ନୂଆଦିଲ୍ଲୀ: ହରିୟାଣାର ଗୁରୁଗ୍ରାମରେ ଗୋତସ୍କରମାନେ ବଜରଙ୍ଗ ଦଳର ଜଣେ କର୍ମୀଙ୍କୁ ଗୁଳିମାରିବା ଘଟଣା ସାମ୍ନାକୁ ଆସିଛି । ବୁଧବାର ରାତିରେ ଗୁରୁଗ୍ରାମ୍ ସେକ୍ଟର ୧୦ରେ ଘଟିଛି ଏହି ଘଟଣା । ଏକ ଗାଡ଼ିରେ ଗୋତସ୍କରମାନେ ଗୋରୁ ଚାଲାଣ କରୁଥିବା ବେଳେ ବଜରଙ୍ଗ ଦଳର କର୍ମୀ ମୋନୁ ମନେସର୍ ତାଙ୍କୁ ପିଛା କରି ଅଟକାଇବାକୁ ଉଦ୍ୟମ କରିଥିଲେ। ଏହାପରେ ଗୋତସ୍କରମାନେ ତାଙ୍କ ଉପରକୁ ଗୁଳି ଚଳାଇଥିଲେ। ଫଳରେ ମୋନୁ ମନେସରଙ୍କ ଶରୀରରେ ଗୁଳି ବାଜିବାରୁ ସେ ଆହତ ହୋଇଥିଲେ।  ବର୍ତ୍ତମାନ  ଡାକ୍ତରଖାନାରେ ତାଙ୍କର ଚିକିତ୍ସା ଚାଲିଛି । ଏହି ଘଟଣାର ଭିଡିଓ ସୋସିଆଲ ମିଡିଆକୁ ଆସିଛି।  ଭିଡିଓରେ ଦେଖିବାକୁ ମିଳୁଛି ଯେ ପୁଲିସ୍ ଅଟକାଇବା ପରେ ମଧ୍ୟ ଗୋତସ୍କର କିଭଳି ଭାବେ ଖସି ପଳାଇବାକୁ ଉଦ୍ୟମ କରିବା ସହ ଗୁଳିଚାଳନା କରୁଛନ୍ତି।

Advertisment

ବଜରଙ୍ଗ ଦଳର କାର୍ଯ୍ୟକର୍ତ୍ତା ପାଖାପାଖି ୨୦ ମିନିଟ୍ ପର୍ଯ୍ୟନ୍ତ ଲଗାତାର ଗାଡିର ପିଛା କରିବା ପରେ ତସ୍କରମାନେ ଗୁଳି ଚଳାଇଥିଲେ । ତେବେ ସବୁ ତସ୍କରଙ୍କୁ ପୁଲିସ୍ ଗିରଫ କରିସାରିଛି। ଏହି ମାମଲାରେ ଗୁରୁଗ୍ରାମ୍ କ୍ରାଇମ୍ ଡିସିପି ରାଜୀବ ଦେଶବାଲଙ୍କ କହିବାନୁସାରେ , ୬ ଜଣ ତସ୍କର ଗାଡିରେ ଗାଈ ନେଉଥିଲେ । ବଜରଙ୍ଗ ଦଳ କାର୍ଯ୍ୟକର୍ତ୍ତା ଯେତେବେଳେ ଗୋଚାଲାଣ ହୋଉଥିବା ଦେଖିଥିଲେ ଗାଈଙ୍କୁ ବଂଚାଇବା ପାଇଁ ସେମାନେ ଗାଡିର ପିଛା କରି ପୁଲିସକୁ ଫୋନ୍ କରିଥିଲେ । ପୁଲିସ୍ ମଧ୍ୟ ତସ୍କରଙ୍କ ଗାଡିର ପିଛା କରିଥିଲା । ପୁଲିସ୍ ପିଛା କରୁଥିବା ଦେଖି ତସ୍କର ଗାଈମାନଙ୍କୁ ଗାଡିରୁ ବାହାର କରି ଛାଡ଼ି ଦେଇଥିଲେ ।