ପ୍ରେମିକାକୁ ଚିଠି ଦେବାକୁ ମନା କରିବାରୁ ଅଷ୍ଟମ ଶ୍ରେଣୀ ଛାତ୍ରକୁ ଜିଅନ୍ତା ଜାଳିଲା ଦ୍ୱାଦଶ ଶ୍ରେଣୀ ଛାତ୍ର
ହାଇଦ୍ରାବାଦ୍: ଆନ୍ଧ୍ରପ୍ରଦେଶରେ ଘଟିଥିବା ଘଟଣା ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଶନିବାର ଦିନ ସମୟରେ ଜଣେ ଦ୍ୱାଦଶ ଶ୍ରେଣୀ ଛାତ୍ର ନିଜ ପ୍ରେମ ପତ୍ରକୁ ଦଶମ ଶ୍ରେଣୀରେ ପଢ଼ୁଥିବା ଜନୈକା ଛାତ୍ରୀଙ୍କ ନିକଟକୁ ପଠାଇବାର ବାଟ ଖୋଜୁଥିଲେ । ଏହି ସମୟରେ ସେ ଅଷ୍ଟମ ଶ୍ରେଣୀର ଜଣେ ଛାତ୍ରଙ୍କୁ ଦେଖି ତାଙ୍କୁ ସେ ଚିଠିଟି ନେଇ ଦେବା ପାଇଁ କହିଥିଲେ । କିନ୍ତୁ ଛାତ୍ରଜଣଙ୍କ ମନା କରିବାରୁ ତାଙ୍କୁ ସେ ଜିଅନ୍ତା ଜାଳିଦେବା ଘଟଣା ଏବେ ସେ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି । ଏହି ଘଟଣା ପରେ ପୀଡ଼ିତଙ୍କ ଶରୀରର ୯୦ପ୍ରତିଶତ ପୋଡ଼ି ଯାଇଥିବା ବେଳେ ତାଙ୍କ ଅବସ୍ଥା ଗୁରୁତର ଥିବା ଜଣା ପଡ଼ିଛି । ଅନ୍ୟ ପକ୍ଷରେ ଏ ନେଇ ପୁଲିସକୁ ସୂଚାନ ଦିଆଯିବା ପରେ ଅଭିଯୁକ୍ତ ନାବାଳକକୁ ହେପାଜତକୁ ନେଇ ପଚରାଉଚରା ଆରମ୍ଭ କରିଛି ପୁଲିସ ।
Sambad is now on WhatsApp
Join and get latest news updates delivered to you via WhatsApp
ପୁଲିସ ଦେଇଥିବା ସୂଚନା ଅନୁଯାୟୀ, ପୀଡ଼ିତ ମଧ୍ୟାହ୍ନ ଭୋଜନ ସାରି ବସିଥିବା ବେଳେ ଅଭିଯୁକ୍ତ ନାବାଳକ ଆସି ଦଶମ ଶ୍ରେଣୀ ଛାତ୍ରୀଙ୍କୁ ଚିଠି ଦେବା ପାଇଁ କହିଥିଲେ । କିନ୍ତୁ ପୀଡ଼ିତ ଚିଠି ନ ଦେଇ ଚିରି ଦେବା ସହ ସ୍କୁଲର ପ୍ରଧାନଶିକ୍ଷକଙ୍କୁ ଜଣାଇଦେବି ବୋଲି ଧମକ ଦେଇଥିଲେ । ଏଥିରେ ରାଗି ଯାଇ ଅଭିଯୁକ୍ତ ସ୍କୁଲର ପାର୍କିଙ୍ଗକୁ ଯାଇ ଗାଡ଼ିରୁ ପେଟ୍ରୋଲ କାଢ଼ିବା ସହ ପୀଡ଼ିତଙ୍କ ଉପରେ ଢ଼ାଳି ନିଆଁ ଲଗାଇ ଦେଇଥିଲେ ।