ମଦ ନିଶାରେ ତିନିମାସର ଶିଶୁକନ୍ୟା ଉପରେ ବସିପଡ଼ିଲା ଯୁବକ; ଘଟଣାସ୍ଥଳରେ ଉଡ଼ିଗଲା ପ୍ରାଣବାୟୁ
ରାୟପୁର: ଛତିଶଗଡ଼ର ଅମ୍ବିକାପୁରରୁ ସାମ୍ନାକୁ ଆସିଛି ଏକ ଆଶ୍ଚର୍ଯ୍ୟଜନକ ଘଟଣା । ହୋଲି ଦିନ ମଦ ନିଶାରେ ତିନି ମାସର ଶିଶୁକନ୍ୟା ଉପରେ ବସିପଡ଼ିଲା ଯୁବକ । ଘଟଣାସ୍ଥଳରେ ହିଁ ଶିଶୁକନ୍ୟାଟିର ପ୍ରାଣବାୟୁ ଉଡ଼ିଗଲା। ଏହି ମାମଲାରେ ଶିଶୁକନ୍ୟାର ବାପାର ଅଭିଯୋଗ ଉପରେ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିଛି ସୀତାପୁର ପୁଲିସ । ସୂଚନାନୁସାରେ, ଘଟଣାଟି ଅମ୍ବିକାପୁରର ସୀତାପୁର ପୁଲିସ ଷ୍ଟେସନ ଅଞ୍ଚଳର ଗିରହୁଲଡିହରେ ଘଟିଛି।
Sambad is now on WhatsApp
Join and get latest news updates delivered to you via WhatsApp
ହୋଲିଦିନ ଖଟରେ ଶୋଇଥିଲା ଗୋପାଳ ରାମଙ୍କ ତିନି ମାସର ଶିଶୁକନ୍ୟା । ଶିଶୁକନ୍ୟାର ମାଆ ଘର କାମରେ ବ୍ୟସ୍ତ ଥିଲେ । ଗୋପାଳଙ୍କ ଘରକୁ ଆସିଥିଲା ଅଭିଯୁକ୍ତ ଜଙ୍ଗଲୁ । ଆଉ ଯେତେବେଳେ ଘରେ ପଡ଼ିଥିବା ଖଟ ଉପରେ ବସିବାକୁ ଗଲା, ସେତେବେଳେ ଗୋପାଳଙ୍କ ପତ୍ନୀ ତାକୁ ଅଟକାଇଥିଲେ, ଅଭିଯୁକ୍ତକୁ କହିଥିଲେ ଯେ ଝିଅ ଖଟ ଉପରେ ଶୋଇଛି । ହେଲେ ମାନି ନଥିଲା ଜଙ୍ଗଲୁ, ମଦନିଶାରେ ଭୁଲିଗଲା ସବୁକିଛି । ଶୋଇଥିବା ତିନି ମାସର ଶିଶୁକନ୍ୟା ଉପରେ ବସିପଡ଼ିଲା ଅଭିଯୁକ୍ତ ଜଙ୍ଗଲୁ । ଅଣନିଃଶ୍ଵାସୀ ହୋଇଗଲା ଶିଶୁକନ୍ୟା । ଘଟଣାସ୍ଥଳରେ ହିଁ ତାର ପ୍ରାଣବାୟୁ ଉଡ଼ି ଯାଇଥିଲା ।
ଅଭିଯୋଗ ପରେ ପୁଲିସ ଜଙ୍ଗଲୁ ବିରୋଧରେ ହତ୍ୟା ମାମଲା ରୁଜୁ କରି କାର୍ଯ୍ୟାନୁଷ୍ଠାନ ଗ୍ରହଣ କରି ଗିରଫ କରିଛି । ସେପଟେ ପୋଷ୍ଟମର୍ଟମ ପରେ ସମ୍ପର୍କୀୟଙ୍କୁ ଶିଶୁକନ୍ୟାର ମୃତଦେହକୁ ହସ୍ତାନ୍ତର କରିଛି ପୁଲିସ । ଧାରା ୩୦୨ ଅନୁଯାୟୀ ଅଭିଯୁକ୍ତ ବିରୋଧରେ ମାମଲା ରୁଜୁ କରି ତାକୁ ଗିରଫ କରି କୋର୍ଟ ଚାଲାଣ କରିଛି ସୀତାପୁର ପୁଲିସ ।