ଖଣ୍ଡଗିରି: ବୁଧବାର ଯାଁଳା ବଜାରସ୍ଥିତ ଏକ ଗହଣା ଦୋକାନରୁ ଲୁଟ୍ ଉଦ୍ୟମ ବିଫଳ ହୋଇଛି। ଦୋକାନୀଙ୍କ ଉପସ୍ଥିତ ବୁଦ୍ଧି ଯୋଗୁଁ ୨ ଜଣ ଛତିଶିଗଡ଼ୀ ଲୁଟେରା ଧରା ପଡ଼ି ଯାଇଛନ୍ତି। କିନ୍ତୁ ବାଇକ୍ ଧରି ରାସ୍ତା ଉପରେ ଅପେକ୍ଷା କରିଥିବା ଲୁଟେରା ଖସି ପଳାଇବାରେ ସକ୍ଷମ ହୋଇଛି। ଥାନାରେ ଅଟକ ଥିବା ୨ ଲୁଟେରା ହେଲେ ଗୁଲାମ୍ ହୋସେନ୍(୨୧) ଓ ସଲ୍ମନ୍ ହୋସେନ୍(୨୪)। ଏମାନେ ନିଜକୁ କେତେବେଳେ ମଧ୍ୟପ୍ରଦେଶର ତ କେତେବେଳେ ଛତିଶଗଡ଼ର ବୋଲି କହୁଛନ୍ତି। ପୁଲିସ ସେମାନଙ୍କଠାରୁ ମାରଣାସ୍ତ୍ର ଜବତ କରିଛି।
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ ଯାଁଳା ବଜାର ସ୍ୱାତୀ ଜୁଏଲର୍ସର ମାଲିକ ଲୋକନାଥ ସୁବୁଦ୍ଧି ଆଜି ୧୧ଟାବେଳେ ଦୋକାନ ଖୋଲି ପୂଜା କରୁଥିଲେ। ଏହି ସମୟରେ ଗୁଲାମ୍ ଓ ସଲ୍ମନ ଦୋକାନ ଭିତରକୁ ପଶି ଆସି ଗହଣା ଦେଖାଇବା ପାଇଁ କହିଥିଲେ। କିନ୍ତୁ ଲୋକନାଥ ଧୂପକାଠି ଧରି ବାହାରକୁ ଯିବାକୁ ବସିଥିବାବେଳେ ଜଣେ ଦୁର୍ବୃତ୍ତ ହଠାତ୍ ଏକ ବଡ଼ ଛୁରି ଦେଖାଇ ତାଙ୍କ ବାଟ ଓଗାଳିଥିଲା ଓ ଅନ୍ୟ ଜଣେ ଲୋକନାଥଙ୍କ ବେକରେ ଛୁରି ଲଗାଇ ଗହଣା ବାହାର କର ବୋଲି ଧମକ ଦେଇଥିଲା। କିନ୍ତୁ ଲୋକନାଥ କାଳବିଳମ୍ବ ନ କରି ସେମାନଙ୍କୁ ଏକ ଶକ୍ତ ଧକ୍କା ଦେଇ ଦୋକାନ ବାହାରକୁ ଡିଅାଁ ମାରିଥିଲେ ଓ ସଟର୍ ଟାଣି ଦେଇଥିଲେ। ଫଳରେ ଦୁଇ ଦୁର୍ବୃତ୍ତ ଭିତରେ ରହି ଯାଇଥିଲେ। ଲୋକନାଥଙ୍କ ପାଟି ଶୁଣି ସ୍ଥାନୀୟ ଲୋକଙ୍କ ଭିଡ଼ ଜମିଥିଲା ଓ ଖବର ପାଇ ଯାଁଳା ଫାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚିଥିଲା। ଏମାନଙ୍କର ଏକ ବଡ଼ ଗ୍ୟାଙ୍ଗ୍ ରହିଥିବା ପୁଲିସ ସୂଚନା ପାଇଛି। ଉଲ୍ଲେଖଯୋଗ୍ୟ ଯେ ଗତ ଜାନୁଆରି ମାସରେ ଏମିତି ଏକ ସକାଳେ ୩ ଜଣ ଯୁବକ ଏହି ଦୋକାନରୁ ଲକ୍ଷାଧିକ ଟଙ୍କାର ଗହଣା ଲୁଟି ନେଇଥିଲେ। ସେତେବେଳେ ଦୋକାନରେ ଲୋକନାଥଙ୍କ ବାପା ଭଗବାନ ସୁବୁଦ୍ଧି ଏକୁଟିଆ ଥିଲେ। ଆଜି ଧରାପଡ଼ିଥିବା ଦୁର୍ବୃତ୍ତମାନଙ୍କ ଗ୍ୟାଙ୍ଗ୍ ସେଦିନ ଲୁଟ୍ରେ ଥିବା ସନ୍ଦେହ କରାଯାଉଛି।