ରାଜ୍ୟରେ ମାତିଛନ୍ତି ସାଇବର ଠକ: ୨୫ ଲକ୍ଷ ଟଙ୍କା ଲଟେରିର ଲୋଭ ଦେଖାଇ ଠକିନେଲେ ୧୫ ହଜାର
ଭୁବନେଶ୍ବର: ପୁରୀ ଜିଲ୍ଲା ସତ୍ୟବାଦୀ ବାଗଲପୁର ଅଞ୍ଚଳର ବିମ୍ବାଧର ସ୍ୱାଇଁ । ବୃତ୍ତିରେ ଜଣେ ଅଟୋ ଡ୍ରାଇଭର । ୨୫ ଲକ୍ଷ ଟଙ୍କା ଲଟେରିର ଲୋଭ ଦେଖାଇ ତାଙ୍କଠାରୁ ୧୫ ହଜାର ଲୁଟି ନେଇଛି ଠକ । ହ୍ୱାଟ୍ସଆପ୍ ଜରିଆରେ ନକଲି ଚେକର କପି ପଠାଇ ବିମ୍ବାଧରଙ୍କ ବିଶ୍ୱାସ ଜିତିବା ପରେ ଦୁଇଟି କିସ୍ତିରେ ୧୫ ହଜାର ଟଙ୍କା ଠକି ନିଆଯାଇଛି।
Sambad is now on WhatsApp
Join and get latest news updates delivered to you via WhatsApp
ଲଟେରି ଲୋଭ ଯୋଗୁଁ ଠକାମୀରେ ପଡିଛନ୍ତି ବିମ୍ବାଧର । ପ୍ରଥମେ ୫ ହଜାର ପରେ ସ୍ତ୍ରୀର ଗହଣା ବନ୍ଧା ପକାଇ ୧୦ ହଜାର ଟଙ୍କା ରଶ୍ମୀରଂଜନ ସେଠ୍ ନାମକ ଜଣେ ବ୍ୟକ୍ତିଙ୍କ ଆକାଉଂଟକୁ ପଠାଇଥିଲେ । ଲଟେରି ଟଙ୍କା ତ ମିଳିଲା ନାହିଁ, ହେଲେ ଠକର ଲୋଭ ଏତିକିରେ ଥମି ନଥିଲା । ଆହୁରି ଟଙ୍କା ମାଗିଥିଲା ଠକ । ଆଉ ଟଙ୍କା ନଦେବାରୁ ଆରମ୍ଭ ହୋଇ ଯାଇଥିଲା ଗାଳି ଗୁଲଜ ଓ ଧମକ-ଚମକ ।
ଯେକୌଣସି ଲୋକ ପାଖକୁ ଆସିପାରେ ଏପରି ଫୋନ୍ କଲ୍ । ଗଣମାଧ୍ୟମ ପ୍ରତିନିଧିଙ୍କ ପାଖକୁ ମଧ୍ୟ ଆସିଥିଲା ଠକ କଲ୍ । ସେହି ଏକାକଥା, ବ୍ୟାଙ୍କ ଆକାଉଂଟରେ ୨୫ ଲକ୍ଷ ଟଙ୍କା ଡିପୋଜିଟ୍ ହୋଇଛି । ଇନକମ୍ ଟ୍ୟାକ୍ସ ପାଇଁ ଟଙ୍କା ଜମା କଲେ ଉଠାଇ ପାରିବେ ଟଙ୍କା । ବେଶ କିଛି ସମୟ ଧରି ଏଭଳି ମନଲୋଭା କଥା କହି ଭୁଲାଇବାକୁ ଚେଷ୍ଟା କରୁଛନ୍ତି ଫ୍ରଡ୍ ମାଷ୍ଟର ।
ସାଧାରଣ ଲୋକଙ୍କୁ ବିଶ୍ୱାସ ଜନ୍ମାଇବା ପାଇଁ ଉଦ୍ୟମ କରିଥାନ୍ତି । ଏପରିକି ସେମାନଙ୍କ ଗ୍ରୁପର କିଛି ସଦସ୍ୟ ଭିଡ଼ିଓ କରି ଟଙ୍କା ପାଇଥିବା କଥା ମଧ୍ୟ କହିଥାନ୍ତି । ଯିଏ ଲୋଭର ବଶବର୍ତ୍ତୀ ହୋଇ ସେମାନଙ୍କ ଜାଲରେ ପଡିଯାଆନ୍ତି, ସେମାନେ ମୋଟା ଅଙ୍କର ଲୁଟର ଶିକାର ହୁଅନ୍ତି ।