ଖଣ୍ଡଗିରି : ଗୁରୁବାର ପୂର୍ବାହ୍ନରେ ବରମୁଣ୍ଡା ଅଞ୍ଚଳରେ ବ୍ରାଉନ୍ସୁଗାର ବେପାର କରୁଥିବା ଅଭିଯୋଗରେ ଖଣ୍ଡଗିରି ଥାନା ପୁଲିସ ୨ ଜଣଙ୍କୁ ଗିରଫ କରିଛି। ସେମାନେ ହେଲେ ଖୋର୍ଧା ସାମନ୍ତରାପୁର ବୁଢ଼ୀବଗିଚା ଅଞ୍ଚଳର ପ୍ରସନ୍ନ କୁମାର ସାହୁ ଓରଫ୍ ପ୍ରଶାନ୍ତ (୨୪) ଓ ସ୍ଥାନୀୟ ଶିରିପୁର କନ୍ଧସାହିର ଶତୃଘ୍ନ ପ୍ରଧାନ ଓରଫ୍ ଶତୁରା(୨୯)। ପୁଲିସ ସେମାନଙ୍କଠାରୁ ୨୨ ଗ୍ରାମ୍ ବ୍ରାଉନ୍ସୁଗାର ଜବତ କରିଛି। ପୁଲିସ ସୂଚନାନୁସାରେ ପ୍ରସନ୍ନ ଏହି ନିଶା ଦ୍ରବ୍ୟ ଧରି ଖୋର୍ଧାରୁ ଭୁବନେଶ୍ବର ଆସେ ଓ ଶତୁରା ସହ ମିଶି ବରମୁଣ୍ଡା, ଶିରିପୁର, ଗଙ୍ଗନଗର, ଗଣ୍ଡମୁଣ୍ଡା ଆଦି ଅଞ୍ଚଳରେ କାରବାର କରେ। ବିଶେଷକରି ଜଗମୋହନନଗର, ପଞ୍ଚସଖାନଗର, ସୌଭାଗ୍ୟନଗର, ମଲ୍ଲିକ କମ୍ପ୍ଲେକ୍ସ ଓ କ୍ରିଷ୍ଣା ଗାର୍ଡେନ୍ ଆଦି ଅଞ୍ଚଳରେ ଥିବା ଇଂଜିନିୟରିଂ କଲେଜ ପିଲାଙ୍କ ମେସ୍କୁ ଟାର୍ଗେଟ୍ କରି ଅଭିଯୁକ୍ତଦ୍ବୟ ଏହି ବେପାର ଚଳାଇ ଆସୁଥିଲେ। ଖୋର୍ଧାର ପ୍ରସନ୍ନ କେବଳ ଜଣେ ମାଲ୍ ଚାଲାଣକାରୀ ବା ବ୍ରାଉନ୍ସୁଗାର କୁଚିଆ ବୋଲି ପୁଲିସ ସୂଚନା ଦେଇଛି।