ବୋହୂ ମାଡ଼ରେ ଆହତ ଶ୍ବଶୁର ପୁଲିସ ସାମ୍ନାରେ ବଖାଣିଲେ ଏଭଳି କଥା...

ନୂଆଦିଲ୍ଲୀ: ହରିୟାଣାର ପଲବଲରେ ଜଣେ ବୋହୂ ଶ୍ବଶୁରଙ୍କୁ ପାଇପରେ ମାଡ଼ ମାରୁଥିବାର ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଏହି ଘଟଣାର ଏକ ଭିଡିଓ ବି ସୋସିଆଲ ମିଡିଆରେ ଭାଇରାଲ ‌ହୋଇଛି। ଭିଡିଓକୁ ଦେଖି ଉକ୍ତ ବୋହୂ ବିରୋଧ‌ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଉଛି।

ଏହି ଘଟଣା ପଲବଲର ନ୍ୟୁ କଲୋନିରେ ଘଟିଥିଲା। ପୀଡ଼ିତ ବୃଦ୍ଧ କିସନ ଚନ୍ଦ ଗର୍ଗ ପୁଲିସ ନିକଟରେ ଅଭିଯୋଗ କରି କହିଛନ୍ତି କି, ‘ବ୍ୟାଙ୍କରୁ ୪୦ହଜାର ଟଙ୍କା ବାହାର କରି ଆଣିଥିଲି। ଯେମିତି  ମୁଁ ଘରେ ପହଞ୍ଚିଥିଲି ମୋ ପାଖକୁ ବୋହୂ ଚାରୁ ଚାଲି ଆସିଥିଲେ। ମୁଁ ତାଙ୍କୁ କିଛି କହିବା ପୂର୍ବରୁ  ସେ ତୁରନ୍ତ ମୋତେ ପାଇପରେ ମାଡ଼ ମାରିବା ଆରମ୍ଭ ‌କରି ଦେଇଥିଲେ।

ଏହାପରେ ମୁଁ ବ୍ୟାଙ୍କରୁ ଉଠାଇ ଆଣିଥିବା ସମସ୍ତ ଟଙ୍କାକୁ ସେ ମୋ ପାଖରୁ ନେଇ ଯାଇଥିଲେ। କେବଳ ଏତିକି ନୁହେଁ ମୋତେ ବୋହୂ ମାଡ଼ ମାରୁଥିବା ବେଳେ ଘରେ କାମ କରୁଥିବା ଜଣେ ମହିଳା ମୋତେ ବଞ୍ଚାଇବାକୁ ଆସିବା ସମୟରେ ଚାରୁ ତାଙ୍କୁ ବି ମାଡ଼ ମାରିଥିଲେ।

ଜୀବନ ବିକଳରେ  ମୁଁ ଘରୁ ବାହାରକୁ ଚାଲି ଆସିଥିବା ବେଳେ ବୋହୂ ସେଠାରେ ବି ମୋତେ ସମସ୍ତଙ୍କ ସମ୍ମୁଖରେ ମାଡ଼ ମାରିଥିଲେ। ଏହି ଘଟଣାକୁ ‌ଦେଖି ମୋତେ  ଯିଏବି ବଞ୍ଚାଇବାକୁ ଆସିଥିଲେ ଚାରୁ ତାଙ୍କୁ ଇଟା ପଥର ମାଡ଼ କରିଥିଲେ। ଏଥିରେ ଜ‌ଣେ ଲୋକ ବି ଆହତ ହୋଇଥିଲେ।’

ପୁଲିସ ଏହି ଘଟଣାର ଯାଞ୍ଚ ଆରମ୍ଭ କରି ଚାରୁଙ୍କୁ ଗିରଫ କରି ନେଇଛି। ବୋହୂ ମାଡ଼ରେ ଆହତ ହୋଇଥିବା ବୃଦ୍ଧଙ୍କୁ ପୁଲିସ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରିଛି।