ବେଦାନ୍ତକୁ ସୁପ୍ରିମକୋର୍ଟରେ ଆଶ୍ୱସ୍ତି, ନାଲକୋର ଆଲୁମିନା ରପ୍ତାନି ଟେଣ୍ଡର ପ୍ରକ୍ରିୟାରେ ଭାଗ ନେଇପାରିବ
ଭୁବନେଶ୍ୱର : ଦେଶର ପ୍ରମୁଖ ଆଲୁମିନିୟମ ଉତ୍ପାଦନକାରୀ ବେଦାନ୍ତକୁ ସୁପ୍ରିମକୋର୍ଟରୁ ଏକ ବଡ଼ ଆଶ୍ୱସ୍ତି ମିଳିଛି । ବେଦାନ୍ତ ଏଣିକି ନାଲକୋର ଆଲୁମିନା କିଣିବା ପାଇଁ ବିଡ୍ ଦାଖଲ କରିପାରିବ ।
Sambad is now on WhatsApp
Join and get latest news updates delivered to you via WhatsApp
ସୁପ୍ରିମକୋର୍ଟର ଏକ ତିନିଜଣିଆ ବେଞ୍ଚ୍ ଆଜି ରାୟ ଶୁଣାଇଛନ୍ତି ଯେ ବେଦାନ୍ତ ନାଲକୋର ଆଲୁମିନା ରପ୍ତାନି ଟେଣ୍ଡରରେ ଭାଗ ନେଇପାରିବ । ଟେଣ୍ଡରରେ ସଫଳ ହେଲେ ବେଦାନ୍ତ ବିଶାଖାପାଟଣାରୁ ନାଲକୋର ଆଲୁମିନା ସଂଗ୍ରହ କରି ନିଜର ଝାରସୁଗୁଡ଼ା ସ୍ମେଲଟର ପ୍ଲାଣ୍ଟରେ ବ୍ୟବହାର କରିପାରିବ ।
ବେଦାନ୍ତର ଓଡ଼ିଶାର ଲାଞ୍ଜିଗଡ଼ଠାରେ ଏକ ରିଫାଇନାରୀ ଥିବାବେଳେ ଝାରସୁଗୁଡ଼ାଠାରେ ଏକ ସ୍ମେଲଟର ରହିଛି । ବକ୍ସାଇଟ ଅଭାବରୁ ବେଦାନ୍ତର ଲାଞ୍ଜିଗଡ଼ ପ୍ଲାଣ୍ଟ ଠିକଭାବେ ଚାଲିପାରୁନାହିଁ । ଏଣୁ ନିଜର ଝାରସୁଗୁଡ଼ା ସ୍ମେଲଟର ଚଳାଇବାକୁ ବେଦାନ୍ତ ନାଲକୋଠାରୁ ଆଲୁମିନା ଖରିଦ କରିବାକୁ ପ୍ରସ୍ତାବ ଦେଇଥିଲା । କିନ୍ତୁ ନାଲକୋ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିଥିଲା । ଏହା ବିରୁଦ୍ଧରେ ବେଦାନ୍ତ ଓଡ଼ିଶା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲା । ହାଇକୋର୍ଟ ମଧ୍ୟ ବେଦାନ୍ତକୁ ନାଲକୋର ଆଲୁମିନା ଟେଣ୍ଡରରେ ଭାଗନେବାକୁ ଅନୁମତି ଦେଇଥିଲେ । ହାଇକୋର୍ଟଙ୍କ ଏହି ରାୟକୁ ନାଲକୋ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲା ।
୨୦୧୮-୧୯ ଆର୍ଥିକ ବର୍ଷରେ ନାଲକୋ ପ୍ରାୟ ୧.୨୪ ନିୟୁତ ଟନ ଆଲୁମିନା ରପ୍ତାନି କରିଥିଲା । ନାଲକୋ ନିଜର ଆବଶ୍ୟକତା ମେଣ୍ଟାଇବା ପରେ ବଳକା ଆଲୁମିନାକୁ ରପ୍ତାନି କରିଥାଏ । ନାଲକୋର ଶ୍ରମିକ ୟୁନିୟନଗୁଡ଼ିକ ବେଦାନ୍ତକୁ ଆଲୁମିନା ବିକ୍ରିକୁ ବିରୋଧ କରିଆସୁଛନ୍ତି ।