ରିଲ୍ସ କରୁଥିବା ବେଳେ ଖସିପଡ଼ିବାରୁ ଘଟଣାସ୍ଥଳରେ ଉଡ଼ିଗଲା ପ୍ରାଣବାୟୁ

ନୂଆଦିଲ୍ଲୀ: ଉତ୍ତରପ୍ରଦେଶର ଗାଜିପୁରରେ ରିଲ୍ ତିଆରି କରୁଥିବା ସମୟରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଛି। ମୃତକ ଜଣକ ଇ-ରିକ୍ସାର ଛାତ ଉପରେ ଠିଆ ହୋଇ ରିଲ୍ ତିଆରି କରୁଥିବା ବେଳେ ଭାରସାମ୍ୟ ହରାଇ ତଳେ ପଡ଼ିଯାଇଥିଲେ। ମୁଣ୍ଡରେ ଆଘାତ ଲାଗିବାରୁ ଘଟଣାସ୍ଥଳରେ ହିଁ ତାଙ୍କର ପ୍ରାଣବାୟୁ ଉଡ଼ି ଯାଇଥିଲା।  

ମୃତକଙ୍କ ନାମ ଚନ୍ଦ୍ରଶେଖର ରାୱତ। ରାୱତ ଗାଜିପୁରର ମେଡିକାଲ କଲେଜ ପୋଷ୍ଟମର୍ଟମ ହାଉସରେ ଆଉଟସୋର୍ସିଂ କର୍ମଚାରୀ ଥିଲେ । ପୋଷ୍ଟମର୍ଟମ ହାଉସ ସଫା କରିବା ବ୍ୟତୀତ, ସେ ଡାକ୍ତରମାନଙ୍କୁ ଅନ୍ୟାନ୍ୟ କାର୍ଯ୍ୟରେ ମଧ୍ୟ ସାହାଯ୍ୟ କରୁଥିଲେ।

ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଯେଉଁଥିରେ ଚନ୍ଦ୍ରଶେଖର ରିକ୍ସାର ଛାତ ଉପରେ ଠିଆ ହୋଇ ନାଚୁଥିବାର ଦେଖିବାକୁ ମିଳୁଛି। ନାଚୁଥିବା ବେଳେ ହଠାତ୍ ସେ ଭାରସାମ୍ୟ ହରାଇ ରାସ୍ତା ମୁଣ୍ଡରେ ପଡ଼ିଯାଇଥିଲେ। ପାଖରେ ଉପସ୍ଥିତ ଲୋକମାନେ ତାଙ୍କୁ ତୁରନ୍ତ ଡାକ୍ତରଖାନାକୁ ନେଇ ଯାଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

 ପୁଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ କରୁଛି।