଭାରତର ଆର୍ଥିକ ଶକ୍ତି ଏହାର ଅଧିକାଂଶ ନିବେଶ-ଗ୍ରେଡ୍ ସମକକ୍ଷଙ୍କ ତୁଳନାରେ ଦୁର୍ବଳ ରହିବ।
କମଲ ବାଲି, ଭାରତରେ ଭଲ୍‌ଭୋ ଗ୍ରୁପ୍‌ର ସଭାପତି ଓ ସିଇଓ
ମୁଁ ଅନୁଭବ କରୁଛି ଯେ ପ୍ରାୟ ୨୫-୩୦ ନିୟୁତ ବ୍ୟକ୍ତିଗତ ଟିକସଦାତା ବାର୍ଷିକ ପ୍ରାୟ ୧,୦୦,୦୦୦ ଟଙ୍କା (୧,୧୫୫.୫୯ ଡଲାର) ସଞ୍ଚୟ କରିବେ। ଏହାଦ୍ୱାରା ଗାଡି କିଣିବା ଭଳି ସ୍ବେଚ୍ଛାକୃତ ପୁଞ୍ଜି ଖର୍ଚ୍ଚ ବୃଦ୍ଧି ପାଇବ। ଟିକସଦାତାଙ୍କ ପାଖରେ ଇଏମ୍‌ଆଇ ପାଇଁ ଭଲ ପରିଶୋଧ କ୍ଷମତା ରହିବ।
ଆପୋଲୋ ହସ୍ପିଟାଲର କାର୍ଯ୍ୟନିର୍ବାହୀ ଉପାଧ୍ୟକ୍ଷ ପ୍ରୀତି ରେଡ୍ଡୀ
ଆଗାମୀ ୩ ବର୍ଷ ମଧ୍ୟରେ ସମସ୍ତ ଜିଲ୍ଲା ଡାକ୍ତରଖାନାରେ ଡେ କେୟାର କ୍ୟାନସର ସେଣ୍ଟର ଘୋଷଣା କରାଯିବା ସହିତ ଭାରତ ବିଶେଷ କରି ଅବହେଳିତ ଅଞ୍ଚଳରେ ଗୁଣାତ୍ମକ କର୍କଟ ଚିକିତ୍ସାର ଉପଲବ୍ଧତା ବୃଦ୍ଧି ପାଇଁ ଏକ ନିର୍ଣ୍ଣାୟକ ପଦକ୍ଷେପ ନେଇଛି। ୩୬ଟି ଜୀବନ ରକ୍ଷାକାରୀ କର୍କଟ ଔଷଧକୁ ସୀମାଶୁଳ୍କରୁ ମୁକ୍ତ କରାଯିବା ଦ୍ୱାରା ରୋଗୀଙ୍କ ଉପରେ ଆର୍ଥିକ ଚାପ ହ୍ରାସ ପାଇବ। 
ଟାଟା ମୋଟର୍ସର କାର୍ଯ୍ୟନିର୍ବାହୀ ନିର୍ଦ୍ଦେଶକ ଗିରୀଶ ବାଘ
ବ୍ୟାଟେରି ଉତ୍ପାଦନ ପାଇଁ ପ୍ରମୁଖ ସାମଗ୍ରୀ ଉପରେ ମୌଳିକ ସୀମାଶୁଳ୍କ ହଟାଇବା ଘରୋଇ ଇଭି ଉତ୍ପାଦନକୁ ପ୍ରୋତ୍ସାହିତ କରିବା ସହ ଏକ ସ୍ଥାୟୀ ଇକୋସିଷ୍ଟମକୁ ପ୍ରୋତ୍ସାହିତ କରିବ। ଏହା ଏକ ସବୁଜ ଅର୍ଥନୀତିକୁ ପ୍ରୋତ୍ସାହିତ କରିବା ପାଇଁ ଏକ ରଣନୈତିକ ପଦକ୍ଷେପ। 
ଆଦାନୀ ୱିଲମାରର ଏମ୍‌ଡି ଓ ସିଇଓ ଅଂଶୁ ମଲ୍ଲିକ
କେନ୍ଦ୍ର ବଜେଟ୍ ୨୦୨୫ ଭାରତର କୃଷି ଇକୋସିଷ୍ଟମକୁ ସୁଦୃଢ଼ କରିବା ପାଇଁ ଏକ ଦୃଢ଼ ପ୍ରତିବଦ୍ଧତାକୁ ପ୍ରତିଫଳିତ କରୁଛି, ଯେଉଁଥିରେ ଉତ୍ପାଦକତା ବୃଦ୍ଧି, ଫସଲ ବିବିଧତାକୁ ପ୍ରୋତ୍ସାହନ ଓ ଅମଳ ପରବର୍ତ୍ତୀ ଭିତ୍ତିଭୂମିରେ ଉନ୍ନତି ଆଣିବ। ବିଶେଷକରି ମଧ୍ୟବିତ୍ତଙ୍କ ପାଇଁ ଟିକସ ରିହାତି ଏକ ସକାରାତ୍ମକ ପଦକ୍ଷେପ ଯାହା କ୍ରୟଶକ୍ତିକୁ ସୁଦୃଢ଼ କରିବ ଓ ଗୁଣାତ୍ମକ ଖାଦ୍ୟ ଉତ୍ପାଦର ଚାହିଦା ବଢ଼ାଇବ। 
 ଭାରତୀୟ ଶିଳ୍ପ ମହାସଂଘର ସଭାପତି ସଞ୍ଜୀବ ପୁରୀ
ମଧ୍ୟବିତ୍ତଙ୍କୁ ଯେଉଁ ଗୁରୁତ୍ୱପୂର୍ଣ୍ଣ ରିଲିଫ୍ ପ୍ରଦାନ କରାଯାଇଛି ତାହା ଅତ୍ୟନ୍ତ ସ୍ୱାଗତଯୋଗ୍ୟ। ମୋଟାମୋଟି ଭାବେ ଏହା ଅର୍ଥନୀତିର ସମସ୍ତ ଅଂଶୀଦାରଙ୍କୁ ଫାଇଦା ଦେବ ଏବଂ ଏକ ସକାରାତ୍ମକ ବଜେଟ୍।
କୃଷ୍ଣପ୍ରସାଦ ଚିଗୁରୁପତି, ଗ୍ରାନ୍ୟୁଲ୍ସ ଇଣ୍ଡିଆର ଅଧ୍ୟକ୍ଷ ଓ ଏମ୍‌ଡି
୩୬ଟି ଜୀବନ ରକ୍ଷାକାରୀ ଔଷଧକୁ ମୌଳିକ ସୀମାଶୁଳ୍କରୁ ମୁକ୍ତ କରିବା ଏବଂ ୬ଟି ଅତ୍ୟାବଶ୍ୟକ ଔଷଧକୁ ରିହାତି ୫% ଶୁଳ୍କରେ ସାମିଲ କରିବା ଦ୍ୱାରା ଗୁରୁତ୍ୱପୂର୍ଣ୍ଣ ଚିକିତ୍ସା ଉପଲବ୍ଧ ହେବ।  
ଅମିତ ପଇଠାଙ୍କର, ସିଇଓ, ୱାରୀ ଏନର୍ଜି
ଜାତୀୟ ଉତ୍ପାଦନ ମିସନର ଘୋଷଣା ସହିତ ପିଏଲ୍‌ଆଇ (ଉତ୍ପାଦନଭିତ୍ତିକ ପ୍ରୋତ୍ସାହନ) ଯୋଜନା ବୃଦ୍ଧି ଓ ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ ପାଇଁ ଶୁଳ୍କ ଯୁକ୍ତିଯୁକ୍ତୀକରଣ ସମଗ୍ର ଅକ୍ଷୟ ଶକ୍ତି ଇକୋସିଷ୍ଟମ୍‌ର ଦ୍ରୁତ ଅଭିବୃଦ୍ଧିରେ ସହାୟକ ହେବ। ଲିଥିୟମ୍-ଆୟନ ବ୍ୟାଟେରି ଉତ୍ପାଦନ ପାଇଁ କୋବାଲ୍ଟ ଓ ଲିଥିୟମ୍ ଭଳି ପ୍ରମୁଖ କଞ୍ଚାମାଲ ଉପରୁ ଶୁଳ୍କ ଛାଡ଼ ହେବା ଦ୍ୱାରା ଇଭି ଓ ସୌର ଶିଳ୍ପକୁ ଆଗକୁ ବଢ଼ିପାରିବ।
ଅନିଶ ଶାହା, ମହୀନ୍ଦ୍ରା ଆଣ୍ଡ୍ ମହିନ୍ଦ୍ରାର ଏମ୍‌ଡି ଓ ସିଇଓ
ଚାହିଦା ବୃଦ୍ଧି ପାଇଁ ଯେଉଁ ପ୍ରୋତ୍ସାହନ ଦିଆଯାଇଛି ତାହା ସକାରାତ୍ମକ ଓ ସ୍ବାଗତଯୋଗ୍ୟ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ବ୍ୟବସାୟ କରିବାରେ ସହଜତା, ପୁଞ୍ଜି ସାମଗ୍ରୀ ଆମଦାନି ଉପରେ ଗୁରୁତ୍ୱ ଦେବା ସହ ଓଲଟା ଶୁଳ୍କ ଢାଞ୍ଚା ସମସ୍ୟାର ସମାଧାନ କରାଯାଇଛି। ଏହା ଭାରତରେ ଉତ୍ପାଦନ ବୃଦ୍ଧି କରିବା ସହ ଉତ୍ପାଦନ ଖର୍ଚ୍ଚ ହ୍ରାସ କରିବ। 
ମାରୁତି ସୁଜୁକିର ଅଧ୍ୟକ୍ଷ ଆର୍‌ସି ଭାର୍ଗବ
ବିଭିନ୍ନ ପ୍ରକାର ଉପଭୋକ୍ତା ଉତ୍ପାଦର ଚାହିଦାକୁ ତ୍ୱରାନ୍ୱିତ କରିବାରେ ଟିକସ ହ୍ରାସ ଏକ ସହାୟକ କାରକ ହେବାକୁ ଯାଉଛି।
ଗୌରବ ଦୁଆ, ବରିଷ୍ଠ ଉପାଧ୍ୟକ୍ଷ ତଥା ମିରେ ଆସେଟ୍ ସେୟାରଖାନର ପୁଞ୍ଜି ବଜାର ରଣନୀତି ମୁଖ୍ୟ
ଭିତ୍ତିଭୂମି ବିକାଶ ପାଇଁ ସରକାରୀ ପୁଞ୍ଜି ଆବଶ୍ୟକ। ୨୦୨୪-୨୫ ଆର୍ଥିକ ବର୍ଷରେ କେନ୍ଦ୍ର ସରକାରଙ୍କ ୧୧ ଟ୍ରିଲିୟନ ଟଙ୍କାର ଆବଣ୍ଟନ ପୂରଣ କରିବାରେ ବିଫଳ ହୋଇଛନ୍ତି। ପ୍ରତିରକ୍ଷା କ୍ଷେତ୍ରରେ ଆବଣ୍ଟନ ହ୍ରାସ ସହିତ ଆସନ୍ତା ବର୍ଷ ପାଇଁ ଆବଣ୍ଟନ ମାତ୍ର ୧୧ ଲକ୍ଷ କୋଟି ଟଙ୍କା ରହିଛି। ଏଥିରୁ ସ୍ପଷ୍ଟ ଯେ, ଉପଭୋକ୍ତା ବୃଦ୍ଧି ଓ ସମାଜର ଦୁର୍ବଳ ବର୍ଗଙ୍କୁ ଆଶ୍ୱସ୍ତି ଦେବା ପାଇଁ ନିଆଯାଇଥିବା ପଦକ୍ଷେପ ପୁଞ୍ଜି ଆବଣ୍ଟନ ପାଇଁ ସରକାରଙ୍କ ପାଖରେ ଖୁବ୍ କମ୍ ସୁଯୋଗ ଛାଡ଼ିଛି।
ଧ୍ରୁବ ଅଗ୍ରୱାଲା, ଗ୍ରୁପ୍ ସିଇଓ, ହାଉସିଂ.କମ୍ ଓ ପ୍ରପଟାଇଗର.କମ୍
କେନ୍ଦ୍ର ବଜେଟ୍ ୨୦୨୫ରେ ରିଅଲ ଇଷ୍ଟେଟ୍ କ୍ଷେତ୍ରକୁ ସୁଦୃଢ଼ କରିବା ଓ ଘର ମାଲିକାନାକୁ ଅଧିକ ସୁଲଭ କରିବା ଉଦ୍ଦେଶ୍ୟରେ ପରିବର୍ତନମୂଳକ ପଦକ୍ଷେପ ଗ୍ରହଣ କରାଯାଇଛି। ମଧ୍ୟବିତ୍ତଙ୍କ ପାଇଁ ଟିକସ ରିହାତି ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହାଦ୍ୱାରା ଗୃହ ଚାହିଦା ଓ ସାମଗ୍ରିକ ଅର୍ଥନୈତିକ ଅଭିବୃଦ୍ଧି ବୃଦ୍ଧି ପାଇବ।
ଅନୁଜ ପୁରୀ, ଅଧ୍ୟକ୍ଷ, ଆନାରକ୍ ଗ୍ରୁପ୍
ରିଅଲ ଇଷ୍ଟେଟ୍ ଦୃଷ୍ଟିକୋଣରୁ ଏହି ବଜେଟ୍ ଉଭୟ ପ୍ରତ୍ୟକ୍ଷ ଓ ପରୋକ୍ଷ ଫାଇଦା ପ୍ରଦାନ କରି ଅଭିବୃଦ୍ଧି ପାଇଁ ଉତ୍‌ପ୍ରେରକ ଭାବେ କାର୍ଯ୍ୟ କରୁଛି। କିନ୍ତୁ ସୁଲଭ ଗୃହନିର୍ମାଣ କ୍ଷେତ୍ର ପାଇଁ ବଡ଼ ଘୋଷଣା ହୋଇ ନ ଥିବାରୁ ହିତାଧିକାରୀମାନେ ନିରାଶ ହୋଇଛନ୍ତି।
ଅପୂର୍ବ ରଞ୍ଜନ ଶର୍ମା, ସହ ପ୍ରତିଷ୍ଠାତା ତଥା ଏମ୍‌ଡି, ଭେଞ୍ଚର କାଟାଲିଷ୍ଟସ୍
କେନ୍ଦ୍ର ବଜେଟ୍ ୨୦୨୫ରେ ୧୦୦ ବିଲିୟନ ଟଙ୍କା (୧.୧୬ ବିଲିୟନ ଡଲାର) ପାଣ୍ଠି ଘୋଷଣା ଏବଂ ଏକ ଉତ୍ସର୍ଗୀକୃତ ଡିପ୍ ଟେକ୍ ପାଣ୍ଠିର ଅନୁସନ୍ଧାନ ଭାରତର ଷ୍ଟାର୍ଟଅପ୍ ଇକୋସିଷ୍ଟମକୁ ସୁଦୃଢ଼ କରିବା ଦିଗରେ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ।

Advertisment