ଭୁବନେଶ୍ୱର: ନବବିବାହିତାଙ୍କୁ ଯୌତୁକ ନିର୍ଯାତନା ଓ ହତ୍ୟା ଅଭିଯୋଗରେ ଭୁବନେଶ୍ୱର କମିସନରେଟ ପୁଲିସ ତମାଣ୍ଡୋ ଥାନାର ଜଣେ ପୁଲିସ କର୍ମଚାରୀ ବିଜୟ ଗୋଚ୍ଛାୟତଙ୍କ ପୁଅ ଯାମିନୀକାନ୍ତ ଗୋଚ୍ଛାୟତଙ୍କୁ ଗିରଫ କରିଛି । ଶ୍ୱଶୁର ଘର ପରିବାର ଲୋକଙ୍କ ଏତଲା କ୍ରମେ ପୁଲିସ ଯାମିନୀକାନ୍ତଙ୍କୁ ଗିରଫ କରିଥିବା ଜଣାଯାଇଛି । ସୂଚନାଯୋଗ୍ୟ, ନବବିବାହିତା ବନ୍ଦନା ଜେନାଙ୍କ ମୃତଦେହ ଗତ ଶନିବାର ଫ୍ୟାନରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ତମାଣ୍ଡୋ ଥାନାରେ ବନ୍ଦନାଙ୍କ ପିତାଙ୍କ ଅଭିଯୋଗ କ୍ରମେ ପୁଲିସ ପକ୍ଷରୁ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଗତ ୧୯ ତାରିଖରେ ତାଙ୍କ ଝିଅଙ୍କ ମୃତଦେହ ଶାଶୁ ଘରର ଏକ କୋଠରୀରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା । ବନ୍ଦନା ଜେନା ଓ ଯାମିନୀକାନ୍ତ ଗତ ଫେବ୍ରୁଆରି ୧୬ରେ ବୈଦିକ ରୀତିରେ ବିବାହ କରିଥିଲେ । କିନ୍ତୁ ବିବାହ ପରେ ଉଭୟ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ବିବାଦ ଲାଗି ରହିଥିଲା । ବନ୍ଦନାର ଶାଶୁଘର ଲୋକେ ଅଧିକ ଯୌତୁକ ଦାବି କରି ନିର୍ଯାତନା ଦେଉଥିଲେ ବୋଲି ସୂଚନା ଦେଇଛନ୍ତି ମୃତଙ୍କ ପରିବାର ଲୋକ।
ପାରିପାରିକ କଳହର ସମାଧାନ ପାଇଁ ବନ୍ଦନାଙ୍କ ପରିବାର ଲୋକେ ଶନିବାର ଦିନ ତାଙ୍କ ଶାଶୁ ଘରକୁ ଯାଇଥାନ୍ତେ । କିନ୍ତୁ ଏହା ପୂର୍ବରୁ ବନ୍ଦନାଙ୍କ ମୃତ୍ୟୁ ସଂପର୍କରେ ଟେଲିଫୋନ ମାଧ୍ୟମରେ ପରିବାର ଲୋକଙ୍କୁ ସୂଚନା ଦିଆଯାଇଥିଲା ।