ଚତୁର ଚୋର, ଟ୍ରେନ୍ରେ ସୁନା ବ୍ୟବସାୟୀ ଶୋଇଥିବା ବେଳେ ବ୍ୟାଗ୍ ତଳ କାଟି ଲୁଟିନେଲେ ୧ କୋଟି ୩୫ ଲକ୍ଷ ଟଙ୍କାର ଅଳଙ୍କାର
ନୂଆଦିଲ୍ଲୀ: ପଞ୍ଜାବ ମେଲରୁ ଏକ ବଡ ଧରଣର ଚୋରି ଘଟଣା ସାମ୍ନାକୁ ଆସିଛି । ମୁମ୍ବାଇରୁ ଫିରୋଜପୁର ଯାଉଥିବା ପଞ୍ଜାବ ମେଲରୁ ଲୁଟେରାମାନେ ୧ କୋଟି ୩୫ ଲକ୍ଷ ଟଙ୍କାର ଅଳଙ୍କାର ଚୋରି କରିନେଇଛନ୍ତି । ଯାହା ଏବେ ସବୁଆଡେ ଚର୍ଚ୍ଚାର ବିଷୟ ପାଲଟିଛି । ଲୁଟେରାମାନେ ଟ୍ରେନର ଏସି କୋଚ୍ ବି ୨ରୁ ଏକ ବ୍ୟାଗ ତଳ କାଟି ସେଥିରେ ରଖାଯାଇଥିବା ୧ କୋଟି ୩୫ ଲକ୍ଷ ଟଙ୍କାର ସୁନା ଅଳଙ୍କାର ଲୁଟି ନେଇଯାଇଛନ୍ତି । ଏହି ଅଳଙ୍କାର ସରାଫା ବ୍ୟବସାୟୀଙ୍କର ଅଟେ, ଯିଏ ମୁମ୍ବାଇରୁ ବେତୁଲ ଯାଉଥିଲେ। ଚୋରି ହୋଇଥିବା ସୁନା ଅଳଙ୍କାରର ଓଜନ ୪ କିଲୋ ୫୦୦ ଗ୍ରାମ ଥିବା ଜଣାପଡିଛି ।
Sambad is now on WhatsApp
Join and get latest news updates delivered to you via WhatsApp
ଜିଆରପି ନିରୀକ୍ଷକ ବିଏସ୍ ଚୌହାନଙ୍କ ସୂଚନା ଅନୁଯାୟୀ, ଏହି ବ୍ୟବସାୟୀ ଜଣଙ୍କ ବିଭିନ୍ନ ସୁନା ଦୋକାନୀଙ୍କ ଅର୍ଡର ଅନୁଯାୟୀ ଏହି ଅଳଙ୍କାରଗୁଡିକୁ ନେଇ ଯାଉଥିଲେ । ଇଟାରସୀରେ ଓହ୍ଲାଇବା ପରେ, ଯେତେବେଳେ ସେ ବ୍ୟାଗ ଉଠାଇଥିଲେ, ବ୍ୟାଗଟି ଅତ୍ୟନ୍ତ ହାଲୁକା ଲାଗିଥିଲା। ବ୍ୟାଗଟି ଓଲଟାଇ ଦେଖିବା ପରେ, ସେଥିରେ କଟା ହୋଇଥିବାର ବ୍ୟବସାୟୀ ଜଣଙ୍କ ଜାଣିବାକୁ ପାଇଥିଲେ । ତେବେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଚୋରମାନେ ଅତ୍ୟନ୍ତ ଚତୁରତାର ସହ କେବଳ ସୁନା ପ୍ୟାକେଟ୍ଗୁଡିକୁ ହିଁ ଲୁଟି ନେଇଛନ୍ତି । ଚୋରି ଅଭିଯୋଗ ପରେ ପୁଲିସ ତଦନ୍ତ ଆରମ୍ଭ କରିଛି। ସେପଟେ ଷ୍ଟେସନରେ ଲାଗିଥିବା ସିସିଟିଭି ଫୁଟେଜ ଆଧାରରେ ମଧ୍ୟ ପୁଲିସ ତଦନ୍ତ କରୁଛି।