ଚାକିରି ଜିଦ୍ କାଳ ହେଲା : ବୋହୂର ବେକକୁ ଖଣ୍ଡାରେ ହାଣିଲା ଶଶୁର
ଅଲଓ୍ଵାର : ପୁରୁଷମାନଙ୍କ ଭଳି ମହିଳାମାନଙ୍କୁ ସମାନ ସୁବିଧା ଦେବା ପାଇଁ ସରକାର ଅନେକ ପ୍ରଚେଷ୍ଟା କରୁଥିଲେ ମଧ୍ୟ ଆଜି ଅନେକ ସ୍ଥାନରେ ମହିଳାଙ୍କୁ ଘରେ ସାଜସଜ୍ଜାର ବସ୍ତୁ ବିବେଚନା କରାଯାଉଛି। ମହିଳାମାନେ ହେଉଛନ୍ତି ଘରର ସମ୍ମାନ । ସେମାନେ ବାହାରକୁ କାମ କରିବା ପାଇଁ ଗଲେ ଘରର ସମ୍ମାନ ହାନି ହୋଇଥାଏ । ଏଭଳି ରକ୍ଷଣଶୀଳ ଭାବନା ଆଜି ବି କିଛି ଲୋକ ସାଇତି ରଖିଛନ୍ତି । ଏଭଳି ଏକ ଚିନ୍ତାଧାରାର ଶିକାର ହୋଇଛନ୍ତି ରାଜସ୍ଥାନର ଅଲଓା୍ଵର ଜିଲ୍ଲାର ଶାହଜାହାନପୁରରେ ରହୁଥିବା ଉମା ରାଜ୍ପୁତ୍ ।
କାମ କରି ନିଜ ଗୋଡ଼ରେ ଛିଡ଼ା ହେବା ଏବଂ ଘର ଚଳାଇବାରେ ସ୍ୱାମୀଙ୍କୁ ସାହାଯ୍ୟ କରିବାର ଭାବନା ମନକୁ ଆଣିବା ତାଙ୍କୁ ପଡ଼ିଛି ମହଙ୍ଗା । ଶାହଜାହାନପୁରରେ ରହୁଥିବା ଉମା ରାଜପୁତ୍ କାମକୁ ବାହାରୁ ଥିବା ବେଳେ ଏହାକୁ ବିରୋଧ କରି ତାଙ୍କ ଶଶୁର ଉମାଙ୍କ ବେକ କାଟି ତାଙ୍କୁ ହତ୍ୟା କରିଥିବା ଜଣା ପଡ଼ିଛି । ଏହି ଘଟଣା ଘଟିବା ପରେ ପୁଲିସ ଅଭିଯୁକ୍ତ ମାମ୍ରାଜଙ୍କୁ ଗିରଫ କରିବା ସହ ତାଙ୍କ ବିରୋଧରେ ଏକ ହତ୍ୟା ମାମଲା ରୁଜୁ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଘର ଚଳାଇବା ପାଇଁ ଉମା ଏବଂ ତାଙ୍କ ସ୍ୱାମୀ ମୁକେଶ ରାଜପୁତ୍ ଏକ କମ୍ପାନିରେ କାମ କରୁଥିଲେ । କିନ୍ତୁ ରାଜ୍ପୁତ୍ ଘରର ବୋହୂ ବାହାରେ କାମ କରିବାଟା ପସନ୍ଦ କରୁ ନ ଥିଲେ ଉମାଙ୍କ ଶଶୁର ମାମ୍ରାଜ୍ । ଏଇ କଥାକୁ ନେଇ ଶଶୁର-ବୋହୂ ମଧ୍ୟରେ ଝଗଡ଼ା ହୋଇଥିଲେ ମଧ୍ୟ ଉମା ତାଙ୍କ କଥା ମାନି ନଥିଲେ । ଏଥିରେ ରାଗି ଯାଇ ଉମା କାମକୁ ଯାଉଥିବା ବେଳେ ବାଟରେ ଏକ ଖଣ୍ଡା ସାହାଯ୍ୟରେ ମାମ୍ରାଜ୍ ତାଙ୍କ ବେକକୁ ହାଣି ଦେଇଥିଲେ । ରକ୍ତାକ୍ତ ଅବସ୍ଥାରେ ସେ ସାହାଯ୍ୟ ପାଇଁ ଚିତ୍କାର କରିଥିଲେ ମଧ୍ୟ କେହି ଆଗକୁ ଆସି ତାଙ୍କୁ ସାହାଯ୍ୟ କରି ନଥିଲେ ।
ଫଳରେ ଅଧିକ ରକ୍ତସ୍ରାବ ହେତୁ ତାଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା । ମାମ୍ରାଜ୍ ମୁକେଶଙ୍କ ବାପାଙ୍କ ବଡ଼ ଭାଇ ବୋଲି ଜଣା ପଡ଼ିଥିବା ବେଳେ ତାଙ୍କର ମାନସିକ ଅବସ୍ଥା ଠିକ୍ ନଥିବାରୁ ସେ କିଛି କାମ କରୁ ନଥିଲେ ବୋଲି ଜଣା ପଡ଼ିଛି ।