ମହିଳାଙ୍କୁ ଏକା ଦେଖି ଅସଦାଚରଣ କଲା ସ୍ୱିଗିର ଡ଼େଲିଭରି ବଏ,କମ୍ପାନୀରେ ଅଭିଯୋଗ କରିବା ପରେ ମିଳିଲା ଏଭଳି ଆଶ୍ଚର୍ଯ୍ୟଜନକ ଉତ୍ତର
ଇନ୍ଦୋର : ପୂର୍ବରୁ ଅନ୍ଲାଇନ୍ ଖାଇବା ଅର୍ଡ଼ର କରି ବା କୌଣସି ଜିନିଷ ଅର୍ଡ଼ର କରି ଲୋକମାନେ ଭୋଗିଥିବା ଅସୁବିଧା ବିଷୟରେ ଆମେ ଆପଣଙ୍କୁ ଜଣାଇଛୁ । କେତେବେଳେ ଖାଇବାରୁ ଅସରପା ତ କେତେବେଳେ ଫୋନ ବଦଳରେ ଇଟା ଆସିଛି। ଏଭଳି ଅନେକ ଘଟଣା ଅନ୍ଲାଇନ୍ ଅର୍ଡ଼ର କରିଥିବା ଲୋକମାନଙ୍କ ସହିତ ଘଟିଥିବା ଦେଖିବାକୁ ମିଳିଥାଏ । କିଛି ସେଭଳି ଘଟିଥିଲା ଇନ୍ଦୋରରେ ରହୁଥିବା ଜଣେ ମହିଳାଙ୍କ ସହ । ଅନ୍ଲାଇନ୍ ସାଇଟ୍ ସ୍ୱିଗିରୁ ମହିଳାଜଣଙ୍କ ନିଜ ପାଇଁ ଖାଇବା ଅର୍ଡ଼ର କରିଥିଲେ । ଅର୍ଡ଼ର ସମୟ ମଧ୍ୟରେ ଡ଼େଲିଭରୀ ମଧ୍ୟ ହୋଇଥିଲା । କିନ୍ତୁ ଡ଼େଲିଭରୀ ସମୟରେ ଡ଼େଲିଭରୀ ବଏ ଯେଉଁଭଳି ବ୍ୟବହାର କରିଥିଲେ ତାହା ଏବେ ସମସ୍ତଙ୍କ ଭାବିବା ପାଇଁ ବାଧ୍ୟ କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଡ଼େଲିଭରୀ ବଏ ମହିଳାଙ୍କୁ ଘରେ ଏକା ଦେଖି ଘର ଭିତରକୁ ଯିବା ସହ ତାଙ୍କ ସହ ଅସଦାଚରଣ କରିଥିଲେ । ଯାହା ପରେ ମହିଳାଜଣଙ୍କ ପାଟି କରି ପଡ଼ୋଶୀମାନଙ୍କୁ ଡ଼ାକିବାରୁ ଡ଼େଲିଭରୀ ବଏ ସେଠାରୁ ଖସି ପଳାଇଥିଲେ । ଏ ନେଇ ପୁଲିସରେ ଅଭିଯୋଗ ହେବା ପରେ ପୁଲିସ ଦୁଇ ଘଣ୍ଟା ମଧ୍ୟରେ ଅଭିଯୁକ୍ତକୁ ଗିରଫ କରିଥିଲା । ଅନ୍ୟ ପକ୍ଷରେ ଏହି ଘଟଣା ବିଷୟରେ ଜଣାଇବା ପାଇଁ ପୀଡ଼ିତା ଗୁଗଲରୁ ସ୍ୱିଗିର ନୋଏଡ଼ାସ୍ଥିତ ଅଫିସର ନମ୍ବର ବାହାର କରି ପୂରା ଘଟଣା ଜଣାଇଥିଲେ । ସବୁ ଜାଣିବା ପରେ,ଆମେ ଏହାର ସମାଧାନ କରି ପାରିବୁ ନାହିଁ ବୋଲି ସ୍ୱିଗି କର୍ମଚାରୀ ଉତ୍ତର ରଖିଥିଲେ । ପରେ ପୀଡ଼ିତା ସ୍ୱିଗିର ଉଚ୍ଚ ପଦସ୍ଥ ଅଧିକାରୀଙ୍କ ସହ କଥା କରାଇବା ପାଇଁ କହିବାରୁ ଆପଣ ମୋଦିଜୀଙ୍କ ଆଗରେ ଅଭିଯୋଗ କରନ୍ତୁ ବୋଲି ନୋଏଡ଼ା ଅଫିସରୁ ଉତ୍ତର ମିଳିଥିଲା ।