ଚତୁର୍ଥୀ ରାତିରେ ଶାଶୁ ଘରୁ ଫେରାର ହୋଇଗଲା ନବବଧୂ: ପୁଲିସ ପଚାରିବା ପରେ କହିଲେ ମୁଁ ତ ଜୟମାଲା ଏବଂ ସାତ୍ ଫେରା ସମୟରେ ଫେରାର ହୋଇଯାଇଥାନ୍ତି
ଧୌଲପୁର(ରାଜସ୍ଥାନ) : ପ୍ରଥମ ସ୍ତ୍ରୀ ମୃତ୍ୟୁବରଣ କରିବା ପରେ ଯୁବକ ଦ୍ୱିତୀୟ ବିବାହ କରିବା ପାଇଁ ନିଷ୍ପତ୍ତି ନେଇଥିଲେ । ଯାହା ପରେ ଘର ଲୋକେ ଯୁବକଙ୍କ ଇଚ୍ଛା ପୂରଣ କରିବା ପାଇଁ ଦ୍ୱିତୀୟ ବିବାହ କରାଇଥିଲେ । କିନ୍ତୁ ଚୁତୁର୍ଥୀ ରାତିରେ ଯୁବକ ଶୋଇଥିବା ସମୟରେ ନବବଧୂ ତାଙ୍କୁ ଛାଡ଼ି ଚାଲିଯିବା ଘଟଣାକୁ ନେଇ ଏବେ ଚର୍ଚ୍ଚା ଜୋର ଧରିଛି । ଏ ନେଇ ଶାଶୁଘର ଲୋକେ ସରମଥୁରା ପୁଲିସ ଷ୍ଟେସନରେ ଅଭିଯୋଗ କରିବା ପରେ ପୁଲିସ ନବବଧୂଙ୍କୁ ସିଦ୍ଧପୁରା ଜଙ୍ଗଲରୁ କାବୁ କରି ନେଇଥିଲେ । ହେପାଜତକୁ ନେଇ ପୁଲିସ ଫେରାର ହେବାର କାରଣ ପଚାରିବାରୁ ନବବଧୂ ମୁଁ ନାବାଳିକା ବୋଲି କହିଥିଲେ । କିନ୍ତୁ ଏହାର କୌଣସି ପ୍ରମାଣ ପୁଲିସକୁ ଦେଇ ପାରି ନଥିଲେ ।
Sambad is now on WhatsApp
Join and get latest news updates delivered to you via WhatsApp
ଏହା ପରେ ନବବଧୂ ବିବାହରେ ମଧ୍ୟସ୍ଥତା କରିଥିବା ମଧ୍ୟସ୍ତିଙ୍କ ଉପରେ ଆରୋପ ଲଗାଇ, ମୋତେ ୨୦ବର୍ଷୀୟ ଯୁବକଙ୍କ ଫଟୋ ଦେଖାଇ ୪୦ବର୍ଷୀୟ ଯୁବକଙ୍କ ସହ ବିବାହ କରାଇ ଦେଇଛନ୍ତି ବୋଲି ଅଭିଯୋଗ କରିଥିଲେ । ବର ଜୟମାଲାଠାରୁ ଆରମ୍ଭ କରି ସାତ୍ଫେରା ପର୍ଯ୍ୟନ୍ତ ମୁହଁରେ ସେହ୍ରା ବାନ୍ଧିଥିଲେ । କହିବା ପରେ ମଧ୍ୟ ବର ନିଜର ଚେହେରା ଦେଖାଇ ନଥିଲେ । ବିବାହ ସଂପନ୍ନ ହେବା ପରେ ମୁଁ ବରର ମୁହଁ ଦେଖି ସେଇଠି ବିବାହ ଭାଙ୍ଗିବାର ନିଷ୍ପତ୍ତି ନେଇଥିଲି । କିନ୍ତୁ ଘର ଲୋକ ଥିବାରୁ ଏହା ସମ୍ଭବ ହୋଇ ପାରି ନଥିଲା । ଯାହା ପରେ ମୁଁ ଚତୁର୍ଥୀ ରାତିରେ ଶାଶୁ ଘରୁ ଫେରାର ହେବାର ଯୋଜନା ତିଆରି କରିଥିଲି । ଦୁଇ ମଧ୍ୟସ୍ଥି ମଞ୍ଜୁ ଏବଂ ଦିନେଶ ମୋ ମାତା-ପିତାଙ୍କୁ ଟଙ୍କାର ଲୋଭ ଦେଖାଇ ବିବାହ କରାଇବାକୁ ରାଜି କରାଇବା ସହ ମୋତେ ରାଜସ୍ଥାନ ନେଇ ଆସିଥିଲେ । ଯାହା ପରେ ମୋର ବିବାହ ହୋଇଥିଲା । କିନ୍ତୁ ବିବାହ ପରେ ବରର ମୁହଁ ଏବଂ ବୟସ ଜାଣି ମୁଁ ଫେରାର ହେବାର ଯୋଜନା କରିଥିଲି ବୋଲି ପୁଲିସ ଆଗରେ ଜଣାଇଛନ୍ତି ନବବଧୂ ।
ପୂରା ଘଟଣା ସାମ୍ନାକୁ ଆସିବା ପରେ ଶିଶୁ କଲ୍ୟାଣ ସମିତିର ଅଧ୍ୟକ୍ଷ ନବବଧୂଙ୍କୁ ସୁରକ୍ଷା ଦୃଷ୍ଟିରୁ ଭରତପୁରରେ ଥିବା ନିଜ ଘରକୁ ପଠାଇଛନ୍ତି । ଏହା ସହ ପୁଲିସ ନବବଧୂଙ୍କ ମାତା-ପିତାଙ୍କୁ ସଂପର୍କ କରୁଥିବା ଜଣା ପଡ଼ିଛି ।