ଚନ୍ଦ୍ରଶେଖରପୁର: କଳାରାହାଙ୍ଗ ପଞ୍ଚାୟତ ମଞ୍ଚେଶ୍ୱର ଥାନା ଅଧୀନ ରୋକଟ ଗ୍ରାମରେ ଆଜି ସନ୍ଧ୍ୟାରେ କିଛି ଅସାମାଜିକ ବ୍ୟକ୍ତି ମାରଣାସ୍ତ୍ର ଧରି ଘରେ ପଶି ଏକ ଦମ୍ପତିଙ୍କୁ ଆକ୍ରମଣ କରିଛନ୍ତି। ସେହି ଗ୍ରାମର ରବୀନ୍ଦ୍ର ବେଜ ଓ ତାଙ୍କ ପତ୍ନୀ ବୁଲିଙ୍କୁ ଘରେ ପଶି ପ୍ରାଣାନ୍ତକ ଆକ୍ରମଣ କରି ଗୁରୁତର କରିଛନ୍ତି। ତେବେ ଏନେଇ ସ୍ଥାନୀୟ ଥାନାକୁ ସୂଚନା ଦିଆଯିବାରୁ ପିସିଆର୍‌ ଘଟଣାସ୍ଥଳରେ ପହଞ୍ଚି ଅଭିଯୁକ୍ତଙ୍କୁ ଗିରଫକରିଛି। ଏହାସହିତ ଘଟଣାର ତଦନ୍ତ ଜାରି ରହିଥିବା ମଞ୍ଚେଶ୍ୱର ଥାନା ପୁଲିସ୍‌ ସୂଚନା ଦେଇଛି। ଉଲ୍ଲେଖଯୋଗ୍ୟଯେ ପୂର୍ବ ଶତ୍ରୁତାକୁ କେନ୍ଦ୍ରକରି ଏହି ଘଟଣା ଘଟିଥିବା ଅନୁମାନ କରାଯାଉଛି। ପୁଲିସ ସୂଚନା ଅନୁଯାୟୀ ରବୀନ୍ଦ୍ର ଓ ତାଙ୍କ ପତ୍ନୀ ବୁଲିକୁ ସେହି ଗ୍ରାମର ପହଲି ବେଜ ଓ ତାଙ୍କ ଦୁଇ ପୁଅ ଗତ କିଛିଦିନ ପୂର୍ବେ କାଠଫାଳିଆରେ ଆକ୍ରମଣ କରିଥିଲେ। ଏ ନେଇ ମଞ୍ଚେଶ୍ୱର ଥାନାରେ ଏକ ମାମଲା ମଧ୍ୟ ରୁଜୁ ହୋଇଥିଲା। ତେବେ ଗ୍ରାମର କିଛି ବ୍ୟକ୍ତି ଏହି ଘଟଣାର ସମାଧାନ କରିବାକୁ ଯାଇ ଗିରଫ ଅଭିଯୁକ୍ତଙ୍କୁ ଥାନାରୁ ମୁକୁଳାଇଥିଲେ। ତେବେ ଆଜି ସେହି ଯୁବକମାନେ ରବୀନ୍ଦ୍ର ଓ ବୁଲିଙ୍କୁ ଆକ୍ରମଣ କରିଥିଲେ। ତେବେ ପୁଲିସ୍‌ ଏହି ଘଟଣାକୁ ହାଲ୍‌କା ଭାବରେ ନେଉଥିବାରୁ ଉକ୍ତ ଦମ୍ପତିଙ୍କ ଉପରେ ବାରମ୍ବାର ଆକ୍ରମଣ ହେଉଥିବା ଅଭିଯୋଗ ହୋଇଛି।