ଫୋନ୍‌ରେ ଅନ୍ୟ ବ୍ୟକ୍ତିଙ୍କ ‌ସଙ୍ଗେ କଥା କହୁଥିବା ପ୍ରେମିକାର ତଣ୍ଟିଚିପି ହତ୍ୟା କଲେ ‌ପ୍ରେମିକ

ଫରିଦାବାଦ: ଫୋନ୍‌ରେ ଅନ୍ୟ ଜଣେ ବ୍ୟକ୍ତିଙ୍କ ସହିତ କଥା କହୁଥିବା କାରଣରୁ ହରିୟାଣାର ଫରିଦାବାଦସ୍ଥିତ ଏକ ହୋଟେଲ୍‌ରେ ଜଣେ ବ୍ୟକ୍ତି ତାଙ୍କ ପ୍ରେମିକାର ତଣ୍ଟିଚିପି ହତ୍ୟା କରିଥିବା କଥା ‘ଇଣ୍ଡିଆ ଟୁଡେ’ ରିପୋର୍ଟ କରିଛି।

ମଙ୍ଗଳବାର ଦିନ ‘ହୋଟେଲ୍‌ ଲାଇମ୍‌ଷ୍ଟୋନ୍‌’ରେ ଘଟିଥିବା ଏହି ମାମଲାରେ ସମ୍ପୃକ୍ତ ଥିବା ବ୍ୟକ୍ତିଙ୍କୁ ମଧ୍ୟ ପୁଲିସ ଗିରଫ କରିଛି।

ସେକ୍ଟର୍‌ ୩୧ ଥାନାର ‘ଷ୍ଟେସନ୍‌ ହାଉସ୍‌ ଅଫିସର୍‌’ (ଏସ୍‌ଏଚ୍‌ଓ) ବୀରେନ୍ଦ୍ର ସିଂହ କହିଛନ୍ତି, ‘ଏନ୍‌ଏଚ୍‌ପିସି’ ଚୌକ୍‌ ଅଞ୍ଚଳର ଗୋଟାଏ ‘ଓୟୋ’ ରୁମ୍‌ରେ ଜଣେ ଯୁବତୀଙ୍କ ରହସ୍ୟମୟ ମୃତ୍ୟୁ ବିଷୟରେ ତାଙ୍କୁ ସୂଚନା ମିଳିଥିଲା।

ତେଣୁ,ସେ ଓ ତାଙ୍କ ଟିମ୍‌ ତୁରନ୍ତ ଘଟଣାସ୍ଥଳକୁ ଯାଇ ହୋଟେଲ୍‌ ରୁମ୍‌ରେ ଉକ୍ତ ଯୁବତୀଙ୍କ ଶବ ଦେଖିଥିଲେ। ଶବ ପାଖରେ ଥିଲେ ବେକରେ କ୍ଷତ ହୋଇଥିବା ଜଣେ ୨୪ ବର୍ଷିୟ ବ୍ୟକ୍ତି।

ସେ ଆହତ ବ୍ୟକ୍ତିଙ୍କୁ ହାଜତକୁ ନେଇ ପୁଲିସ ଡାକ୍ତରୀ ପରୀକ୍ଷା ଏବଂ ପ୍ରାଥମିକ ଚିକିତ୍ସା ନିମନ୍ତେ ଫରିଦାବାଦସ୍ଥିତ ବାଦଶାହ ଖାଁ ସିଭିଲ୍‌ ହସ୍ପିଟାଲ୍‌ରେ ଭର୍ତ୍ତି କରାଇଥିଲେ।

Image Courtesy of India Today

ଖଣ୍ଡେ ରଶିରେ ଯୁବତୀଙ୍କ ତଣ୍ଟିଚିପି ମାରିଥିବା କଥା ପ୍ରାରମ୍ଭିକ ପଚରା ଉଚରା ସମୟରେ ଯୁବକଜଣକ ସ୍ବୀକାର କରିଛନ୍ତି।

ସଂଗୃହୀତ ସୂଚନା ଅନୁସାରେ, ଅଭିଯୁକ୍ତ ଯୁବକ ଆକାଶ କହିଛନ୍ତି ଯେ, ଯୁବତୀଜଣକ ଫୋନ୍‌ରେ ଆଉ ଜଣେ ବ୍ୟକ୍ତିଙ୍କ ସହିତ କଥାବାର୍ତ୍ତା କରୁଥିବା ତାଙ୍କର ସନ୍ଦେହ ହୋଇଥିଲା। ସେଥିପାଇଁ ସେ ତାଙ୍କୁ ହୋଟେଲ୍‌ ମାଇଲ୍‌ଷ୍ଟୋନ୍‌କୁ ଡକାଇଥିଲେ। ଫୋନ୍‌ କଥାକୁ ନେଇ ସେଠାରେ ଉଭୟଙ୍କ ମଧ୍ୟରେ ଯୁକ୍ତିତର୍କ କ୍ରମେ ଉଗ୍ର ହୋଇ ହତ୍ୟାକାଣ୍ଡର କାରଣ ହୋଇଥିଲା।

ଗତ ୭ ବର୍ଷ ହେବ ସେ ଯୁବତୀଙ୍କ ସହିତ ପରିଚୟ ଥିବା କଥା ଅଭିଯୁକ୍ତ ଆକାଶ ପୁଲିସକୁ କହିଛନ୍ତି।

ପୁଲିସ କହିଛି, ଦିଲ୍ଲୀରେ ଗୋଟାଏ ଘରୋଇ କମ୍ପାନିରେ ଆକାଉଣ୍ଟାଣ୍ଟ୍‌ ଭାବେ ଚାକିରି କରୁଥିବା ଆକାଶ ଫରିଦାବାଦ୍‌ର ଶିବ କଲୋନିରେ ରହନ୍ତି। ଘଟଣାର ଅଧିକ ତଦନ୍ତ ଚାଲିଛି।